Read Karbi AKAM 23 Bible Online

AKAM 23 - Karbi bible

AKAM 23

¹Pol Kangsai-Amei amonit atum aphan langdingsi pulo, “Israel Akorte-marli atum! Pini arni anta neli ke Arnam angno neli Ning-ingthin klar-et pensi dobomlang.”

²Ansi Pol angho along kepatengji aphan Anna-nias pu akurusar kethenei abang hala Pol adung karjapphrong atum aphan hukum pilo.

³Pol alangliphan thakdunsi pulo, “Oh, Saini kevittang a-arpong! Arnam chenamsi nangphan nangchokpo. Aron ateng pen neliphan kangsaiji aphansi nang hadak ing-nilo, bonta nangmethang ke nephan kepachokji ahukum pisi Aron ingdilo!”

⁴Pol adung kedo amonit atum alangliphan pulo, “Nang kopusi Arnam a-Kurusar kethenei aphan lason alam kepu hailoma?”

⁵Pol thakdunsi pulo, “Alangli kurusar kethenei abang-lo puke neli chininedet-lo, Israel akorte marli atum! Pima ‘rat ahemphu aphan putot-ri pu hastro along ketok do.’”

⁶Armu angbong penang atum ke Pharisi atumlo, lapen akaprek atum ke Saduki atumlo pu chinisi Pol Mei angbong kehang pen pulo, “Israel Akorte marli atum! Neli ke Pharisi amonit-lo, lapen Pharisi atum aso lo. kethitang atum rengthusi thurji pu nening kethe kedo apotsi nephan ladak ne ingsailo!”

⁷Alangli labangso alam pudet aphi Pharisi lapen Saduki atum angbong kechebohongji pangcheng-lo, lapen halatum angbong abe hini dokok-lo.

⁸(Pima Saduki atum ke kethitang atum akethur ave, sining apherangke lapen karjongta ave pusi pulo; bonta Pharisi atum ke la kadokaveta do pusi kroilo.)

⁹Kehangjo ase thethumuchot-lo, lapen Pharisi abe atum angbong pen aron thekser penang atum thursi lam kechedan pen pulo, “Labangso amonit aphan nelitum thang adaita thek-longle. Karjong kalite sining apherangkesi alangliphan kethan binong tahailo!”

¹⁰Halatum angbong lam chedanseisi huripik-lo apotsi Pol aphan ingsek-ipo pusi chedanbang bang suri isi ahemphu abang pherelo. Lasi alangli chedanbang atum aphan armu atum angbong toisi halatum arideng pen Pol aphan vansi chedanbang ahem arlo kepaponji ahukum pilo.

¹¹Halabangso aningve Hemphu Pol adung arjapthersi pulo, “Phereri! Nang ladak Jerusalem along nehaki kepi asonthotsi Rom arongsopi angbongta nehaki pinangji.”

¹²Puthot adap Jihudi penang atum chingvaisi alam pathik-lo. Halatum Pol aphan pathithe tik ke thangta choche, junje pusi semetang-lo.

¹³La kehingno abidi kechepathik atum bang phlikep soselo.

¹⁴Halatum kurusar kethe atum lapen akesar atum along damsi pulo, “Netum Pol aphan pathithetik ke thangta choche pusi semetang-lo.

¹⁵Tangte nonke nanglitum lapen Jihudi atum kangsai amei amonit atum Chedanbang bang suri ahemphu along monit toira, nanglitum Pol aphan ansose kangsai pamejisi ning hang-lo apotsi alangliphan nanglitum angno van nangji pule kepalemlem pen pathan damnon. Anke Pol nanglitum adung nanglele ako nelitum alangliphan kepathiji aphan chesikdingpo.”

¹⁶Bonta Pol angjirpi asopo labangso kepathiktang alam arjulong-lo, lasi alangli chedanbang ahem arlo damsi Pol aphan labangso alam thandamlo.

¹⁷Ansi Pol chedanbang bang pharo ahemphu inut aphan hangsi pulo, “Labangso ariso aphan chedanbang bang suri ahemphu along pontha. La alangliphan kopine kethanji alam do.”

