Read Karbi AKAM 7 Bible Online

AKAM 7 - Karbi bible

AKAM 7

¹Kurusar Kethenei abang Stephan aphan arjusi pulo, “Labangso alam ahokma?”

²Stephan pulo, “Kortemarli atum, lapen po marli atum, nanglitum neli lam arjutha! Ephusar Abraham Haran arongsopi kedodam aphrang, alangli Mesopotamia adet kedo ahutsi alangliphan adak-atur a-Arnam cheklang-lo.

³Lapen Arnam alangliphan pulo, ‘Nangmethang adet lapen nangmethang adon-arap che-otekangra ne nangphan kepaklangji adet-le damnon.’

⁴Lasi alangli amethang adet pen damsi Haran arongsopi dodamlo. Abraham apo thilot aphi Arnam alangliphan, non nanglitum kedobom adet along padamlo.

⁵Arnam Abraham aphan labangso adet asapta pachepahemphu longledet-lo: akengpak kebivongji adim anta pachepahemphu longledet-lo. Bonta Arnam Abraham aphan labangso adet piji, lapen Abraham aso asu atum la chepahemphu longji pusi chak-lo. Arnam labangso alam kechak ahut Abraham asomar avelang.

⁶Arnam alangliphan kepu lapuson helo, ‘Nangso nangsu atum kaprek adet do damji. Hadak latum ningkan pharo phli an ban plangsi kesung keboi chechakji.

⁷Bonta halatum aphan ban kepaplang amonit atum aphan ne ingsaiji, lapen aphisi latum halabangso adet pen nangbarsi labangso adim neliphan ingduk-ardomji.’

⁸Ansi kechechak angthek ben ason Arnam Abraham aphan reng-rot ke-en aron pilo. Abraham Isaak apo plang-lo. Lasi Isaak amahang thekdet aphi ni nerkep arni Abraham Isaak aphan reng-rot pilo. Isaakta Jakob apo plang-lo, lapen alangli Jakob aphan reng-rot pilo. Jakobta hala ephusar bang krehini atum apo plang-lo, lapen alangli halatum aphan reng-rot pilo.

⁹“Jakob asopo atum amethang akorte Joseph aphan lang un-elo, lapen ban kepaplangjisi Ijip atum aphan jordet-lo. Bonta Arnam alangli long dolo,

¹⁰lapen alangliphan keduk kesung an angbong pen pajok-lo. Arnam Joseph aphan gian pilo, lapen Ijip adet arecho Pharaoh angno kangjinso palong-lo. Recho alangliphan det adang a-Govornor lapen recho ahem ahemphu paplang-lo.

¹¹Ansi Ijip adet lapen Kanaan adet adang an akhim thurlo, lapen monit atum sungpik-lo. Ephusar atum kecho ahormu thangnatta longthekthedet-lo.

¹²Jakob Ijip adet Sok do pu arjulongsi asopo atum aphan, atheke ephusar atum aphan aphrang aphong hadak toilo.

¹³Halatum hadak batai hini aphong kedam ahut Joseph amethang akorte atum aphan chepachinilo, lapen lasi Ijip adet arechota Joseph ahem asangho atum aphan chinilong-lo.

¹⁴Lasi Joseph apo Jakob, lapen ahem asangho do-an, atheke bang throksi kep-ra pho amonit atum aphan Ijip adet kevangji aphan phalo.

¹⁵Ansi Jakob Ijip adet damlo. Alangli lapen asomar atum hadaksi thikoilo.

¹⁶Halatum abang arpum Sekem arongsopi along ponsi Abraham, Hamor asopo atum pen tangka pen kenam atipit alongsi pip-lo.

¹⁷“Arnam Abraham aphan kechak alam chekokji dok dok ahut Ijip adet angbong ilitum amonit atum aphai chan-olo.

¹⁸Aphisi Joseph aphan kechinine abang Ijip adet recho cholo.

¹⁹Alangli ilitum aphusar atum aphan bidi kehingno pen klemlo, lapen halatum aphan cheneksi halatum asomar, pinso a-oso atum kereng longledetji aphan ingtan var-et-lo.

²⁰Halabangso ahutsi Moses amahang thek-lo. Alangli arje mepik-lo. Alangli-phan apo ahem chiklo jonthom an lanalo.

