Read Karbi AKAM 5 Bible Online

AKAM 5 - Karbi bible

AKAM 5

¹Bonta Annanias pu inut amonit dolo. Alangli piso amen ke Saphira puhelo. Halatum penangbak akhi chejorlo.

²Ansi apiso pen chingvaisi kelong an atangka angbong pen penang anbak atangka ke amethang aphan chebijoilo, lapen kedolang an atangka vansi ketoitang atum arideng hodailo.

³Pitor alangliphan pulo, “Annanias, nangli kopusonsi Soitan nangliphan pajalongra, nangli Karjong Kangthir aphan pachobeisi nangli kechojor akhi atangka penangbak nanglimethang aphan chebijoiloma?

⁴Nangli labangso akhi jorjetik ke la nangli methang akhilo, lapen nangli la jordet aphi nangli kelong an atangka ke nangli methang aning kehang aling en-unlo, kalima? Nangli monit aphansi chobeitang-lo, lapu kali; bonta Arnam aphansi chobeitang-lo!”

⁵Annanias labangso alam karjulong pen mamat krep-bupsi thilot-lo, lapen labangso alam karjulong atum an jasemet pherelo.

⁶Ansi risomar atum vangsi abang arpum pe pen perlo, lapen ingtan ponsi pipdamlo.

⁷Porphai kethom anbak aphi apiso abang la keplangtang alam chinine-detsi hadak vang-lo.

⁸Pitor labangpi aphan arjulo, “Neliphan nethantha, nanglitum akhi kechojor anam kadokave la an heloma?” Labangpi thakdunsi pulo, “Kalang-lo, kadokave la an helo.”

⁹Pitor alangliphan pulo, “Nanglitum Hemphu a-Karjong aphan asat kelangji aphan kopusonsi ning isipet-loma? Langnon, nangli penan aphan kepipdam atum inghap angno an nangletang-lo. Halatum nangliphanta pondetpo!”

¹⁰Hala mamat labangpi alangli kengri krepbupsi thilot-lo. Risomar atum vangsi halatum alang-liphan akethitangsi thek-long-lo, lapen halatum alangliphan ingtan ponsi apenan adung piptekang-lo.

¹¹Mondoli amonit atum an lapen labangso alam karjulong atum jasemet pherelo.

¹²Ketoitang atum monit atum angbong ake-ongpi akemanghumeme akam, lapen kematha abidi kejutdet akam hei hei klembomlo. Ketoitang atum an Solomon a-Hongkup pu adimsi chingrumpet-lo.

¹³Monit atum latum anong pathelo setta labangso asong pen akaprek amonit atum ke apakta latum along jalangdun haihedet-lo.

¹⁴Bonta pinso, arloso atum Hemphu aphan kroibomsi labangso asong along jalangdunbomlo, lapen labangso asong amonit aphai batbomlo.

¹⁵Lasi Pitor kedam kevang ahut alangli bang aharchi anchot setta manene abang athak kepaphoji aphansi monit atum keso atum aphan tovarpi along ponsi hongplang lapen tar athak bilo. Halatum la anta klemlo.

¹⁶Lapen Jerusalem arongsopi adung arei kedo arong hei hei pen armu atum amethang methang akeso atum lapen kangthirthe ahi-i kepho pen ajok aduk kedopik atum aphan vansi chingrumpet-lo, lapen latum kadokave aphanta pame-et-lo.

¹⁷Ansi Kurusar Kethenei ari asangho atum, atheke Saduki abe atum ketoitang atum aphan jasemet lang un-elo;

¹⁸Lasi halatum ketoitang atum aphan nepsi rat atum aphatek along beng-lo.

¹⁹Bonta halabangso aningve Hemphu apherangke vangsi phatek anghap ingpudang-lo, lapen ketoitang atum aphan nangpabarsi pulo,

²⁰“Damra Kardomhemthepi arlo arjapphrong non, lapen rat atum aphan la chethe kemi alamjir thannon.”

²¹Ketoitang atum labangso alam atengsi adapprang Kardomhemthepi arlo damlo, lapen hadak lam kethanji pangcheng-lo. Ansi kangsai Ameipi kedoji aphan Kurusar Kethenei abang lapen ari asangho atum hala Jihudi atum angbong akesar atum an aphan hangsi pangrumpet-lo; lapen ketoitang atum aphan halatum angno kepavanjisi phatek along pherangke toilo.

²²Bonta la pherangke atum phatek along nanglesi ketoitang atum aphan thek-longledet-lo. Lasi pherangke atum chevoisi halatum aphan thansi pulo,

²³“Nelitum phatek along lesi phatek anghap kangkirhet lapen anghap along keton atum karjapphrong thek-long-lo, bonta anghap ingpudet aphi netum phatek arlo badu aphanta thek-longledet-lo.”

