Read Karbi ROM 11 Bible Online

ROM 11 - Karbi bible

ROM 11

¹Tangte neli arjulang: Arnam amethang amonit atum aphan obup-loma? Lapu kali! Neli methangta Israel amonit, Abraham asu lapen Benjamin akur amonit-lo.

²Arnam aphrang pen kangvaitang, amethang amonit atum aphan obup-lo, lapu kali. Hastro along ketok, Elija Arnam angno Israel atum apharman kechoningri alam nanglitum chinilo, kalima?

³Atheke Elija pulo, “Hemphu, halatum nang montri atum aphan pathikoilo, lapen nangdovan hei hei phri-et-lo; non kedo ke ne inutpet-lo, lapen halatum nephanta kepathijisi bor-ibomlo.”

⁴Bonta Arnam alangliphan kopisi thakdunloma? Arnam thakdunsi pulo, “Kechobei arnam, Baal aphan kangdukde pinso amonit bang suri throksi aphan ne nemethang akam aphan chebilo.”

⁵Lasonthak thaksi non ahutta Arnam amethang akangjinso pen kangvaitang penang an amonit dolang.

⁶Arnam halatum aphan amethang akangjinso pensi ingvailo, halatum keklem akam apot kali. Pima jongsi monit atum amethang akam apotsi Arnam halatum aphan ingvailo tangte, alangli akangjinso ke ahok akangjinso kalilo.

⁷Tangte kopilo? Israel atum ke amethang keri ason longledet-lo. Arnam kangvaitang, ake-ong-e asong atumsi la long-lo; akaprek atum an aphan ke aning pangtangrak-lo.

⁸Atheke hastro along tok-lo, “Arnam halatum aning angthin pabuikluihak-lo; pini arni anta halatum amek pen thek-longle, ano pen arjulonglelo.”

⁹Lapen David pulo, “Halatum Achojun a-Mei ke halatum aphan ketot apham lapen alan lapen halatum aphan kepajang ahilik lapen aduk kanghoi-i ason paplang nang!

¹⁰Halatum kethek-longledetji aphan halatum amek pangtingthip nang, lapen halatum aphan kaike ahutta kesung anghor pen pamoikukjuknang.”

¹¹Tangte neli arjulang: Jihudi atum kepatekung ahut halatum chingkoisi virdet khangjang-loma? Lapu kali! Bonta Jihudi atum apap pen apotsi Jihudi kalidet atum aphan kepalang un-ejisi Jihudi kalidet atum along kejok vang-lo.

¹²Jihudi atum apap pen apotsi pirthe athak hirjume vang-olo, lapen Jihudi atum karjong anat akedukdet pen apotsi Jihudi kalidet atum along hirjume vang-olo. Anke mo Jihudi atum anta kejok long lote, ko-an ahirjume ongpo!

¹³Nonke neli nanglitum, Jihudi kalidet atum aphan nangpulang: Neli Jihudi kalidet atum angbong ketoitang abang keplanglong apot chepindakpo.

¹⁴Neli methang akhei amonit atum nangpalangdun un-esi latum angbong pen penang atum aphan pajok unji tahai pusi neli mathalo.

¹⁵Pima Arnam halatum aphan kekoirok pen ajok pirthe amonit Arnam pen chepajirpo long-lo. Tangte mo halatum aphan dengdet-lote kopi cheplangpo! Lake kethitang atum kerengthu asonthak thakpo.

¹⁶Lapen Arnam aphan kepanong, aphrangsi ahim achet jongsi ingthir-et-lo tangte, ahim kangthimta ingthirlo, lapen erong athengpi angkur hei hei jongsi ingthir-et-lo tangte, aro hei hei anta ingthirlo.

¹⁷Ke-e ajit athengpi arong penang aro ing-lokpettang-lo, lapen nampi ajit athengpi aro ladak pa-ok duntang-lo. Nanglitum, Jihudi kalidet atum ke nampi ajit athengpi asonthak thak-lo, lapen hala ke-e ajit arong along nampi ajit athengpi aro ale kelongdun asonthotsi nonke nanglitum Jihudi atum along karjong achethe longdunlo.

