Read Karbi ROM 8 Bible Online

ROM 8 - Karbi bible

ROM 8

¹Lasi nonke Jisu Khristo pen kechelangpet atum an aphan ke aduk ahukum avelo.

²Pima ilitum Jisu Khristo pen kechelangpet pen ajok ilitum aphan chethe ekepi a-Karjong aronsi neliphan pap lapen kethi aron angbong pen nepajoktang-lo.

³Pima okke ajakong avedet apotsi Aron keklem un-e akam Arnamsi klemlo. Alangli methang a-Sopo aphan nangtoisi monit a-ot along kedo apap aphan aduk ahukum pilo. Alangli Sopo ke pap kepakak-i athok keplangjisi papi amonit a-arje ensi vang-lo.

⁴Dhoromi pen akenang, atheke ilitum akai along aron kepaplengji aphan, lake ok aning kehang ateng kengkam kechejorjedetji, bonta Karjong aningkehang ateng pen kengkam kechejorji aphan.

⁵Ok aning kehang ateng kedo-kethak atum anke ok aning kehang akam keklemjisi aning do-e. Bonta Karjong aning kehang ateng kedo-kethak atum anke Karjong aning kehang akam aphansi aning do-e.

⁶Nangli jongsi ok aning kehang akam aphansi nangli ning do-elo tangte, nangli thilotji, bonta nangli jongsi Arnam a-Karjong aning kehang akam ning do-elo tangte, nangli rengji lapen ning kangsam longji.

⁷Lasi inut amonit jongsi ok aning kehang akam aphansi ning do-elo tangte, alangli ke Arnam ahoturlo; pima alangli Arnam aron kroikrelo, lapen kroi thekthe.

⁸Ok aning kehang akam keklem atum ke Arnam aning padok un-e.

⁹Bonta nanglitum aning arlo jongsi Arnam a-Karjong do binong tangte, nanglitum ok aning kehang ateng klemkle, bonta Karjong aning kehang alingsi klemlo. Mane abang jongsi Khristo a-Karjong avelo tangte alangli ke Khristo amonit kali.

¹⁰Bonta Khristo jongsi nanglitum aning arlo do tangte, pap pen apot nanglitum abang arpum thilotji setta, Karjong nanglitum aphan parengji, pima Arnam nanglitum aphan dhoromi pusi lakhatang-lo.

¹¹Jisu aphan kethitang atum angbong pen parengthusi kepathur a-Arnam a-Karjong jongsi nanglitum along dolo tangte, la Khristo Jisu aphan kethitang atum angbong pen keparengthu abang a-Karjong nanglitum along kedo pen ajok alangli nanglitum kethidetji abang arpum aphan parengji.

¹²Tangte lahelo, kortemarli atum, ilitumke epreng kedo atumlo, bonta ok aning kehang ateng keklemji aphan ok alongle ilitum apreng kedo kali.

¹³Pima nanglitum ok aning kehang atengle do-thak lote nanglitum thikoiji; bonta nanglitum Karjong pen ajok ok akam an pathikoilote, nanglitum rengji.

¹⁴Pima Arnam a-Karjong kejapon long atum anke Arnam asomarlo.

¹⁵Pima Arnam nanglitum aphan kepi a-Karjong ke nanglitum aphan ban nangpaplangple, lapen kephere aningta nangpipe; bonta Karjong ke nanglitum aphan Arnam asomar nangpaplang-lo, lapen Karjong ajakong pen ajok ilitum Arnam aphan, “O po! O Po!” pu hang-lo.

¹⁶Ilitumke Arnam asomarlo pu Arnam a-Karjong mamatsi ilitum akarjong pen pen haki chodunlo.

¹⁷Ilitumke alangli somar atumlo apotsi alangli amethang amonit atum aphan kebirtipi ahirjume hei hei ilitum chepahemphudun longji, lapen Arnam Khristo aphan kebirtipi ason ilitum Khristo pen pen chepahemphu longrap rapji; pima ilitum jongsi Khristo pen sung rap rap-lo tangte, ilitumta alangli pen adak atur long rap rapji.

¹⁸Non ilitum kephobom akesung aphan ke mo aphi ilitum aphan ekepaklangji adak atur pen thangnatta pangbardam un-e pusi neli mathalo.

¹⁹Kepinchongtang ason an Arnam amethang asomar kechepaklangji aphan ingtungpik pen inghongphrong-lo.

