Read Karbi ROM 7 Bible Online

ROM 7 - Karbi bible

ROM 7

¹Korte marli atum, neli kepuji alamthe nanglitum chiniji binong, pima nanglitum kadokaveta aron alam chinihurlo. Inut amonit rengtik ansi aron alangli phuthak ajakong dochot.

²Pima inut penan kedotang arloso apenan rengtik anke aron pen ajok alangliphan amethang apenan pen kok-rap-het-lo. Bonta apenan thilot lote, hala apenan pen alangliphan kekok-rap-het aron pen alangli jokphlot-tang-lo.

³Tangte lahelo, apenan kereng un ahut labangpi jongsi anut kaprek apinso pen dorap rap-lo tangte, alangliphan beisapi pusi pudetji; bonta alangli penan thilot-lote labangpi halabangso aron pen jokphlottang-lo, lapen alangli anut kaprek apinso aphan penan dokok setame, lake beisa keklem kalilo.

⁴Nanglitumta lasonthak thak-lo, korte marli atum. Atheke nanglitum ke Khristo abang a-ok athan hei heilo apotsi, Aron anat ke nanglitumta thilot-tang-lo, lapen ilitum Arnam aphan athe kepathe pithekji aphan nonke nanglitum hala kethi pen kerengthutang abang amonit atumlo.

⁵Pima ilitum ok aning kehang atengle dolote ilitum pap keklemji aning kehangke Aron pen ajok ilitum abang arlo prungdutsi kam klemvoi titilo; lapen ilitum keklem akam an pen ajok ilitum thi-lo.

⁶Bonta nonke ilitum Aron pen jokphlottang-lo, pima aphrang ahut ilitum aphan kekokhet amar anat ke ilitum thilot-tang-lo. Nonke ilitum aphrang asonthot ke, atheke hala ketoktang aban-aron ekethan ateng ke klembombelo, bonta Karjong ekeja atengsi ning kemi pen ilitum klemlo.

⁷Tangte ilitum kopisi pu apot-loma? Aron ke pap ma? Lapu kali! Bonta Aron ave asonte neli pap chininedetji apot-lo. Pima “Bang amar konri” pule Aron pupe asonte neli bang amar kekon chininedetji apot-lo.

⁸Bonta papke halabangso ahukum pen ajok neli kadokave amar kekonji aphan neli ning keparungji asoi long-lo. Aron avete papke akethitang-lo.

⁹Aphrang aron kave akoke neli methang amatta reng-etsi dolo. Bonta hukum vangsi pap ke cherengthusap-lo, lapen neli ke thilot-lo.

¹⁰Lapen hukum ke kepareng-iji aphansi pilo, setta neliphan ke la kethi-i asonsi nangcheplangdet-lo.

¹¹Hukum pen ajok papke asoi longsi neliphan chobeilo lapen labangso ahukum pen ajok pap ke neliphan pathilot-lo.

¹²Tangte lahelo, Aron ke ingthir-et, lapen hukumta ingthir-et, chokpet lapen mesen.

¹³Tangte la akeme amarsi neliphan kepathi-i amar plangdet-loma? Lapu kali! Papsi la klemlo; pap amethang a-ot binong keklangdakji aphan papke akemesen amar pen neliphan pathilo. Lasi papke hukum pen ajok hingnomuchot cheplang-lo.

¹⁴Pima ilitum chinilo, Aron ke Karjong amarlo; bonta neli ke kethidetji amonit-lo, pap aphan kejordet abanlo.

¹⁵Neli kopisi klem loma, lake neli chechinine; pima neli keklemji ning kehang akam neli klemkle, bonta neli kehijim akamsi neli klem rong titilo.

¹⁶Bonta neli jongsi neli ning kehanghe akamsi klemlo tangte, neli ke aron mesen pusi kroidunlo.

¹⁷Lasi labangso akam ke neli methangle keklem kali, bonta neli long kedo apapsi la klemlo.

¹⁸Neli chinilo, neli ning arlo, atheke neli ot along thangnat akemeta ave. Pima neli keme keklemji ning hang setta neli la keklemji ajakong avelo.

¹⁹Pima neli keklemji ning kehang akeme akam ke neli klemklesi neli ning kehanghe, akehingno akamsi neli klemrong titilo.

²⁰Jongsi neli keklemji ning kehanghe akamsi neli klemrong-lo tangte, lake neli methangle keklem kali, bonta neli ning arlo kedo apapsi la klemlo.

²¹Lasi neli thek-long-lo: labangso aron lasonsi kam klemvoilo, atheke neli keme keklemji ning hang-lo setta neli kehingnosi klem rong titilo.

²²Neli ning arlo ke neli Arnam aron ning dok binong-lo.

²³Bonta akaprek aron neli bang arlo kam keklemvoi neli chethek-long-lo. Labangso aronsi neliphan nelibang arlo kam keklemvoi apap aron akoidi nepaplang-lo.

²⁴O ko-an keduk kepho abang la neli! La neliphan kethi anat nekeponbom abang arpum pen neliphan matsi nepajokpoma?

²⁵Neli Arnam aphan chorolo, pima Hemphu Jisu pen ajok alangli nepajok-lo. Tangte neli ke lapuson helo: Nelining pensi neli Arnam aron ateng klem unchot-lo, bonta ok penke neli pap aron atengsi klembomlo.