²¹Alangliphan hem angtan kebidam ahut recho asopi alangliphan ponsi amethang akur cheponlo, lapen alangliphan amethang asopo asonthotsi pathe pading-lo.

²²Ijip atum agian alam an alangliphan thanpet-lo. Alangli lam, kam anatta inut thedung abang cheplang-lo.

²³“Moses arta ningkan phlikep ahut alangli Israel akorte atum aphan kelangdamjisi aning mathalo.

²⁴Ansi inut Ijip amonit Israel amonit inut aphan aduk kanghoi alangli thek-long-lo. Lasi alangli dunsi Israel amonit aphan rapdunlo, lapen Ijip amonit aphan alar huisi pathilot-lo.

²⁵Israel atum aphan kepajokji aphansi Arnam Moses aphan ingvaitang-lo pu Israel atum chiniji pusi alangli mathalo, bonta halatum la chininedet-lo.

²⁶Puthot arni alangli bang hini a-Israel atum kechebohong thek-long-lo. Alangli halatum angbong aning kechepangsamji aphan bor-isi pulo, ‘Arjuthaho, komarli atum! Nangtum ke kortetelo. Nangtum kopi chonghoisi lason chebohong-loma?’

²⁷Bonta hala anut kaprek aphan kepasungbom abang Moses aphan ingbailaksi pulo, ‘Nangphan komatsi netum ahemphu lapen netum aphan kangsai abang nangpaplang-lo?

²⁸Patumi nang inut Ijip amonit aphan kepathi asonthak thaksi nephanta kepathiji ning hang-loma?’

²⁹Moses labangso alam arjulongsi Ijip adet pen katjuisi Midian adet dodamlo. Hadak alangli asopo banghini dolo.

³⁰“Ningkan phlikep aphi Sinai anglong adung kejejangtang ajo ingsu arong along kekar-ang ame angkang angbong sining apherangke inut Moses aphan cheklang-lo.

³¹Moses la thek-longsi manghuhak-lo, lapen la kelangpamejisi ingsu arong adung patebok-lo. Bonta alangli Hemphu ase arjulong-lo:

³²‘Nangphusar atum a-Arnam nehelo; Abraham, Isaak lapen Jakob a-Arnam nehelo.’ Lasi Moses kephere pen a-ok klemhursi kelangdingji haihedet-lo.

³³Lapen Hemphu alangliphan pulo, ‘Nang keng-op chephloknon, pima nang karjap adim ke kangthir alonglelo.

³⁴Ijip adet nerat atum akeduk ne thek-long-lo, lapen halatum akar-em ne arjulong-lo. Halatum aphan kepajokji aphansi ne nanghirlo. Tangte non ne nangphan Ijip adet nangtoipo.’

³⁵“Labangso a-Moses aphansi Israel amonit atum chakchedet-lo. Halatum alangliphan pulo, ‘Nangphan komatsi netum aphuthak kepangri abang, lapen kangsai abang nangpaplang-lo?’ Hala ingsu arong along kekar-ang ame angkang along kecheklang, sining apherangke akerap pen ajok Moses halatum aphan kepangriji lapen kepajokji aphansi Arnam la Moses aphan nangtoilo.

³⁶Alangli halabangso amonit atum aphan Ijip adet pen japonlo, lapen alangli Ijip adet along, Talo Ke-er along lapen Kejejangtang ajo ningkan phlikep an kemanghumeme akam lapen kematha abidi kejutdet akam hei hei klemlo.

³⁷‘Arnam nangtum aphan nangtum akorte angbong pen ne son thak thak inut Arnam amontri nangpaklangji’ pu Israel atum aphan kepu abang Moses helo.

³⁸Hala kejejangtang ajo kechingrumpet a-Israel atum pen kedo rap rap abangta alangli helo. Hadak alangli ephusar atum pen lapen hala Sinai anglong along alangliphan kepu abang, sining apherangke pen dorap rap-lo, lapen nanglitum aphan nangkepiji aphan alangli Arnam akereng-et alam long-lo.

³⁹“Bonta ephusar atum alangliphan kekroiji aning hanghedetsi halatum adung pen alangliphan ingbailap-lo, lapen halatum Ijip adet kechevoithujisi aning hang-lo.

⁴⁰Lasi halatum Aaron aphan pulo, ‘Netum aphan nekeja ponji aphan netum aphan arnam hei hei nethippinon. Hala Ijip adet pen ekevan abang, Moses ke kopi cheplangdet-lone, netum chinine.’

