Read Karbi AKAM 28 Bible Online

AKAM 28 - Karbi bible

AKAM 28

¹Nelitum joksi talo akung lepet-lo. Halabangso alanglom amen ke Malta puhelo pu nelitum aphi ansi chinilo.

²Hadak asor nelitum aphan inghon parpik-lo. Halabangso ahut arve jang-lo apotsi ingsampik-lo. Lasi halatum nelitum aphan me nethorpilo, lapen nelitum aphan deng-lo.

³Pol theng epeng pangrum damsi me kethek ahut me angtang keso pen apot pherui ke-ik ejon nangbarsi Pol ari perhet-lo.

⁴Halabangso alanglom amonit atum Pol ari along pherui kejangling thek-longsi lahin lahin chepulo, “Labangso amonit ke monit kepathi abangvek tahailo. Alangli talo along pen jok-lo setta kepho nangji ang-ang dokok apotsi alangliphan pareng longledetpo.”

⁵Bonta Pol halabangso apherui me along hijirphit-lo, lapen alangli thangta cheplangpledet-lo.

⁶Alangli bang kangji, kalite alangli menmen krepphitsi thilotji pusi halatum mathalo. Bonta kanghong ajir dingklui aphita alangli phan thangta plangpledet thek-longsi halatum aning kematha chelarsi pulo, “Alangli ke inut a-arnamlo!”

⁷Halabangso adim adung arei alongleke halabangso alanglom ahemphu, Publias alonglelo. Alangli kanghon pen nelitum aphan nithom anta amethang ahem alohi chak-lo.

⁸Alangli po aphu keso lapen apok kangsir pen ajok tiroksi dolo. Pol alangli dung damsi Arnam ardomlo, lapen alangli phu athak ari batsi keso melo.

⁹La plangdet aphi halabangso alanglom keso atum an alangli long vang-lo, lapen alangli halatum aphan pamelo.

¹⁰Halatum nelitum aphan ason ason ahormu nemanlo, lapen nelitum hadak pen kedamthu ahut nelitum kenangji ason an telongpi along nangthapdunlo.

¹¹Chiklo jonthom aphi hadak ningkreng esek kedo, Alekjendria adet atelongpi chethapdunsi nelitum damlo. Halabangso atelongpi aphrang akandar along ke “Kecherop Arnam” pu akumlin dolo.

¹²Nelitum Sirakia arongsopi kethe nanglelo, lapen hadak nelitum nithom dokok-lo.

¹³Hadak pen nelitum damthusi Rigiam arongsopi nanglelo. Puthot arni nitur anat pen tomon kevang pangcheng-lo, lapen puthot arnithu nelitum Puteoli arong-sopi lelo.

¹⁴Hadak nelitum kekroi akorte atum pen chetong-lo, lapen halatum along hithi erui dotu pusi halatum nelitum aphan choningrilo. Lapusonsi nelitum Rom arongsopi vang-lo.

¹⁵Rom arongsopi kedo kekroi akorte atum nelitum abirta arjulongsi nelitum aphan nangkangthum-dunjisi Appias a-Hithi lapen Boha kethom pu arongsopi an vang-lo. Pol halatum aphan thek-longsi Arnam aphan kero pilo, lapen aning theklong-lo.

¹⁶Nelitum Rom arongsopi nanglesi Pol aphan ke alangliphan keton aron-aso pen padorapchomlo.

¹⁷Nithom aphi Pol Jihudi atum angbong keja atum aphan phalo. Halatum chepangrumpet aphi alangli halatum aphan pulo, “Kortemarli atum, neli nelimethang akhei aphan, kalite elitum aphusar atum ekepite-kang aron atang aphan thangnat akehingnota klemklepin setta neliphan Jerusalem along phatek nebengsi Roman atum arideng nehodailo.

¹⁸Halatum nephan ingsaisi nephan kelophlotji aning hang-lo, pima nepran kedammeme akehingno akam neli thangta klemklelo, lake halatum chinilo.

¹⁹Bonta Jihudi atum labangso alam kroidundedetsi Rom a-Recho nekepangsaiji aphan neli choningri nangkok-lo. Bonta nemethang akhei aphan kopine alam kedinji, lapu aphan kali.

²⁰Lasi nanglitum pen kechetongji lapen kechingki-chethanjisi neli nanglitum aphan phalo, pima Israel atum aning kechethedam abang aphan ajoksi nephan lason ingchin ari pen nekoktang-lo.”

²¹Halatum alangliphan pulo, “Nelitum Judia adet pen nangli lamjir thang abirta alohta longle, lapen hadak pen kevang badu akorteta nangli lamjir thang akehingno alam thanthe, lapen alam kechethanta arjudun longle.

²²Bonta nangli kepuji alam nelitum arju ingtung-lo. Pima la nanglitum asong ke hingno pusi kadokave adimta monit atum puhurlo, lake nelitum chinilo.”

²³Lasi halatum Pol pen arni chepathik-lo. Hala kepathik arni monit ake-ongpi atum Pol kedo adim vang-lo. Adap pen ha ajo an alangli halatum aphan Arnam a-Rat alamjir thanpajirmilo, lapen Moses Aron lapen Arnam amontri atum ketok alam hei hei paklangsi alangli halatum aphan Jisu alamjir kepakroiji bor-ilo.

²⁴Alangli kethan alam pen ajok penang atum ke kroilo, bonta akaprek penang atum ke kroikredet-lo.

²⁵Lasi Pol eson alam thandet aphi halatum angbong alam chekroikredetsi chekakphunlo. Pol kethan alam lapuhelo: “Arnam amontri, Isaiah pen ajok Karjong Kangthir nangtum aphusar atum aphan athikpetsi pulo, atheke alangli pulo:

²⁶‘Damra labangso amonit atum aphan punon: Nangtum arjubom arjubom setta chininedetji; Nangtum langphrongbom setta thek-longledetji.

²⁷Pima labangso amonit atum aning buikluihak-huk-lo, lapen halatum anota chetokthip tang-lo, lapen halatum amekta selokthiptang-lo. Lapu kali asonte, halatum amek pen thek-longji apot-lo, halatum ano pen arjulongji apot-lo, halatum aning pen chinithekji apot-lo, lapen halatum nelong nangchiruisi ne halatum aphan pameji apot-lo pusi Arnam pulo.’”

²⁸Pol padusi pulo, “Tangte mathanon, Arnam akepajok alam Jihudi kalidet atum aphan pitang-lo, lapen halatum la arjuji”

²⁹Pol labangso alam thandet aphi Jihudi atum jasemet lam chehilisi pratphunlo.

³⁰Pol tangka pi pensi bang ahem ningkan hini an dolo. Alangli dung kevang atum an aphan alangli ning arong pen deng-lo.

³¹Alangli phererepin pen, lapen alangliphan kekhang abang ave pin pen alangli Arnam a-Rat alamjir than pachethang-lo, lapen Hemphu Jisu Khristo alamjir thanlo.