Read Karbi AKAM 8 Bible Online

AKAM 8 - Karbi bible

AKAM 8

¹Lapen Sol jokta alangliphan kepathi ke aning hangdunlo. Halabangso arni pen mamat Jerusalem arongsopi kedo amondoli mate kroi-asong aphan jasemet kechenekji pangcheng-lo. Ketoitang atum aphan apar ke, kekroitang atum an aphan Judia adet lapen Samaria adet adang an papratseilo.

²Dhoromi amonit penang atum Stephan abang arpum pipdamlo, lapen alangli pen apot jasemet chiru chernap-lo.

³Bonta Sol ke mondoli kepavirjisi bor-ilo. Alangli adon adon damsi pinso-arloso atum aphan chethurponsi phatek bengdamlo.

⁴Hala kepratsei, kekroitang atum bithe bitha damsi than-Pachethangponbomlo.

⁵Philipta Samaria adet kedo akethenei arongsopi damsi hadak kedo amonit atum aphan Khristo alamjir thanlo.

⁶Philip kethan alam arjulongsi lapen alangli kemanghumeme akam keklem thek dunlongsi halatum alangli kethan alam arjudun pamelo.

⁷Kangthirthe ahi-i kepho amonit penang atum pen hi-i atum jasemet hangsi nangbarlo. Kethiklak lapen akeng ketekok penang atum medet-lo.

⁸Lasi halabangso arongsopi kedo atum aning arongparlo.

⁹Hadak Simon pu inut amonit dolo. Alangli maja kanghoi akam klemsi Samaria amonit atum aphan pamanghuphrong-lo. Alangli ke inut thedung amonit-lo pusi alangli chekrong-lo.

¹⁰Thedung lapen bihek amonit atum anta alangli kepu alam arjudunsi pulo, “‘Jakong Kethe’ pu a-Arnam ajakong alangli helo.”

¹¹Halatum alangli kepu alam arjudun-hurlo, pima arni dingklui pen alangli maja kanghoi akam klemsi halatum aphan pamanghuphrong-lo.

¹²Bonta Philip Arnam a-Rat lapen Jisu Khristo alamjir a-Birta Keme kethan alam arjulongsi pinso lapen arloso atum kroilo, lapen baptisom enlo.

¹³Simon jokta kroilo, lapen alangli baptisom endet aphi Philip along dunkrilo, lapen kematha abidi jutdet akam lapen kemanghumeme akam hei hei thek dunlongsi manghuhak-lo.

¹⁴Ansi Samaria adet amonit atum Arnam alam deng-lo pu arjulongsi Jerusalem kedo, ketoitang atum Pitor lapen Jon aphan halatum along toilo.

¹⁵Halatum hadak nanglesi kekroitang atum Karjong Kangthir kelongji aphan Arnam ardomlo.

¹⁶Pima halabangso ahut anta halatum badu aphuthakta Karjong Kangthir hirhelang. Halatum aphan Hemphu Jisu amen pensi baptisom pichotlang.

¹⁷Ansi Pitor lapen Jon halatum aphuthak ari bat-lo, lapen halatum Karjong Kangthir long-lo.

¹⁸Ketoitang atum ari kebat pen ajok kekroitang atum aphan Karjong Kangthir kepi thek dunlongsi Simon ke Pitor lapen Jon aphan tangka pisi pulo,

¹⁹“Neli komane abang aphuthak neli ri bat-lote, halabangso abang Karjong Kangthir kelongjile neliphan jakong nepitha.”

²⁰Bonta Pitor thakdunsi pulo, “Nangli pen nangli tangka pavirnang! Pima tangka pen Arnam adan nam unji pusi nangli mathalo!

²¹La nelitum keklem akam along nangli nangli deng, kalite nangli pharman ave. Pima Arnam angno nangli ning ahok kali.

²²Tangte nangli labangso akehingno akematha pen ning chiruinon, lapen nangli lason akehingno akematha apot diya kelongjile Hemphu aphan choningrinon.

