Read Karbi AKAM 6 Bible Online

AKAM 6 - Karbi bible

AKAM 6

¹Halabangso arni hei hei ahut Sangho atum aphai nangbatbomlo. Ansi Grik alam keningje a-Jihudi atum hala Ibri alam keningje a-Jihudi atum pen aning keche-oi dolo. Pima kecho ahormu keron ahut Grik alam keningje a-Jihudi ahemepi atum aphan langponpamemedet pusi Grik alam keningje a-Jihudi atum hala Ibri alam keningje a-Jihudi atum aphan dinlo.

²Lasi ketoitang bangkrehini atum hala kekroitang atum an aphan hangpetsi pulo, “Nelitum Arnam alam kepachethang akam che-osi keru kethai akam keklem ke mesen kali.

³Lasi kortemarli atum, nanglitum langra, lapen mathara nanglitum angbong pen anong kejumesen, Karjong Kangthir pen lapen gian pen keplengset amonit bang throksi ingvainon. Nelitum latum aphan labangso akam aphan batpo.

⁴Anke nelitum methang ke kadokave ahutta kardom lapen kethan-kepachethang akam aphansi chehodai pamepo.”

⁵Halatum kadokaveta labangso alam aning dok-hurlo, lasi halatum kekroi thirklong, lapen Karjong Kangthir pen keplengset abang Stephan aphan, lapen Philip, Prokoras, Nikanor, Timon, Parmenas, lapen Nikolas aphan ingvailo. La Nikolas ke Antiok arongsopi kedo, Jihudi kalidet amonit-lo, lapen labangso aphrangke alangli Jihudi adhoromsi endunlo.

⁶Alanglitum la kangvaitang amonit atum aphan ponsi ketoitang atum angno parjap-lo, lapen ketoitang atum Arnam ardomsi latum aphuthak ari bat-lo.

⁷Arnam alam ansose chethang-bomlo. Jerusalem angbong sangho atum aphai batbomlo, lapen kurusar ake-ongpi atumta labangso akekroi deng-lo.

⁸Ansi Stephan ke Arnam akangjinso mate karjong pen plengsetsi lapen jakong plengsetsi monit atum ang-bong kemanghumeme akam lapen kematha abidi kejutdet akam hei hei klemlo.

⁹Bonta ban pen kejoktang a-Jihudi atum (Atheke, lapusonsi alam chethang-lo) asinagog abangphu atum, atheke Sairene lapen Alekjendria a-Jihudi atum alangliphan thurlo. Latum lapen Silisia, Asia adet pen kevang a-Jihudi atum Stephan pen lam kechedanji pangcheng-lo.

¹⁰Bonta Stephan Karjong pen lapen gian pen kepu alam halatum khang un-edet-lo.

¹¹Ansi halatum monit atum aphan aning rungsi papulo, “Labangso amonit Moses lapen Arnam aphan kepinrem alam keningje netum arju-long-lo.”

¹²Lasonsi halatum rat atum aphan, akesar atum aphan lapen aron thekser atum aphan chorung-lo. Halatum Stephan aphan nepcheksi Jihudi atum Ameipi angno ponlo.

¹³Ansi halatum alangli lamjir kechobei alam kepathanjisi monit vanlo. Halatum pulo, “Labangso amonit kaiketa Kardomhemthepi Kangthir lapen Moses Aron kephangno alamsi ningjelo.

¹⁴La Najareth a-Jisu ke Kardomhemthepi pavirdetji lapen Moses ekepitekang aron atang hei hei lar-etji pu labangso amonit keningje nelitum arjudun long-lo.”

¹⁵Jihudi atum Ameipi along kangniphrong atum an Stephan aphan langphrongsi alangli mahang ke sining apherangke amahang asonthak thak thek-long-lo.