Read Karbi AKAM 24 Bible Online

AKAM 24 - Karbi bible

AKAM 24

¹Nipho aphi Annanias pu kurusar kethenei abang akesar penang atum aphan lapen Tartullas pu inut a-Ukir cheponsi Sijeria arongsopi damlo, lapen halatum govornor angno Pol aphan kebok alam paklang-lo.

²Ansi alangli Pol aphan hangdet-lo, lapen Tartullas Pol aphan lam kebokji pangcheng-lo. Alangli pulo, “Felix akehai! Nangli pen ajoksi nelitum rengdok rengni pen dolong-lo, lapen nangli kemathamek akam pen ajoksi labangso adet akeme aphan, pinene alam larponbomsi pameponbomlo.

³Labangso akam apot nelitum kadokave adimta lapen kaike ahutta ning arong-lo, lapen nangliphan ning aklong pen choro-verlo.

⁴Neli nangli por ke-en-oji ning hanghelo. Lasi neli nangliphan choningrilo, nangli ingjinsora nelitum alam arju iktha.

⁵Labangso amonit ke kesung kevan abang-lo; alangli pirthe adang kedo a-Jihudi atum aphan pahuriseibomlo, lapen alangli helo Najaren pu isi asong aphan keja abang-lo, lake nelitum thek-long-lo.

⁶Alangli Jihudi atum Kardomhemthepi Kangthir kepangthirthejisi bor-ilo. Bonta nelitum alangliphan nepchek-lo.

⁷Bonta chedanbang bang suri ahemphu vangsi alangliphan nelitum angbong pen pon bor-idet-lo.

⁸Nangli alangliphan arjulote, la nelitum alangliphan kebok alam an nangli methangta chinipo.”

⁹Ansi Jihudi atumta la kadokave alam ahok pusi pudunlo.

¹⁰Ansi govornor Pol aphan asin paklangsi lam paningjetoilo. Lasi Pol pulo, “Nangli labangso arat aphuthak kangsai abang keplang aningkan do-olo; lasi neli nangli ingno ning arong pen chethakdunpo.

¹¹Neli Arnam aphan kangdukdamjisi Jerusalem arongsopi kedam arni pen non an ni krehini parpelang, lake nangli methangta chini unji.

¹²Neli Kardomhemthepi arlo komane pen lam kechedan, kalite sinagog along, lapen rongsopi angbong armu aphan lam hoisi kepahurisei, Jihudi atum nethekdunlonglepinlang.

¹³Lapen alanglitum non neliphan kebok alam hei heita ahok pu aporman nangliphan pithekthelo.

¹⁴Bonta neli nangli ingno eson alam chekrongpo: atheke lahelo, neli halabangso a-Tovar aron atengsi nelitum aphusar atum a-Arnam aphan ingdukverlo. Halatum labangso a-Tovar aphan ke isi kecheprek asong pusi pulo. Bonta Moses Aron along ketok alam an lapen Arnam amontri atum aloh along ketok alam an nelita kroipet-lo.

¹⁵Halatum Arnam along ning kethe kedo asonthotsi nelita Arnam along ning kethe dolo, atheke dhoromi lapen dhoromime atum anta kethi pen thurji pusi nelita ning kethe dolo.

¹⁶Lasi neli kaiketa Arnam angno lapen monit atum angnota akelet kavedet pen dosi neli ning ingthin klar-et pen kedoji aphan bor-ilo.

¹⁷“Ansi Jerusalem arongsopi pen damjui aphi penang aningkan aphisi neli neli methang akhei amonit atum aphan dan atangka kethondamji lapen Arnam aphan athok kethokdamjisi Jerusalem damthulo.

¹⁸Neli aron ateng pen chepangthirtangdet aphi, lahei hei akam keklem un ahutsi halatum neliphan Kardomhemthepi arlo nethek-long-lo. Hadak neli long armu avelo, lapen hadak thang akehoriseita avelo.

¹⁹Bonta Asia adet pen kevang manene a-Jihudi atum hadak dolo. Halatum jongsi neliphuthak kopine kebokji alam do tangte halatum methangsi nangli ingno vang-ra neliphan kebok alam paklang nangji apot-lo.

²⁰Kalite neli Jihudi atum kangsai amei angno karjap ahut neliphan kopi pi adai long-loma, labangso alam ladak non kedo atum papunang.

²¹Bonta eson alam do tahai, atheke lahelo, neli halatum angbong karjapther ahut neli hangsi pulo, ‘Kethitang atum rengsi thurji pu neli kekroi apotsi pini nanglitum neliphan ingsailo.’ ”

²²Ansi Felix halabangso a-Tovar alamjir chini pamelo apotsi, alangli kangsai lapu ansi ingtonkoksi pulo, “Mo chedanbang bang suri ahemphu, Laisias nanglelote neli nangli lam ingsaipo.”

²³Lapen Pol aphan honpametu, bonta alangliphan asapso akejokvan pitu, lapen alangliphan kenangsot ahormu hei hei nangkethon ajirpo atum aphan khangri pusi Felix hala Pol aphan kehon aron-aso bang pharo ahemphu aphan hukum pilo.

²⁴Penang arni aphi Felix amethang apiso, Drusilla pen vangsi Pol aphan pahang damlo. Drusillake inut Jihudipilo. Jisu Khristo aphan kekroi alamjir Pol kethan alam Felix arjudunding-lo.

²⁵Bonta Pol dhoromi alam, ning kecheber alam lapen non kevangji a-Kangsai Arni alam hei hei kethan ponbom ahut Felix ke phereduksi pulo, “Nonke nangli damtamelo. Mo apor kelong ahut neli nangliphan pahangthupo.”

²⁶Bonta Pol alangliphan tangka piji tahai pusi Felix aning thelo, lasi alangli Pol aphan abatai batai pahangdamsi alangli pen chingkilo.

²⁷Ningkan hini aphi Porkias Festassi Felix adim govornor cholo. Bonta Felix ke Jihudi atum aning kepadokji aning hang-lo apotsi alangli Pol aphan phatek arlosi bitekangkok-lo.