Read Karbi ROM 5 Bible Online

ROM 5 - Karbi bible

ROM 5

¹Lasi ilitum akekroi pen apot nonke ilitum aphan dhoromi pu lakhalo apotsi e-Hemphu Jisu Khristo pen ajok ilitum Arnam pen ning kechingsam dolo.

²Ilitum Khristo aphan kroilo apotsi alangli pen ajok ilitum Arnam akangjinso longdunlo, lapen ilitum Arnam adak-atur longdunji pu ening kechethedam pen apot ili ning arong-lo.

³Lapen kesung ahutta ilitum aning arong do, pima kesung kepho pen ajok kechechak un muchot ajakong long,

⁴kechechak-un ajakong pen ajok e-ot-edur me-i, e-ot-edur keme pen ajok ning ketheta do-i pu ilitum chini.

⁵Labangso aning kethe ilitum aphan ning epabibe, pima Karjong Kangthir pen ajok Arnam amethang akanghon ilitum aning arlo dungtang-lo. La Karjong Kangthir ke Arnam ekepi adanlo.

⁶Pima ilitum ajakong kavedet ahutsi ilitum aphan ajok, atheke dhoromime atum aphan ajok Khristo athikpet apor ahut thi-lo.

⁷Inut dhoromi amonit aphan ajok amethang apran kechepi abang penang penung ave, bonta inut akeme amonit aphan ajok ke komane abang amethang apran chepi haidet tahai.

⁸Bonta Arnam ilitum aphan ko-an e-inghonloma, lake alangli ilitum aphan epaklangtang-lo; atheke, ilitum papibomlang ahutsi Khristo ilitum aphan ajok thilo.

⁹Alangli vi pen ajok Arnam ilitum aphan nonke dhoromi pu elakhalo; la aparta alangli ilitum aphan Arnam aning kethi pen epajokji.

¹⁰Aphrangke ilitum Arnam ahotur atumlo, bonta alangli Sopo apran kechepi pen ajok nonke ilitum aphan Arnam pen epajalangthulo. Nonke ilitum aphan Arnam pen epajalangthu-tang-lo; tangte la aparta Khristo achethe pen ajok ilitum aphan ko-an pajokpoma!

¹¹Bonta la anchot kali; ilitum aphan Arnam pen kepajalangthu abang e-Hemphu Jisu Khristo pen ajok Arnam keklemtang akam pen apot ilitum chehok-lo.

¹²Inut amonit pen apotsi pirthe athak pap vang-lo, lapen alangli papsi kethi vanlo. Labangso apot kadokave amonitta kethi nangji a-ot dolo, pima kadokave amonitta pap klemlo.

¹³Moses pen ajok Arnam Aron bibe ako penta pirthe athak pap dolo, bonta aron kavedet adim ke pap alakha bibedet-lo.

¹⁴Tebonta Adam arni ahut pen ha Moses arni ahut anta monit atum thi nangkok-lo, lapen Adam Arnam ahukum kroikresi keklem apap asonthot apap keklemkle atumta thi nangkok-lo. Adam helo hala kevangji abang a-arjanlo.

¹⁵Bonta Arnam kepi akejoi adan ke Adam apap asonthak thak kali. Hala inut amonit apap pen apotsi monit atum thi-lo, lake ahok-lo. Bonta inut amonit, atheke Jisu Khristo pen ajok Arnam monit atum aphan kepi akejoi, akangjinso adan ke la apar ajakong themulo.

¹⁶Lapen Arnam adan ke hala inut amonit apap pen akeprek do. Hala ephong apap pen aphi kangsai vangsi ado padolo, bonta pap do-o aphi kangjinso adan vangsi dhoromi paplang-lo.

¹⁷Inut amonit apap pen ajok, atheke halabangso abang pen apot pap parechodet-lo, bonta la apar inut amonit, atheke Jisu Khristo akam ajakong themulo. Arnam ake-ongpi akangjinso longsi akejoisi dhoromi keplanglong atum anke Khristo pen ajok rengsi parechoji.

¹⁸Tangte lahelo, inut amonit apap pen apotsi kadokave amonit atum aphan ado padolo asonthotsi inut amonit dhoromipet akam pen apot kadokave amonit aphan adai pen pajoksi chethe pilo.

¹⁹Lapen inut amonit Arnam ahukum akekroikre ajoksi kadokave amonit atum papi plang-lo asonthotsi inut amonit Arnam ahukum akekroi pen apot Arnam monit atum aphan dhoromi pu lakhaponji.

²⁰Pap kepa-ongmuchotji aphansi Aron bilo; bonta pap ke-ongbom ahut Arnam akangjinso ansose ongmuchot bomlo.

²¹Tangte lahelo, kethi pen ajok pap keparechodet asonthotsi, Arnam akangjinsota e-Hemphu Jisu Khristo pen ajok ilitum aphan dhoromi epaplangsi lapen kejut un-e achethe episi parecholo.