Read Karbi AKAM 4 Bible Online

AKAM 4 - Karbi bible

AKAM 4

¹Pitor lapen Jon monit atum aphan lam kethan un ahut kurusar penang atum, Hemphu a-Hemthepi keton aron-aso atum ahemphu lapen Saduki atum hadak vang-lo.

²La ketoi-tang bang hini atum, atheke, Pitor lapen Jon monit atum aphan Jisu kethi pen kethur alam thansi, kethitang atum rengsi thurji pu aporman pilo apotsi halatum aning kangpik-lo.

³Lasi halatum latum aphan nepchek-lo, lapen ningvetang-lo apotsi latum aphan puthot adap an phatek beng-lo.

⁴Bonta alanglitum kepachethang alam karjudunlong ake-ongpi atum ke kroilo, lapen halatum aphai pinso amonit bang suri pho anbak dolo.

⁵Puthot arni Jihudi atum angbong keja atum, akesar atum lapen aron thekser atum Jerusalem arongsopi along chingrumlo.

⁶Hadak halatum kurusar kethenei, atheke Annas pen, lapen Kaiaphas, Jon, Alekjendar atum pen lapen Kurusar kethenei adon arap atum pen chetong-lo.

⁷Halatum la kekroitang atum aphan halatum angno paparjapsi arjulo, “Nanglitum la kopusonsi klemloma? Nanglitum kopi ajakongsi kelongma, lapen kopi amen pensi klemloma?”

⁸Ansi Pitor Karjong Kangthir pen plengsetsi halatum aphan pulo, “Rat aphan keja atum, lapen akesar atum:

⁹Pini nelitum aphan jongsi hala akeng ketekok abang aphan kangjinso kepaklangtang alam, lapen alangliphan kopusonsi pamedet-loma, labangso alamjirsi ne-arjulo tangte nanglitum kadokave atum, lapen Israel atum an lale arjuhurnon:

¹⁰La nanglitum angno karjapther abang ke Najareth a-Jisu Khristo amen ajakong pensi pametang-lo. Nanglitum labangso a-Jisu aphan thengparpan athak pathilot-lo, lapen Arnam alangliphan kethi pen pathurthulo.

¹¹Atheke hastro along ketok: ‘Hem kekim atum kekhindetang a-arlongsi hem kepathir-i akenangsotnei a-arlong plangtang-lo! pu alam ke Jisu alamjirsi pudamlo.

¹²Kejok ke alangli pen ajoksi longchot. Pima etum kejok kelongji aphan Arnam sining arum labangso amen apar ke akaprek amen monit atum aphan pipepinlang.”

¹³Pitor lapen Jon akepherere thek-longsi lapen halatum kecharli, kethek avepin, monit jong jongchot pu chinisi hala kangsai amei amonit atum kematha abidi jutdet-lo. Ansi alanglitum Jisu along kejalangdun atumlo pu halatum chemathadamlo.

¹⁴Bonta hala kemedet abang hadak Jon lapen Pitor along karjapdunther thek-longsi halatum kethakdunji alam avedet-lo.

¹⁵Lasi halatum aphan kangsai amei ahem pen kedamji ahukum pilo, lapen halatum angbong kechingvaiji pangcheng-lo.

¹⁶Halatum chepulo, “Ilitum labangso amonit atum aphan kopisi inghoi nangjima? Pima latum manghumeme akam klemtang-lo, lake Jerusalem arongsopi kedo amonit atum an chinilorlo, lapen ilitum la chekrongkre un-e.

¹⁷Bonta monit atum labangso alam la apar ke kepachethangthedetji aphan, halatum badu amonit aphanta Jisu amen penke kepupedetjile ilitum halatum aphan pacheretoi lonang.”

¹⁸Lasi halatum latum aphan hangthulo, lapen Jisu amen pen badu aphanta thangta puri lapen thanri pusi hukum pilo.

¹⁹Bonta Pitor lapen Jon halatum aphan thakdunsi pulo, “Arnam angno ke nelitum nanglitum alam kekroisi kemema, mate Arnam ahukum kekroisi kemema, lale nanglitum methang ingsaitha.

²⁰Pima nelitum ke nelitum methang kethek-long lapen karjulong alamjir pupe un-e.”

²¹Lasi halatum latum aphan ansose papherethusi lophlot-lo, pima kadokave amonit atum latum keklemtang akam pen apot Arnam aphan rohurlo apotsi halatum latum aphan aduk kanghoiji abidi longthekthedet-lo.

²²Hala kemanghumeme pen kemedet abang a-arta ke ningkan phlikep soselo.

²³Pitor lapen Jon aphan lophlot aphi latum amethang ajirpo atum along damsi kurusar kethe atum lapen akesar atum latum aphan kepu alam chethanlo.

²⁴Kekroitang atum labangso alam arjulongsi aning isipet pen Arnam aphan ase kethe pen ardomlo: “O Hemphu, jakong theparpik a-Bang, nangsi sining, longle lapen talo, lapen lahei hei arlo kedo amar an pinchong-lo.

²⁵Karjong Kangthir pen ajok nangsi netum aphusar, atheke nangban, David angho pen labangso alam papulo: ‘Jihudi kalidet atum kopi apotsi jasemet aning thiloma? Lapen rat atum kopi apotsi akejoijepi alam mathaloma?

²⁶Hemphu lapen Alangli Khristo abe thur Pen kechedanjisi pirthe arecho atum cherintilo, lapen rat kepangri atum chepangrumpet-lo.’

²⁷Pima labangso arongsopi alongsi Herod lapen Pontias Pilat atum Jihudi kalidet atum lapen Israel amonit atum pen pen chingrumpetsi nang kebattang a-Khristo, nang Ban kangthir Jisu abethurlo.

²⁸Nang methang ajakong pen lapen nang methang aning kehang pen nang aphrang pen kepathiktang asonthot keklemjisi halatum chingrumtang-lo.

²⁹Lapen nonke Hemphu, halatum netum aphan kepaphere alam mathanon, lapen la nangban atum kephererepin pen nang lam kethan haiji aphan nang netum aphan jakong pinon.

³⁰Keso atum aphan kepamejile nang ri chirungnon, lapen nangmethang Aban kangthir, Jisu amen pen kemanghumeme akam hei hei lapen kematha abidi kejutdetakam kethe hei hei klemnon.”

³¹Halatum ardomtangdet aphi halatum kechingrum adim klemhurlo. Halatum kadokaveta Karjong Kangthir pen plengset-lo, lapen phererepin pen Arnam alam kepachethangji pangcheng-lo.

³²Kekroitang atum aning angthin isipet-lo. Baduta amethang amar aphan nemar pu chepupedetsi halatum do-an amarta enrap rap-lo.

³³Ketoitang atum ajakong thepik pen Hemphu Jisu kethi pen kethur alam ahaki pibomlo, lapen Arnam halatum kadokave aphuthak ahirjume pi-olo.

³⁴Halatum angbong inutbakta akedorde ason avedet-lo. Rit lapen hem akhi kedo atumta lahei hei chejorsi kelong an atangka vansi,

³⁵ketoitang atum arideng hodaipet-lo; lapen abangphutin aphan akenang kedo atengsi labangso atangka ronlo.

³⁶Lapen Saipras alanglom alongsi amahang kethek, inut Joseph pu abang hadak dolo. Alangli ke Levi akur amonit-lo. Ketoitang atum alangliphan Barnabas pusi amen irlo. Barnabas pu amen atheke, “Ning kepathe-thek abang,” puhelo.

³⁷Alangli amethang alongle chejorsi kelong an atangka ketoitang atum arideng hodaipet-lo.