²³Pima nangli ning hodak-lo, lapen pap pen plengset-lo, lake neli chinilo.”

²⁴Pitor lapen Jon aphan Simon thakdunsi pulo, “La nanglitum kepu alam angbong isi natta neliphan keplangpledetjile Hemphu aphan choningritha.”

²⁵Pitor lapen Jon haki pidet aphi, lapen Hemphu alam than-pachethangdet aphi halatum Jerusalem chevoithulo. Tovar kedam un ahut halatum Samaria adet panangbak arong birta keme pachethang ponlo.

²⁶Ansi Hemphu apherangke inut Philip aphan pulo, “Thurra, nitur anat, Jerusalem pen Gaja arongsopi kedam atovarle damnon.” (Nonke monit atum labangso atovar chehelat-lelo.)

²⁷Lasi Philip thursi damlo. Lapen tovar kedam un ahut inut Ethiopia kasi-entang aphan chetong-lo. Alangli ke Kandasi pu Ethiopia adet arechopi atangka apuru kelang lapen kerimpi abang-lo. Alangli Jerusalem arongsopi along Arnam aphan ingduk ardomdamlo,

²⁸lapen halabangso ahut ke alangli hem nangchevoisi amethang ahemkonglong athak ingnilunsi Arnam amontri, Isaiah ketok aloh porhebomlo.

²⁹Ansi Karjong Kangthir Philip aphan pulo, “Nang damra halabangso ahemkonglong along dunnon.”

³⁰Philip katponsi halabangso ahemkonglong along dunlo. Halabangso amonit Isaiah aloh keporhekong alangli arjulong-lo. Alangli labangso amonit aphan arjulo, “Nangli keporhe alam athe nangli chiniloma?”

³¹Alangli pulo, “Mai, komane abangle neliphan than pachininete neli la kopusonsi chini-un poma?” Lasi alangli Philip aphan hangsi hemkong-long athak alanglidung kangniji aphan choningrilo.

³²Alangli keporhe hastro angdeng lahelo: “Kethuji aphan kepon abiresak aso asonthak thaksi, lapen angmi kangtip ahut kangrengrepin abiresak asonthak thaksi, alangli lam ethenatta ningjejedet-lo.

³³Alangliphan pabihek-lo, lapen athikpet pen ingsaisedet-lo. Alangli ove alam komatsi thanjima? Pima alangli pran pirthe athak pen entang-lo.”

³⁴Hala kasi-entang abang Philip aphan arjulo, “Neliphan nethantha, Arnam amontri labangso alam ke komat alamjirsi pudamloma? Amethang alamjirma, mate komane abang alamjirma?”

³⁵Ansi Philip halabangso ahastro angdeng pen kethan pangcheng-lo. Alangli la kasi-entang aphan Jisu alamjir a-Birta Keme thanlo.

³⁶Alanglitum tovar dambom dambomsi elong lang kedo adim nanglelo. Lasi halabangso kasi-entang abang pulo, “Langtha! Ladak lang dolo. Neli baptisom ke-en un-edetji kopi ason dolangma?”

³⁷Philip alangliphan pulo, “Nangli jongsi nangli ning aklong pen kroilo tangte, nangli baptisom en setta chok-lo.” Alangli thakdunlo, “Neli kroilo, Jisu Khristo ke Arnam a-Sopolo pu neli kroilo.”

³⁸Ansi kasi-entang abang hem-konglong kepasangji ahukum pilo. Philip lapen alangli lang sunlo, lapen Philip alangliphan baptisom pilo.

³⁹Bonta alanglitum lang pen kora nangkarlu ahut Hemphu a-Karjong Philip aphan pondet-lo. Kasi-entang abang alangliphan puthot thek-longledet-lo. Bonta alangli ning arong pen amethang atovar chedamlo.

⁴⁰Ansi Philip Asdop pu arongsopi along cheklangdamlo. Alangli hadak pen barsi kadokave arongsopi an damtup-lo, lapen Birta Keme pache-thang-ponbomsi Sijeria arongsopi nanglelo.