¹⁸Ansi alangli halabangso ariso aphan chedanbang bang suri ahemphu adung ponsi pulo, “Hala phatek arlo kedo a-Pol neliphan hangsi labangso ariso aphan nanglidung pontha pusi neliphan choningrilo; pima labangso ariso nangliphan kopine kethanji alam do pusi pulo.”

¹⁹Chedanbang bang suri ahemphu abang halabangso ariso aphan ari otponsi ihi anat ponlo, lapen arjusi pulo, “Nangli neliphan kethanji alam kopima?”

²⁰Halabangso ariso pulo, “Jihudi atum angbong keja atum penap nanglidung vangsi Pol aphan Jihudi atum Kangsai Amei angno vantu pusi nangliphan kechoningriji aphan pathiktang-lo. Kangsai Amei amonit atum Pol aphan ansose kangsai pamejisi aning hang-lo pusi halatum kepalem lem pen nangliphan thanji.

²¹Bonta nangli halatum alam kroiri; pima halatum angbong pinso amonit bangphlikep sose atum ke Pol aphan pathithetik ke thangta choche-junje pusi semetang-lo. Lasi halatum alangliphan kepathiji aphan chepatujoisi tondingji. Non halatum labangso akam keklemjisi chesikding-lo, lapen nangli keparaiji alam aphansi inghongphrong-lo.”

²²Chedanbang bang suri ahemphu abang halabangso ariso aphan pulo, “Nangli neliphan labangso alam thanlo puke nangli badu aphanta thanri.” Ansi alangli halabangso ariso aphan padamjuilo.

²³Ansi chedanbang bang suri ahemphu abang hala chedanbang bang pharo ahemphu aphan hukum pisi pulo, “Sijeria arongsopi kedamji aphan akeng pen kedam aron-aso bang pharo hini, losei kardon aron-aso bang throksi kep lapen chir kejor aron-aso bang pharo hini pathiknon, lapen hadak kedamji aphan chesiknon.

²⁴Pol kardonponji aphan losei kalite gadha hei hei pathiknon, lapen thang akesung avepin pen alangliphan Felix Govornor akeng-ri ponnon.”

²⁵Ansi chedanbang bang suri ahemphu abang loh tok-lo. Alangli ketok lapuson helo:

²⁶“Neli Klodias Laisiassi labangso aloh, nangli, Felix govornor akehai aphan tok-lo: Kardom deng-iktha.

²⁷Jihudi atum labangso amonit aphan nepsi pathiji dok dok-lo. Halabangso ahut neli chedanbang atum ponsi alangliphan halatum arideng pen pajok-lo. Alangli ke Roman amonit-lo pusi neli arjulong-lo.

²⁸Halatum alangliphan adai ketin alamthe neli kechinijisi ning hang-lo; lasi neli alangliphan halatum akangsai amei along ponlo.

²⁹Halatum amethang aron kopine alam apotsi alangliphan adai tinlo. Bonta alangli kethi nangji, kalite phatek kedo nangji, lason adai kedo akam ke alangli thangta klemklelo, lake neli thek-long-lo.

³⁰Lapen alangliphan kepathiji abidi pathiktang-lo pusi neliphan thanlo; lasi hala mamat neli alangliphan nangli kengri nangketoiji aphansi pathik-lo. Alangliphan adai ketin atum nangli ingnosi alangliphan kebok alam kepaklangji aphan neli hukum pilo.”

³¹Alangli hukum kepi asonthotsi chedanbang atum klemlo. Pol aphan endamsi, halabangso aningve mamat alangliphan Antipatris arongsopi an ponlo.

³²Puthot arni akeng pen kedam aron-aso atum ke chedanbang ahem along nangchevoilo, bonta Pol along kepadun losei kardon aron-aso atum aphan ke hadaksi otekang-lo.

³³Ansi halatum Sijeria arongsopi lesi Govornor aphan halabangso aloh pilo, lapen Pol aphan alangli rideng hodailo.

³⁴Govornor halabangso aloh porhesi Pol aphan arjulo, “Nangli kolobangso adet amonit-lo?” Ansi Pol ke Silisia adet amonit-lo pu chinisi,

³⁵alangli pulo, “Nangliphan adai ketin atum ladak nangle lote neli nangli lam arjupo.” Ansi Pol aphan Herod recho ahem along bidamsi alangliphan honpametu pu ahukum pilo.