Read Karbi ROM 15 Bible Online

ROM 15 - Karbi bible

ROM 15

¹Ili kekroi ajakong kedo atum hala kekroi ajakong kave atum akesung anghor endunsi rapdun nangji. Ilitum emethang aning kedok akam klemchot nangnelo.

²Bonta ilitum akorte atum akekroi kepathirjile, halatum akeme aphan, ilitum halatum aphan aning kepadok akam klem nangji.

³Pima Khristota amethang aning kedok akam klemchotchelo. Bonta hastro kepu asonthotsi plang-lo, atheke la pulo, “Nangliphan kepinrem atum akepinrem an nephuthak klotang-lo.”

⁴Hastro ilitum aphan ning ekepading lapen ning ekerung pen ajok ilitum aning kethe kedoji aphansi, hastro along ketok alam anke ilitum aphan ekethanji aphansi tok-lo.

⁵Lapen nanglitum Jisu Khristo along kecharlidun pen ajok nanglitum ning isi pet pen kedoji aphan ning kepading lapen ning kepathe a-Arnam nanglitum aphan nangparapnang.

⁶Anke nanglitum ning isipet pen lapen angdi isipet pen Arnam, atheke e-Hemphu Jisu Khristo a-Po aphan ro-archothekpo.

⁷Tangte, Arnam adak atur kepatheji aphan Khristo nanglitum aphan kedeng asonthot-le nanglitum lahin lahin aphan dengnon.

⁸Pima neli nanglitum aphan thanlo, Arnam ke kekroi thirklong abang-lo pu kepaklangji, Arnam Jihudi atum aphusar atum aphan kechak alam kepachekokji,

⁹lapen Arnam akangjinso apot Jihudi kalidet atumta Arnam aphan kero karchothekji aphansi Khristo Jihudi atum aban cheplang-lo. Atheke hastro along tok-lo, “Lasi Jihudi kalidet atum angbong ne nangphan roji. ne nangphan lun pen ro-archoji.”

¹⁰Lapen pulo, “Jihudi kalidet atum, Nanglitum hala Arnam kangvaitang amonit atum pen pen chehoknon!”

¹¹Lapen ako pulo, “Jihudi kalidet atum an, nangtum Hemphu aphan ro archonon; kadokave akhei atum, nangtum alangliphan ro-archonon!”

¹²Lapen Isaiah puthulo, “Jesse asu angbong pen inut nangklangji; Jihudi kalidet atum aphuthak recho kechojisi alangli vangji, lapen halatum alangliphansi aning chethepetji.”

¹³Karjong Kangthir ajakong pen ajok nanglitum aning kethe ke-ongbomji aphan, ning kepathe a-Arnam aphan nanglitum akekroi pen ajok alangli nanglitum aning arong lapen aningkangsam paplengsetnang.

¹⁴Korte marli atum, nanglitum ke keme-o atumlo, nanglitum kadokave alam chini, lapen nanglitum lahin lahin chepare seroi un pu neli kroi pamelo.

¹⁵Bonta nanglitum aphan penang alam kepachematha-thujisi neli phererepin pen aphrang ketoktang penang alam tokthusi non nanglitum aphan nang-lolo. Neli Jihudi kalidet atum aphan keklempiji aphan Arnam akangjinso pen Khristo aban keplanglong apotsi neli lapuson phererepin pen tok-lo.

¹⁶Jihudi kalidet atum Arnam aning kedok athok, atheke Karjong Kangthir pen ajok Arnam aphan kepanongtang athok keplangthekji aphansi neli Arnam pen kevang a-Birta Keme kepachethang akurusar ason klembomlo.

¹⁷Tangte, neli Jisu Khristo pen chelangpetsi Arnam akam keklem apot neli kechepindakji athe do.

¹⁸Pima Jihudi kalidet atum aphan Arnam ahukum kepakroiji aphan, lam lapen kam pen, angthek hei hei ajakong pen lapen kemanghumeme akam hei hei pen, lapen Karjong Kangthir ajakong pen Khristo neli pen ajok keklemtang akam alamjirsi neli thanhaichotji.

¹⁹Lasi Jerusalem pen than pangchengsi Illirikam adet anta neli damsi Khristo alamjir a-Birta Keme pachethang tang-lo.

²⁰Lasi bang kepangnitang ahemthur athak neli kekimji ning hanghedetsi Khristo alamjir karjulonglepinlang adimsi Birta Keme kepachethangji neli ning hang-lo.

²¹Atheke hastro along tok-lo, “Alangli lamjir kethan karju longlepinlang atumsi thek-longji, lapen alangli lamjir karju longlepinlang atumsi chinipameji.”

²²Labangso apotsi neli nanglitum along abatai bataita vangthekthedet titilo.

²³Bonta nonke neli labangso ahavar hei hei angbong kam keklem patangtang-lo, lapen penang aningkan pen neli nanglitum along kevangji aphan ning hang-olo apotsi,

²⁴non neli Spein adet kedamji ahut nanglitum along vang unpo pusi ning thelo. Spein adet kedam ahut tovar neli nanglitum along nangvurthekji lapen nanglitum pen neli penang arni dorap rap det aphi neli Spein adet kepaleji aphan nanglitum neliphan nerap dunji pusi neli ning thelo.

²⁵Tebonta non amat ke neli kangthir atum aphan keru kethaiji aphan Jerusalem kedamjisi barpo.

²⁶Pima Jerusalem kedo kangthir atum angbong keduk kelak atum aphan kerapdunjisi Masidonia lapen Grik adet kedo amondoli mate kroi-asong atum aning arong pen dan kepiji aphan cheparaitang-lo.

²⁷Halatum amethang aning kehang pensi halabangso alam cheparailo. Lapen ahok-lo, halatum ke hala keduk kelak atum aphan kerapdun nangji atumlo; pima Jihudi kalidet atumta Jihudi atum along Arnam pen kelong karjong ahirjume longdunlo; lasi Jihudi kalidet atum ke amethang akhi pen halatum aphan rapdun nangpo.

²⁸Neli labangso akam klem patangdet lote lapen halatum aphan kerungpi adan an halatum arideng hodaidet lote, neli Spein adet dampo, lapen kedam ahut tovar nanglitum along nangvurpo.

²⁹Lapen neli chinilo, mo neli nanglitum along kevangji ahut neli Khristo ahirjume keplengset pensi vangpo.

³⁰Korte marli atum, e-Hemphu Jisu Khristo aphan ili kekroi apot lapen Karjong ilitum aphan kepi akanghon pen apot neli nanglitum aphan choningrilo; neli Arnam cho-ardombomlo; nanglitumta neliphan Arnam neardompitha.

³¹Judia adet kedo Khristo aphan kekroikrelang atum arideng pen neli kejokji lapen Jerusalem arongsopi along kedo kangthir atum neli keponpi adan longsi aning arong kedojile Arnam ardomtha.

³²Lapen Arnam jongsi aning hangte, lapusonsi, neli ning arong plengset pen nanglitum along vangji, lapen nanglitum pen chetongsi neli ning arongji lapen jakong mithulongji.

³³Ningkangsam kepi a-Arnam nanglitum kadokave along padonang! Amen.