Read Karbi ROM 13 Bible Online

ROM 13 - Karbi bible

ROM 13

¹Abangphutinta det keja atum alam kroi masi. Pima Arnam aning kehang kalite baduta keja abang plang un-e, lapen non kedobom det keja atum aphan Arnamsi bat-lo.

²Lasi keja abang ahukum kekroikre abang ke Arnam kepathiktang alamsi kekroikrelo, lapen lapuson keklem abang aling ke amethang aphuthak kangsai chevanpo.

³Pima akeme keklem atum ke det kepangri atum aphan kephere nangji ason ave, bonta kehingno keklem atum ke halatum aphan phere nangji. Nangli Keja abang aphan kephere nangnedetji aphan ning hangma? Tangte akemele klemnon, anke nangli alangli pen akero longpo.

⁴Pima alangli ke nanglitum aphan kepameji aphan Arnam aban kecheplang abang-lo. Bonta nangli jongsi kehingno klemlo tangte, nangli pherenon, pima alangli akejoijepi ke nokjir en-e. Alangli ke Arnam abanlo, kehingno keklem atum aphan Arnam aning kethi ateng kepasung abang-lo.

⁵Lasi Arnam nangpasungdet-na pu aphanchot kali, bonta lake nanglitum keklem nangji akamlo pusi nanglitum aning-angthinta pulo apotsi nanglitum det keja atum alam kroi nangji.

⁶Labangso apotsi nanglitumta midu pibomlo, pima det keja atum ke Arnam aban atumlo, labangso akam aphansi halatum chehodailo.

⁷Tangte nanglitum halatum aphan kepi nangji ason an pinon: Jongsi midu kepi nangji do tangte, midu pinon, khajona kepi nangji do tangte, khajona pinon, kephere nangji abang aphan pherenon, man kepi nangji abang aphan man pinon.

⁸Kanghon apreng apar ke badu alongta nanglitum apreng pado longri. Anut kaprek aphan kanghon abang ke Aron kroipet-lo.

⁹Pima beisa klemri, bang apran enri, chonghuri, bang amar konri pu ahukum hei hei, lapen la apar akaprek ahukumta isipet ahukum along, atheke, “Nangmethang aphan kechinghon asonthot-le tebok abang aphan chinghonnon,” pu ahukum angbongsi dopet-lo.

¹⁰Anut kaprek aphan kanghon abang ke alangli halatum aphan kehingno klemkle. Lasi kanghon helo Aron kekroi binong-lo.

¹¹Nanglitum la klemvek nangji, pima nonke kopi ahut-loma, lake nanglitum chinilo: nanglitum mek keprang nangji ahut nangle tang-lo. Pima Arnam ilitum aphan kepajokji arni ke, aphrang ilitum kekroicheng arni pen apar non tebok muchot-lo.

¹²Ajo jutji dokdok-lo, non the-angji dokdok-lo. Tangte ilitum kangting angbong keklem akam che-olonang lapen kethe-ang angbong ron kechedanji aphan erisim che-en lonang.

¹³Akejoijepi akecho kejun, kalite, hor kangri pen kali; beisa lapen ketherakmeme akam pen kali, kechebohong lapen kechelang un-e pen kali, bonta anerlo akethe-ang angbong kedo atum asonthak thak-le ilitum e-ot keme pen dolonang.

¹⁴Bonta nanglitum Hemphu Jisu Khristole chepindengnon, lapen ok aning kehang kepaplengji aphan ke adim pek-rinon.