Read Karbi ROM 1 Bible Online

ROM 1 - Karbi bible

ROM 1

¹Jisu Khristo aban, lapen ketoitang abang, atheke Arnam a-Birta Keme kepachethangji aphan Arnam kangvaitang lapen kephatang abang, neli Polsi labangso aloh tok-lo.

²Arnam amethang amontri atum pen ajok labangso a-Birta Keme alam aphrang pen chak-lo, lapen la kechaktang alam halatum hastro kangthir along tok-lo.

³Labangso a-Birta Keme ke Arnam a-Sopo, e-Hemphu Jisu Khristo alamjirlo. Ok anat ke alangli inut David asulo,

⁴lapen alangli long kedo Arnam Kangthir a-ot anat penke alangli Arnam a-Sopolo. Arnam alangliphan kethitang atum angbong pen pathursi ajakong paklang-lo, lapen labangso pen ajok alangli ke Arnam a-Sopolo pu paklangdak-lo.

⁵Kadokave akhei amonit atum aphan kepakroiji lapen ahukumta kepakroiji aphan neliphan Jisu Khristo akam kepaklemjisi Arnam amethang akangjinso pen Jisu Khristo pen ajok neliphan ketoitang abang nepaplang-lo.

⁶Lake nanglitum aphan, atheke Jisu Khristo asangho kepaplangjisi Arnam kephatang, la Rom arongsopi kedo atum aphanta lo.

⁷Lasi nanglitum aphan, atheke Arnam kechinghon, lapen kangthir atum keplangjisi Arnam kephatang, la Rom arongsopi kedo atum aphan neli labangso aloh tok-lo. E-Po, Arnam lapen e-Hemphu Jisu Khristo nanglitum aphan kangjinso lapen ning kangsam nangpapinang.

⁸Aphrangsi neli nanglitum pen apot Jisu Khristo pen ajok Arnam aphan chorolo. Pima nanglitum akekroi alam pirthe adangta chethangphlup-lo.

⁹Neli Arnam a-Sopo a-Birta Keme than pachethangsi neli ning aklong pen Arnam aphan klempibomlo, lake Arnam neli hakilo. Lapen neli kardom abataitinta nanglitum aphan chematha-ponverlo, lake Arnam chinilo.

¹⁰La an arni aphi non Arnam amethang aning kehang pen neliphan nanglitum along kepavang unji aphansi neli Arnam aphan choningrilo.

¹¹Pima karjong anat nanglitum ajakong kangtangrak thekji aphan neli nanglitum aphan kopine karjong adan nangkepijisi nanglitum along kevangji aphan ning hang-olo.

¹²Neli kepudam alam lahelo, labangso pen ajok ilitum cherap seroi longpo, atheke neli methang akekroi pen ajok nanglitum aphan, lapen nanglitum akekroi pen ajok neliphan ning pathe unpo.

¹³Kortemarli atum, nanglitum chinitha: neli nanglitum along kevangji aphan abatai batai chesik-lo setta kopine ason pen ajok vangthekthedet titilo. Jihudi kalidet, akaprek atum angbong neli athe kelong asonthotsi nanglitum angbongta athe kelongji aphan neli ning hang-lo.

¹⁴Pima Grik lapen Grik kalidet atum, giani lapen keludet atum aphan neli keklempi nangji adeng dolang.

¹⁵Lasi nanglitum la Rom arongsopi kedo atum aphanta neli Birta Keme kepachethangji ingtung-olo.

¹⁶Birta Keme pen apot neli therak-re: Pima kekroi abang aling aphan, aphrangke Jihudi atum, labangso aphisi Jihudi kalidet atum aphan Birta Keme ke Arnam akepajok ajakong-lo.

¹⁷Arnam monit atum aphan kopusonsi dhoromi paplang-loma, lake birta keme paklangdak-lo: lake kecheng pen kejut anta kekroi pen ajoksi plang-lo. Lake hastro along ketok asonthot-lo, atheke hastro along tok-lo, “Kekroi pen ajok dhoromi keplang abang rengji.”