⁴¹Ansi halabangso ahut halatum chainong alo a-arjan thip-lo, labangso arjan aphan thok-lo, lapen amethang ari pen keselam amar aphan kero karchojisi chojun amei bilo.

⁴²Lasi Arnam halatum pen chetevarsi, lapen sining achiklo longso hei hei aphan keparchoji aphansi Arnam halatum aphan obup-lo. Lake hala Arnam amontri atum ketok aloh along ketok asonthot-lo, atheke hadak tok-lo, ‘Oh Israel amonit atum! Nangtum kejejangtang ajo ningkan phlikep kedo ahut nephansi marat api athok hei hei thok-loma?

⁴³Nangtum Molek pu a-arnam ape ahem, lapen Rephan pu chiklolongso a-arnam a-arjansi nangtum rungsi ponlo. Lasi ne nangtum aphan Bebilon apar akehelo adet nangtoipo.’

⁴⁴“Kejejangtang ajo ephusar atum along Arnam kedo ape ahem dolo. Arnam Moses aphan kepu lapen kepaklang asonthotsi Moses labangso ape ahem roilo.

⁴⁵Aphi ephusar atum labangso ape ahem halatum apo atum pen long-lo, lapen Arnam halatum angno pen akhei kaprek kaprek atum aphan arphlungsi halatum Joshua pen pen halatum adet damsi kechepahemphu ahut halatum labangso ape ahem ponlo. David arni ahut anta labangso ape ahem hadak dolo.

⁴⁶David Arnam akangjinso longsi Jakob a-Arnam kedoji adim kekimpilongji aphan Arnam aphan choningrilo.

⁴⁷Bonta Solomonsi alangliphan labangso ahem kimpilo.

⁴⁸“Bonta kangtuinei Arnam ke monit atum ari pen kekim ahem along dode. Arnam amontri kepu asonthotsi,

⁴⁹‘Siningke ne kangni anghoilo, lapen pirthe ke nekengpak anghoilo. Nangtum nephan kopuson ahem nekimpithekjima? Ne kedo adim konatma?

⁵⁰Nemethangsi la kadokave amar selamlo, kalima?’

⁵¹“Mai, nangtum ko-an keching-kinodak atum loma? Nangtum aning ke hala Arnam aphan kekroikre atum aning-lo. Arnam alam aphan nangtum ano ingthongjong-lo! Nangtumta nangtum aphusar atum asonthot-lo; nangtumta Karjong Kangthir aphan khangverlo.

⁵²Nangtum aphusar atum Arnam amontri inutbak aphan cheneknedet, doloma? Hala Arnam dhoromipet Aban abang kevangji alamjir aphrang pen kethan atum aphan, atheke Arnam apherangke atum aphan halatum pathikoilo. Lapen nonke nangtum la dhoromipet Aban aphan hotur arideng hodaisi pathilot-lo.

⁵³Nangtumsi sining apherangke atum arideng pen Arnam Aron kelong atumlo, setta nangtum la kroikredet-lo!”

⁵⁴Kangsai amei abangphu atum labangso alam arjulongsi jasemet aning thisi Stephan aphan aso chingkrit-lo.

⁵⁵Bonta Stephan Karjong Kangthir pen plengsetsi, lapen sining anat langdingsi Arnam adak atur lapen Jisu ke Arnam ar-e anat karjapther alangli thek-long-lo.

⁵⁶Ansi alangli pulo, “Langtha! Neli sining kangpudang lapen Monit a-Sopo Arnam ar-e anat karjapther thek-long-lo!”

⁵⁷Kangsai Ameipi abangphu atum jasemet hangsi ari pen ano chetok-lo, lapen halatum hala mamat alangli dung vangpaksi,

⁵⁸alangliphan rong-sopi angtan chithurponlo, lapen arlong pen arbulo. Haki atum Sol pu inut ariso akeng-risi amethang methang ape chebilo.

⁵⁹Halatum arlong pen karbu un ahut Stephan hangsersi pulo, “Hemphu Jisu, nekarjong dengtha!”

⁶⁰Anke alangli akengphu patongruisi ase kethe pen hangsi pulo, “Hemphu, labangso apap apot nang halatum aphuthak adai padori.” Alangli labangso alam pudetsi thilot-lo.