²⁴Labangso alam arjulongsi Kardomhemthepi keton atum ahemphu lapen kurusar kethe atum ke ketoitang atum kopi cheplang-det-loma pusi kematha abidi jutdet-lo.

²⁵Ansi inut amonit vangsi halatum aphan pulo, “Arjutha! Nanglitum phatek kebeng amonit atum ke hadak Kardomhemthepi arlosi lam thanbomlo!”

²⁶Kardomhemthepi along keton aron-aso atum ahemphu amethang amonit atum pen pen damsi ketoitang atum aphan vanlo. Halatum latum aphan thangnat adukta inghoihedet-lo, pima rat atum halatum aphan arlong pen arbujibon pusi halatum pherelo.

²⁷Ketoitang atum aphan vansi Jihudi atum kangsai Ameipi angbong parjaptherlo, lapen Kurusar Kethenei abang latum aphan arjulo,

²⁸“Labangso amonit amen pen thangta thanri pusi nelitum nanglitum aphan sodak ahukum nangpilo. Bonta nanglitum kopi klemtang-loma, lale mathatha: Nanglitum kethan alam Jerusalem adang an chethangphlup-lo, lapen nelitum aphuthaksi halabangso amonit avi kepabu adai kekoiji nanglitum aning hang-lo!”

²⁹Pitor lapen ketoitang atum thak-dunsi pulo, “Nelitum Arnam ahukumsi kroivek nangji, monit ahukum kali.

³⁰Nanglitum halabangso a-Jisu aphan thengparpan athak saksi pathilot-lo. Bonta ephusar atum a-Arnam labangso a-Jisu aphan kethi pen pathurtang-lo.

³¹Israel atum aphan aning kepachiruithekji lapen apap hei hei kediyathekji aphansi Arnam alangliphan keja a-Bang lapen Kepajok a-Bang paplang-lo, lapen amethang ari ar-e anat bilo.

³²Nelitum lapen Karjong Kangthir labangso alamjir ahakilo. Labangso a-Jisu aphan kekroi atum an aphan Arnam labangso a-Karjong Kangthir pilo.”

³³Labangso alam arjulongsi Kangsai amei amonit atum jasemet aning thi-lo, lapen halatum la ketoitang atum aphan kepathilotji ansi aning hang-lo.

³⁴Bonta halatum angbong pen Gamaliel pu inut a-Pharisi hala Jihudi atum Ameipi angbong arjapsi ketoitang atum aphan malomso ahut an ingtan kepaponji ahukum pilo. La Gamaliel ke inut aron thekser lapen rat angbong aman kedo abang-lo.

³⁵Ansi alangli hala Jihudi Ameipi amonit atum aphan pulo, “Israel akortemarli atum, nanglitum labangso amonit atum aphan klemji aling setta cheretu.

³⁶Pima labangso aphrangke Theus nangcheklangsi alangli inut thedung amonit-lo pusi amethang chepulo. Bang pharo phli anbak amonit atum alangli long jalangdunlo. Bonta alangliphan pathilot-lo, lapen alangli long kejelangdun atum an aphan paprat-etsi halatum avedet-lo.

³⁷Halabangso aphi monit aphai kelakha ahut Galili adet a-Judas nangcheklangsi penang amonit aphan abe cheponlo. Alangliphanta pathilot-lo, lapen alangliphan kekroi atum an aphan paprat-et-lo.

³⁸Lapen nonke ne nanglitum aphan nangpulang, nang-litum labangso amonit aphan thangta klemri. Nanglitum latum aphan obupnon. Latum kematha alam lapen keklem akam jongsi monit akamchot-lo tangte, la avedetji.

³⁹Bonta jongsi lake Arnam pensi vang-lo tangte, nanglitum jonghe setta latum aphan khang un-edetji. Lake nanglitum Arnam pen ron kechedan asonsi plangdetji!” Jihudi Ameipi amonit atum Gamaliel alam kroihurlo.

⁴⁰Halatum ketoitang atum aphan arlo hangdetsi pachok-lo, lapen Jisu amen pen puthot thanrinon pu hukum pisi lophlot-lo.

⁴¹Ketoitang atum Jihudi atum Ameipi pen damsi aning arong chepilo, pima halatum Jisu pen apot kesung kechechakji a-ot do pusi Arnam halatum aphan lakhalo.

⁴²Lapen arnivangta Kardomhemthepi arlo lapen adon adon damsi Jisu helo Khristolo pu kethan lapen kepachethang o-edet-lo.