Read Karbi ROM 9 Bible Online

ROM 9 - Karbi bible

ROM 9

¹Neli ahok alamsi pulo, neli ke Khristo amonit-lo lapen neli pachobeibelo: neli ning-ingthinta Karjong Kangthir akeja pen ajok neli pachobeibe pu neliphan pachinidak-lo,

²atheke neli methang akorte atum, atheke neli methang akhei amonit atum pen apot neli ning dukpik-lo, lapen neli kaiketa matha-it-lo pu neli kepu alam neli kepachobei kali.

³Halatum aphan ale doji pu asonte neli Arnam ahirjuno longnangkok settame lapen Khristo pen nepaprekdak settame, lake meparji pusi neli mathalo.

⁴Pima halatum ke Arnam kangvaitang amonit atumlo; alangli halatum aphan amethang asomar paplang-lo lapen amethang adak atur halatum aphan paklang-lo; alangli halatum pen lamchak chebilo lapen halatum aphan Aron pilo; Arnam aphan ahokpet pen kardom kangduk aron halatum chinilo; halatum Arnam akechak long-lo.

⁵Halatum ke Jihudi atum aphusar atum aso asulo lapen monit aron penke Khristo ke halatum akhei amonit-lo. Arnam, la kadokave aphan kepangri abang ke kejut un-e akai apar akai anta kero karcho kelongver nangji abang-lo! Amen.

⁶Arnam kechak alam chekok un-edet-lo pule neli kepudam kali. Pima Israel amonit aso asu atum anke Arnam kangvaitang amonitpet-lo, lapu kali.

⁷Lapen ke Abraham aso asu atum anke Arnam asomarpet-lo, lapu kali. Arnam Abraham aphan pulo, “Isaak pen ajoksi ne nangphan kechaktang aso-asu plangji.”

⁸Labangso alam athe lahelo, api apo pen ajok amahang kethekchot a-osomar atum ke Arnam asomar kali, bonta Arnam kechak ateng pen amahang kethek atum aphansi Arnam asomar binong pu lakhaji.

⁹Pima Arnam kechak lapuson helo, “Muning labangso apor ahut neli vangthuji lapen Sarah asopo amahang thekji.”

¹⁰Lapen la anchot kali, inut amonit, atheke ephusar Isaak pen ajok Rebeka kecherop asopo dolo.

¹¹Bonta Arnam aning kehang atengsi asopo inut aphan ingvailo, pu alam kepachekokji aphansi Arnam Rebeka aphan pulo, “Akleng abang akebi aphan ingdukji.”

¹²Halatum amahang thekthe ako, halatum akeme akehingno thangta klemkle akosi Arnam labangso alam pulo. Lasi Arnam amethang akepha pen apotsi alangli ingvailo, halatum keklem akam apot kali.

¹³Atheke hastro along tok-lo, “Ne Jakob aphan inghonlo, bonta Iso aphan hijimlo.”

¹⁴Tangte ilitum pisi pu apot-loma? Arnam keklem chokchedet-loma? lapu kali.

¹⁵Pima alangli Moses aphan pulo, “Neli methang aning kehang aling aphansi neli ingjinsoji lapen neli methang aning kehang aling aphansi neli inghonji.”

¹⁶Tangte lahelo, monit aning kehang kalite keklem akam apot-le Arnam kangvai kali, bonta Arnam kangjinsoji aning hang-lo apotsi alangli ingvailo.

¹⁷Pima Arnam Ijip adet arecho Pharoh aphan kepu alam hastro along ketok lapuson helo, “Nangli pen ajok neli methang ajakong kechepaklangji lapen pirthe adang neli men kepachethangji aphansi neli nangliphan recho nangpaplang-lo.”

¹⁸Tangte lahelo, Arnam ke amethang aning kehang aling aphan ingjinso lapen amethang aning kehang aling aphan aning pangtang.

¹⁹Bonta nanglitum angbong mane abang neliphan puji tahai, “Jongsi lake lapusonlo tangte, Arnam kopusi monit aphan adai ketin thek langma? Arnam aning kehang matsi khang unjima?”

²⁰Bonta, oh jirpo, Arnam aphan kehili dunji abang nangli komatma? Longle aphule ke kethip abang aphan “Nephan kopi apotsi lason nethiprong-loma?” pu pupe.

²¹Phule kethip abang isipet alongle angkleng pen amethang aning kehang aling kethipji lapen isipet alongle angkleng pen hini aphule, isi ke aman kedo aphan lapen isi ke kaike ke-en-iji aphan kethipji ajakong do, kalima?

²²Arnam keklemta lasonthot-lo. Alangli amethang aning kethi lapen amethang ajakong kechepaklangji aning hang-lo. Lasi kevirdet nangji atum, atheke alangli ning kethi kepho nangji atum aphan alangli aning chepading-lo.

²³Lapen alangli amethang kethepik adak atur kechepaklangji aning hang-lo. Ilitum aphan, atheke aphrang pen kepathiktang, la alangli akangjinso kelongji atheng, lapen alangli methang adak atur kepalongjisi kepathiktang atum aphan alangli labangso adak atur pilo.

²⁴Pima ilitumke alangli kepha tang amonit atumlo, atheke Jihudi atum angbong penchot kali, bonta Jihudi kalidet atum angbong penta alangli phalo.

²⁵Hosea aloh along Arnam kepu alam ketok lapuson helo, “Ne nemethang amonit kalidet atum aphan ‘Ne methang amonit’ pusi pupo. Ne kechinghonhedet akhei aphan ‘ne kechinghon abang’ pusi ne pupo.

²⁶Lapen halatum aphan, ‘Nangtum ke ne methang amonit kali,’ pu kepu adimsi, halatum aphan kereng-et a-Arnam asopo atum pusi pudetji.”

²⁷Lapen Isaiah hangsersi Israel alamjir pulo, “Israel amonit atum talo akung asangti asonthak thak dopik setta halatum angbong pen ong-e atumsi jokchotji;

²⁸pima Hemphu amethang alam atengsi pirthe athak pachekok dapprangji, lapen eboipetsi kaike aphan pachekok pameji.”

²⁹Lake Isaiah aphrang pen kepu asonthak thak-lo, atheke alangli pulo, “Jakong theparpik abang, Hemphule ilitum aphan eso-esu epitekang ke asonte ilitum Sodom lapen Gomorrah arongsopi asonthak thak cheplangdetji apot-lo.”

³⁰Tangte ilitum kopisi pu apot-loma? Alam ke lahelo: Jihudi kalidet atum Arnam angno dhoromi keplangji aphan bor-i-elo setta halatum Arnam aphan kroilo apotsi Arnam halatum aphan dhoromi pu lakhalo.

³¹Bonta Israel atum ke Arnam angno dho-romi keplangji aphan aron rilo setta halatum la longledet-lo.

³²Kopi apotma? Pima halatum kekroi penle kebor-i kali, bonta amethang akam pensi bor-ilo. “Kepatekung-i a-arlongsi” halatum pate-kung-lo.

³³Atheke hastro pulo, “Langtha, Zaion athak ne monit atum kepatekung-i lapen kepachingkoi-i a-arlong bipo. Bonta alangliphan kekroi abang ke therakjokplotpo.”