²⁰Pima kepinchongtang ason an thangta kalidet keplangji aphansi Arnam la aphan ado padolo, lapen lake kepinchongtang ason amethang aning kehang apot kali, bonta la lapuson keplangji aphan Arnam aning hang-lo. Tebonta aning kethe lahelo,

²¹Mo arni isi kepinchongtang amar an akevir nangji pen jokphlotsi Arnam asomar atum kelong adak atur lapen akejok longdunji.

²²Pima ilitum chinilo, arloso atum oso pirthe kepahache ahut akesung asonthotsi la Arnam kepinchongtang ason an nonputa sungsi ar-emjolo.

²³Bonta la kepinchongtang amar anchot kali, ili la Arnam aphrangsi adan, atheke Karjong kelong atumta Arnam kur kepon asomar ekepaplangji lapen ilitum abang arpum aphan kepajokji aphan kanghong phrongbom ahut ening arlo ar-emjolo:

²⁴Pima ilitum labangso aning kethe kedo apotsi ilitum jok-long-lo; bonta ilitum jongsi kethek-longtang-lok ason aphansi mo aphi longji pu ning thelo tangte, lake ning kethe binong kalilo; pima kethek-long-lok ason aphan ke matsi mo aphi longji pu aning thebom jilangma?

²⁵Bonta ilitum jongsi kethek-longle ason aphan mo aphi longji pu ning chethedamlo tangte, ilitum ning chepading pen la aphan inghongphrong bompo.

²⁶Lasonthak thaksi Karjongta ili la jakong kave atum aphan erapdunlo. Pima ilitum kopusonsi ardom nangjima, lake ilitum chinine; bonta elamthe pen kepachinidak un-e akar-em pen Karjong amethangsi ilitum aphan Arnam angno echoningripi-bomlo.

²⁷Monit aning kepherei abang, Arnam ke Karjong akematha alam chini; pima Karjong ke Arnam aning kehang atengsi kangthir atum aphan Arnam angno choningripibom.

²⁸Kadokave asonta Arnam ke akeme aphansi keklem athema Arnam aphan kanghon, atheke alangli kam aphan alangli ning kehang ateng kephatang atum pen kam klem rap rap-lo, pu ilitum chinilo.

²⁹Pima akorte ake-ongpi atum angbong Soposi aklengsi abang keplanglongji aphan Arnam aphrang pen kangvaitang atum Arnam a-Sopo asonthak thak keplangji aphan Arnam aphrang pen pathik-lo.

³⁰Lapen Arnam aphrang pen kepathiktang atum an aphan alangli phalo; lapen alangli kephatang atum aphan dhoromi pusi lakhalo; lapen alangli dhoromi pu kelakhatang atum aphan alangli amethang adak aturta pilo.

³¹Tangte la kadokave alam pen apot ili kopisi pu apot-loma? Arnam jongsi ilitum abe tangte, matsi ephan hai unjima?

³²Alangli amethang asopo aphan anta cherairesi ilitum kadokave aphan ajok alangliphan athok ason paplangsi thokdet-lo. Alangli ilitum aphan amethang a-Sopo epidet-lo, tangte alangli ilitum aphan kadokave amarta akejoi pen epipedetjima?

³³Arnam kangvaitang atum aphan matsi adai tin unjima? Arnam amethang amatsi halatum aphan dhoromi pu lakhalo.

³⁴Tangte halatum aphan komatsi ado padojima? Baduta ave. Jisu Khristota halatum aphan ado padode. Alangli thilot-lo, lapen la aparta rengthusi Arnam ar-e anat dolo, lapen ilitum aphan Arnam angno echoningripiverlo.

³⁵Tangte ilitum aphan Khristo akanghon pen matsi epaprek unjima? Keduk ma, kesung ma, akhim ma, akephereduk ason ma, mate nokjirma?

³⁶Hastro along ketok asonthotsi, “Nanglitum pen apot nelitum ke kaiketa kethinangji, lason akepherememe dolo; netum aphan ke kethuji abiresak asonsi nepinchongdet-lo.”

³⁷Bonta la kadokave do setta ilitumke ephan ekanghon abang pen ajok haithorlo!

³⁸Pima ilitum aphan alangli akanghon pen thangta epaprek un-e pu neli chinilorlo. Kethi tame, kalite reng-etbom settame; sining aphe-rangke atum tame, kalite sining angsong kepangri atum, mate ajakong kedo atum settame; non keplangbom ason tame, kalite mo aphi keplangji ason settame;

³⁹ilitum athak kedo apirthe tame, kalite ilitum arum kedo apirthe settame, kepinchongtang amar angbong pen thangnatta ilitum aphan la e-Hemphu Jisu Khristo pen ajok Arnam ekepi akanghon pen epaprek un-e.