¹⁸Monit atum apap lapen ake-hingno akamsi Arnam ahok alamjir akepachinidakji aphan khangthipsi la pachinidak un-edet-lo. Lasi halatum apap lapen akehingno akam apot sining angsong pen Arnam aning kethi halatum aphuthak klolo.

¹⁹Pima monit atum Arnam alamjir kechini unji abidi ke halatum aphan klangdak-lo. Arnam amethangsi la halatum aphan paklangdak-lo.

²⁰Arnam pirthe kepinchong ahut penta, kethek-long un-edet Arnam a-ot, atheke Arnam kejut un-epin ajakong lapen a-ot thek-longdak-lo. Monit atum Arnam kepinchong amar hei hei along lahei hei thek-long unlo. Lasi halatum kechethakdunji atovar avelo.

²¹Halatum Arnam aphan chinilo setta alangliphan kepi nangji anong pipedet-lo, lapen kerota pipedet-lo. Tebonta halatum akematha ke ale kave saidelo, lapen halatum kematha pamethekthe aning ke ingtingthip-lo.

²²Halatum giani pusi chepulo, bonta halatum ke kelu atumlo.

²³Halatum kereng-et Arnam aphan ingduk ardomdesi kethidetji api, atheke monit, vo, marat api, pherui hei hei asonthot keselam akumlin aphansi ingduk-ardomrong-lo.

²⁴Monit atum lapuson akelu apotsi, Arnam halatum aphan odunbupsi halatum amethang aning kehang aling kangthirthe akam lapen lahin lahin aketherakmeme akam cheklem setta Arnam halatum aphan panungdunkuk-lo.

²⁵Halatum Arnam alamjir ahok alam kroikresi ahok-he alam kroirong-lo. Halatum Arnam, atheke kepinchong abang aphan ingduk-ardomdesi Arnam kepinchongtang amar aphansi ingduk-ardomrong-lo. Bonta la Kepinchong a-Bang aphansi kejut un-e akai anta ro-archo nangji apot-lo! Amen.

²⁶Labangso apotsi halatum aning kehang aling aderi-mate akamle klem setta Arnam halatum aphan panung-dunkuk-lo. So-arlo atumta aronre pensi amethang hijan angbong akhat kave akam cheklemlo.

²⁷Lasonthak thaksi pinso atumta arloso penke a-ok-avi kechepapho akam klemklesi pinso hijan angbong aderi-mate kedo akam kecheklemji aphan halatum aning me kangdak ason ingdak-lo. Lapusonsi halatum hijan angbong ketherakmeme akam cheklemlo, la apotsi halatum amethang methang akechokche akam apot halatum kepho nangji aduk pholo.

²⁸Monit atum Arnam alamjir ahok agian amethang aning arlo kechebiji aning hanghedet apotsi, halatum aning kehingno pen a-ot-e akamle klem setta Arnam halatum aphan panungdunkuk-lo.

²⁹Halatum akai angbong ot kelangno akam an, kehingno akam an, mekplengple akam an lapen kechelang selet akam an halatum klempet-lo. Halatum angbong kechelang selet, monit apran ke-en, kecharvo, kepa-chobei lapen kechelang un-e akam hei heisi plengset-lo.

³⁰Halatum lahin lahin chesorsarlo lapen anong chejolo. Halatum ke Arnam aphan kehijim lapen kepinrem, ane kechepathe lapen kechepindak atumlo; halatum aphrang apar kehingno keklem muchotji aphan aning mathalo; halatum api apo alam kroikre;

³¹halatum kechoklem hingno, halatum amethang kechechak alam ateng klemkle, lapen halatum anut kaprek atum aphan akanghon lapen akangjinso ave.

³²Lason keklem atum kethi nangji a-ot do pusi Arnam aron thanlo pu halatum chini. Tebonta halatum amethang mamat lahei hei akam keklembom anchot kali, lahei hei akam keklem atum aphanta mesen pusi rodunlo.