¹⁸Tangte nanglitum hala kang-loktang aro atum aphan langrop-ri. Nanglitum kopusi chepindak unjima? Nanglita arochot; nanglile angkur aphan kepareng kali, angkursi nanglitum aphan parengtang-lo.

¹⁹Bonta nanglitum puji tahai, “Lake ahok-lo, bonta arong along neliphan kepa-okdunji aphansi halabangso aro hei hei inglok-ettang-lo.”

²⁰Lake ahok tema. Halatum akekroikre apotsi halatum aphan ing-lokpet lo, bonta nanglitum ke akekroi kedo apotsi nanglitum hadak dothip-lo. Bonta labangso pen apot ke nanglitum chepindakri, bonta pherenon.

²¹Arnam jongsi hala thengpi aro asonthakthak a-Jihudi atum aphan rairedet-lo tangte, alangli nanglitum aphanta rairedet binongji.

²²Tangte Arnam ke ko-an akechingkime lapen ko-an aning kesedeng abang-loma, lake ilitum thek-long-lo. Alangli hala pap keklem atum aphan amethang aning kesedeng paklang-lo, bonta nanglitum jongsi alangli akangjinso angkangsi dobom tangte, alangli nanglitum aphan ingjinsobomji, bonta nanglitum jongsi alangli akangjinso angkang dobombe tangte, nanglitum aphan jokta ing-lokpetji.

²³Lapen hala Jihudi atum amethang methang akekroikre che-olote, halatum aphan hala aphrang adim pa-okdunthudetji. Pima Arnam halatum aphan aphrang adim kepa-okdunthuji ajakong do.

²⁴Pima nanglitum aphan jongsi nampi ajit athengpi arong along pen ing-lokpetsi ke-e a-Jit athengpi arong along, aron kalidet setta pa-okdunlo tangte, hala aro binong aphan arong binong along pa-okdun-thuthedet jima!

²⁵Kortemarli atum, nanglitum ane kechepathethedetji aphan, nanglitum labangso akepatu ahok alam kechinijisi neli ning hang-lo. Alam ke lahelo, Israel atum aning kangtang kedoverji kali: bonta Jihudi kalidet atum Arnam adung kevang nangji aphai chokchetik ke halatum lapusonsi dobomjilang.

²⁶Lapen lapusonsi Arnam kadokave a-Israel atum aphan pajokji. Atheke hastro pulo, “Zaion pensi Kepajok abang vangji, alangli Jakob aso asu atum apap hei hei pakak-etji.

²⁷Lapen ne halatum apap hei hei kepakak ahut, ne halatum pen labangso akechechak chebiji.”

²⁸Jihudi atum Birta Keme dengdedet-lo apotsi nanglitum Jihudi kalidet atum pen apot halatum Arnam ahotur plang-lo. Bonta Arnamsi halatum aphan ingvailo apotsi, halatum aphusar atum pen apot Arnam halatum aphan inghonbomlo.

²⁹Pima Arnam ke amethang kepi ahirjume lapen akepha chelarle.

³⁰Nanglitum, Jihudi kalidet atum aphrangke Arnam aphan kroikrelo; bonta nonke hala Jihudi atum akekroikre apotsi nanglitum Arnam akangjinso long-lo.

³¹Lasonthotsi nanglitum kelong akangjinso pen ajok Jihudi atumta Arnam akangjinso kelongji aphansi halatum non Arnam aphan kroikrelo.

³²Kadokave amonit atum Arnam aphan akekroikre apotsi Arnam halatum aphan koidi asonthak thak paplang-lo. Halatum kadokave aphan kangjinso kepaklangthekji aphansi alangli la klemlo.

³³Arnam akangjinso ko-an akethe lapen agian lapen akechini ko-an akarsik! Alangli keparai alam hei hei matsi than pachinidak unjima? Alangli keklem athe matsi chini-unma?

³⁴Atheke hastro pulo, “Hemphu aning matsi chini un ma? Alangliphan matsi than pare thekjima?

³⁵Alangli kechetu nangji, lason aphan, komatsi alangliphan paramloma?”

³⁶Pima alanglisi kadokave amar pinchong-lo, lapen alangli pen ajoksi lapen amethang aphansi kadokave amar padolo. Arnam adak atur kaiketa padonang! Amen