Read Karbi AKAM 22 Bible Online

AKAM 22 - Karbi bible

AKAM 22

¹“Korte marli, lapen po marli atum, non neli kechethakdunji alam arjutha!”

²Alangli halatum aphan Ibri alam pen kepu arjulongsi halatum doklip muchot-lo. Ansi Pol puthulo:

³“Neli ke Jihudi amonit-lo, lapen Silisia adet Tarsas arongsopisi neli mahang thek-lo. Bonta neli Jerusalem arongsopi alongsi the-ding-lo lapen Gamalielsi neliphan athikpet pen ephusar atum Aron nelithanpet-lo. Pini ladak kedo, nanglitum abangphutin asonthotsi nelita Arnam aphan matha-elo.

⁴Labangso atovar kekroi atum aphan ne cheneksi pathilot anta klemlo, lapen pinso, arloso atum aphanta nepsi phatek beng-lo.

⁵Ne ahok alamsi thanlo, lake Kurusar Kethenei abang lapen Jihudi Ameipi amonit atum anta haki nangchodun un. Alanglitum Damaskas arongsopi kedo a-Jihudi atum aphan ketok aloh neli ponsi hadak kedo, labangso amonit atum aphan kenepji, kekokji lapen aduk kepiji aphan neli latum aphan Jerusalem kevanjisi neli hadak damlo.”

⁶“Neli damsi Damaskas arongsopi leji dokdok ahut, nerlo chitim apor malom sining pen men men kethe-ang atur vangsi nedung bithe bitha turphlak-lo.

⁷Neli longle athak krepbup-lo, lapen neliphan kepu ase neli arjulong-lo, ‘Sol, Sol! Nang kopi apotsi nephan chenek-loma?’

⁸Ne arjudunlo, ‘Nangli komatma, Hemphu?’ Hemphu nephan pulo, ‘Neke Najareth a-Jisulo, hala nang kechenekbom abang-lo.’

⁹Neri asangho atumta halabangso akethe-ang atur thek-long-lo, bonta halatum ke nephan kepu ase arjulongledet-lo.

¹⁰Neli arjudunlo, ‘Neli kopisi klem nangjima, Hemphu?’ Hemphu neliphan pulo, ‘Thurra Damaskas damnon. Nang keklem nangji akam Arnam kopi pi pathiktang-loma, lake hadaksi nangphan thanpetpo.’

¹¹Halabangso akethe-ang atur neliphan keturphlak pen ajok nelimek checharchedet-lo. Lasi neliri-asangho atum neliphan neri-ponsi Damaskas arongsopi neliponlo.

¹²“Halabangso arongsopi along Ananias pu inut dhoromi amonit dolo. Alangli ke ilitum Aron kekroi thirklong abang-lo lapen hadak kedo a-Jihudi atum an alangliphan aman pi-olo.

¹³Alangli nedung vangsi arjaptherlo, lapen pulo, ‘Korte, Pol, nangli mek checharthunon!’ Hala mamat nelimek checharthulo, lapen neli alangliphan langding-lo.

¹⁴Ansi alangli pulo, ‘Nangli ephusar atum a-Arnam aning kehang alam kechiniji, Arnam Aban, dhoromi abang aphan kethek-longji lapen alangli kepu ase karjulongji aphansi Arnam nangliphan ingvaitang-lo.

¹⁵Pima nangli kethek-longtang lapen karjulongtang alam an kadokave amonit aphan kethanji aphan nangli alangli haki plangji,

¹⁶lapen nonke nangli kopisi paderbom nangjilangma! Thurra, baptisom ennon, lapen alangliphan ardombomra nangli pap hei hei chepakak-etnon!’

¹⁷“Ansi neli Jerusalem chevoithulo, lapen ne Kardomhemthepi arlo Arnam kardom ahut ning arjan thek-long-lo.

¹⁸Neli ning arjan along neli Hemphu aphan thek-long-lo. Hemphu neliphan pulo, ‘Paprapnon! Jerusalem pen barseraknon. Pima nang nelamjir kethan alam ladak kedo amonit atum dengdedetji.’

¹⁹Neli thakdunsi pulo, ‘Hemphu,’ neli sinagog hei hei along damsi nangliphan kekroi atum aphan nep-lo, phatek beng-lo lapen chok-lo, lake halatum chinihurlo.

²⁰Lapen nangli haki keplang abang, Stephan aphan kepathi ahut nelita hadaksi dolo, lapen alangliphan kepathi che-dondunlo, lapen alangliphan kepathi atum ape-ari honpilo!

²¹Ansi Hemphu neliphan pulo, ‘Damnon, pima ne nangphan heloving kedo, Jihudi kalidet atum angbong nangtoipo.’”

²²Armu atum Pol lapu-an kepu alam ansi arjudunchot-lo; labangso aphi ke halatum ase dotik pen hangsi pulo, “Alangli pen chepahelonon! Alangliphan pathinon! Alangli kereng nangji a-ot ave!”

²³Halatum jasemet hangjo josi amethang methang ape lapen sangti aduk angsong varlo.

²⁴Ansi chedanbang bang suri isi ahemphu abang Pol aphan chedanbang ahem arlo kepaponji ahukum pilo, lapen monit atum kopi apotsi alangliphan la-an hangjo joloma, la kechiniji aphansi alangli amethang aron-aso atum aphan Pol aphan champre abu pen kepachokji ahukum pilo.

²⁵Bonta kepachokjisi Pol aphan kekokhet ahut, Pol hadak karjapther, chedanbang bang pharo ahemphu aphan pulo, “Ado kechiniji aphan ingsaise ako Roman amonit aphan kechokji aron doma?”

²⁶Labangso alam arjulongsi chedan-bang bang pharo ahemphu abang hala chedanbang bang suri isi ahemphu aphan thandamsi pulo, “Nangli kopisi keklemloma? Labangso amonit ke Roman amonit-lo.”

²⁷Lasi chedanbang bang suri isi ahemphu abang Pol adung vangsi arjulo, “Neliphan nethantha, nangli Roman amonitma?” Pol thakdunsi pulo, “Kalang.”

²⁸Chedanbang bang suri ahemphu abang pulo, “Neli ke tangka pi-o pensi Roman amonit plang-lo.” Pol thakdunsi pulo, “Bonta neli ke mahang kethek penta Roman amonit-lo.”

²⁹Anke alangliphan lam karjuji dok dok amonit atumta hala mamat alangli dung pen dam et-lo. Lapen Chedanbang bang suri isi ahemphu abangta Pol ke Roman amonit-lo pu chinisi lapen alangliphan pakokdet-lo apotsi pherelo.

³⁰Jihudi atum Pol aphan kopi apotsi adai tinloma, labangso alam chedanbang bang suri isi ahemphu abang kechini pameji aning hang-lo. Lasi puthot arni alangli Pol aphan kekok ari phlokjok-lo, lapen kurusar kethe atum, lapen Jihudi atum kangsai Ameipi amonit atum an kechingrumji ahukum pilo.