Read Karbi ROM 10 Bible Online

ROM 10 - Karbi bible

ROM 10

¹Korte marli atum, neli methang amonit atum kejok kelongji aphan neli ning hangpik-lo, lapen neli halatum aphan Arnam angno choningripiverlo!

²Halatum Arnam aphan matha-elo pu neli haki chodun un, bonta halatum kechinipame penle kematha-e kali.

³Arnam monit atum aphan dhoromi kepaplang aron halatum chininedetsi dhoromi keplangji aphan amethang methang abidi pen kebi aron kepathirjisi bor-ilo. Lasi Arnam monit aphan dhoromi kepaplang aron halatum dengdedet-lo.

⁴Pima kekroi abangphutin dhoromi keplang longji aphan Khristosi Aron pajutdet-lo.

⁵Monit atum Aron kekroi pen ajok dhoromi keplang alam Moses ketok lapuson helo: “Aron ahukum ateng keklem abangphutin labangso Aron pen ajok rengji.”

⁶Bonta kekroi pen ajok dhoromi keplang alam hastro kepudam lapuson helo: “Sining angsong matsi arlu dampoma pu nangmethang aning arlo chepuri.” (Atheke, Khristo aphan nangkepahirji aphan).

⁷Lapen ke, “Aklong kave aherangpi along matsi hirdamjima puta puri.” (Atheke, Khristo aphan kethitang atum angbong pen kevanji aphan.)

⁸La hastro kepudam alam lahelo: “Arnam alam ke nanglitum adungsi dolo, nangde nangingtur along lapen nangning arlosi dolo.” Netum kepachethang akekroi alam lahelo.

⁹Nanglide, nangli ingho pen “Jisu helo Hemphulo,” pu chekobirlote, lapen Arnam alangliphan kethitang atum angbong pen pathursi parengthulo pule nangli ning arlo pen kroilote nangli jokji.

¹⁰Pima monit atum aning pen kroisi dhoromi plangji, lapen ade-angtur pen chekobirsi jokji.

¹¹Hastro pulo, “Alangliphan kekroi abang aling aphan ke patherak-re-detji.”

¹²Labangso alam ke kadokave aphansi pudamlo. Pima Jihudi lapen Jihudi kalidet atum angbong thangnat akeprekta avelo, atheke kadokave a-Hemphu inutpet, lapen alangliphan kehang atum an aphan alangli ahirjume pi-o.

¹³Atheke hastro pulo, “Hemphu amen aphan kehang abangphutin jokji.”

¹⁴Bonta halatum jongsi kroikre tangte, halatum kopusi alangliphan hangthekjima? Lapen halatum jongsi alangli lamjir arjulongle tangte, halatum kopusi kroithekjima? Lapen alamjir thanthete halatum kopusonsi arjulongjima?

¹⁵Lapen toite-te kopusi thandam thekjima? Atheke, hastro along ketok asonthotsi, “Birta Keme kevan atum akam ke ko-an alon kedo!”

¹⁶Bonta halatum kadokave amat Birta Keme kroipettang-lo, lapu kali. Isaiah amethangsi pulo, “Hemphu, netum alam matsi kroiloma?”

¹⁷Tangte lahelo, alam karjulong pen ajoksi monit atum kroithekji, lapen Khristo alamjir kepachethang pen ajoksi monit atum la arjulongji.

¹⁸Bonta neli arjulang: Tangte labangso akepachethang alam halatum arjulonglelangma? Lapu kali! Atheke hastro pulo: “Halatum ase pirthe adangta umphlup-lo, halatum kepu alam pirthe kejut hei hei anta ledampet-lo.”

¹⁹Lapen neli arjuthupo: Tangte Israel amonit atum chininedetma? Mosessi labangso alam thakdun paphrang-lo: “Khei binong kalidet amonit atum pen ajoksi ne nangtum aphan kelang-un-e atum nangpaplangji, lapen keludet akhei atum pen ajoksi ne nangtum aning pathiji.”

²⁰Lapen Isaiah ansose phereresi pulo, “Nephan keriredet atumsi nephan long-lo, nephan kehumrire atum aphansi ne cheklang-lo.”

²¹Bonta Israel atum alamjir alangli lapusonsi pulo, “La kekroikre lapen kechingkinodak arat aphan ne losini neri deng-elo.”