Read Karbi ROM 4 Bible Online

ROM 4 - Karbi bible

ROM 4

¹Tangte Jihudi atum aphusar, Abraham alamjir ilitum kopisi pu apot-loma?

²Amethang keklem akam apotsi Arnam Abraham aphan dhoromi pu lakhalo asonte alangli kechepindakji athe doji apot-lo, bonta Arnam angno ke kali.

³Hastro pulo, “Abraham Arnam aphan kroilo, lapen labangso apotsi Arnam alangliphan dhoromi pu lakhalo.”

⁴Kam keklem abang anam long; alangli kelong anam ke dan kali, lake alangli keklem apot kelong nangji anamlo.

⁵Bonta ame-thang akam aphan chikikesi Arnam aphan kechiki amonit, atheke ado kedo abang aphan ado ave pu kehok a-Arnam aphan kekroi amonit amethang akekroi apotsi Arnam alangliphan dhoromi pu lakhalo.

⁶Amethang akam pen apot kalidet pen Arnam angno dhoromi keplang abang rengme pu David kepu alamta labangso alam aphansi pudamlo: Atheke David pulo,

⁷“Amethang akechokche hei hei Arnam pen diya kelongtang, lapen apap hei hei Arnam kediptang abang rengme!

⁸Apap hei hei Hemphu lakhakhedetji, lason abang rengme!”

⁹Tangte la David kepudam akerengme ke reng-rot ke-en atum aphanchotma? Lapu kali. Lake reng-rot ke-en-e aphantalo. Pima ilitum hastro alam paklangsi pulo, “Abraham Arnam aphan kroilo, lapen alangli methang akekroi apotsi Arnam alangli-phan dhoromi pu lakhalo.

¹⁰Tangte la komantusi plang-loma? Abraham reng-rot ke-en aphrangma, mate aphima? Lake Abraham reng-rot ke-en aphrang-lo, aphi kali.

¹¹Aphisi alangli reng-rot enlo, lapen labangso areng-rot alangli akekroi kedo apotsi alangli reng-rot ke-en-e ako Arnam alangliphan dhoromi pu lakhalo pu angthek-lo. Lasi karjong anat penke Abraham ke areng-rot-redet setta Arnam aphan kekroi pen ajok Arnam angno dhoromi keplang atum an apolo.

¹²Alangli ke reng-rot ke-en atum aphanta apolo. Lake halatum reng-rot ke-en apotchot kali, bonta Abraham reng-rot en-e ako Arnam aphan kekroi pen kedo kethak asonthotsi halatumta Arnam aphan kekroi pen do-thak-lo apotsi lason plang-lo.

¹³Abraham lapen aso asu atum pirthe chepahemphu longji pu Arnam Abraham aphan kechak ke Abraham Aron ateng keklem apot kali, bonta alangli Arnam aphan kekroi apot Arnam alangliphan dhoromi pu lakhalo apotsi Arnam alangliphan la chak-lo.

¹⁴Pima jongsi Aron kekroi atum aphan ansi Arnam kechaktang ason pichotji pulote kekroi ke thangta kalidet-lo, lapen Arnam akechakta thang ale avedet-lo.

¹⁵Aronsi Arnam aning kethi vanlo; bonta Aron avedette Aron akekroikreta avelo.

¹⁶Tangte Abraham aso asu atum an aphan, atheke, Aron kekroi atum aphan chot kali, bonta Abraham kekroi asonthot Arnam aphan kekroi atum an aphan Arnam labangso akechak akejoi adan ason kepithekjisi, labangso akechak ke kekroi pensi vang-lo. Pima Abraham ke karjong anat ilitum kadokave apolo.

¹⁷Lake hastro ketok asonthot-lo, “Neli nangliphan ake-ongpi akhei apo nangpaplangtang-lo.” Lasi Abraham kekroi a-Arnam, atheke, kethitang aphan kepareng thek, lapen hukum pisi kavedet amarta kepadothek a-Arnam angno ke labangso akechak mesenlo.

¹⁸Abraham aning kechethedamji ason avedet setta alangli kroilo lapen aning thelo. Lasi hastro along ketok, “Nangso nangsu chan-oji” pu asonthotsi alangli “ake-ongpi akhei apo plang-lo.”

¹⁹Alangli arta ningkan pharo isi anbak dolo apotsi, alangli bang arpum ke kethitang asonthak thak-lo, lapen Sarahta aso kechopatheji arta littang-lo pu alangli chechini pamelo setta alangli kai ateng kroibomlo.

²⁰Alangli kekroi che-o-edet-lo, lapen Arnam kechak alam aning bibedet-lo, bonta amethang akekroi pen ajok jakong longsi Arnam aphan ingduk-ardombomlo.

²¹Arnam amethang kechaktang ason pachekok un pu alangli kroipamelo.

²²Abraham labangso akekroi kedo apotsi Arnam alangliphan dhoromi pu lakhalo.

²³“Alangliphan dhoromi pu lakhalo,” pu ketok alam ke alangliphanchot kali,

²⁴bonta lake ilitum aphantalo. Pima ilitum aphan, atheke e-Hemphu Jisu aphan kethitang atum angbong pen kepathur abang aphan kekroi atum an aphanta dhoromi pu lakhadetji.

²⁵Ilitum apap hei hei apot alangli thi nangji pusi Arnam pathikdet-lo, lapen ilitum aphan dhoromi atum ekepaplangji aphansi alangliphan parengthulo.