Read Karbi 1 KORINTH 1 Bible Online

1 KORINTH 1 - Karbi bible

1 KORINTH 1

¹Jisu Khristo aketoitang abang keplangji aphan Arnam aning kehang pen kephatang abang, neli Pol-si, ekorte, Sosthenes pen pen labangso aloh

²Korinth arongsopi kedo Arnam amondoli mate kroi-asong, atheke Khristo Jisu pen kechelangpet pen ajok, Arnam amethang aphan kechepanongtang lapen kangthir atum keplangjisi Arnam kephatang atum aphan tok-lo. Lapen lake bithe bitha kedo, ilitum lapen halatum a-Hemphu Jisu Khristo aphan kangduk kardom atum aphantalo.

³Epo Arnam lapen Hemphu Jisu Khristo nanglitum aphan kangjinso lapen ningkangsam nangpapinang.

⁴Arnam nanglitum aphan Jisu Khristo pen ajok kangjinso nangkepi apot neli Arnam aphan kaiketa roverlo.

⁵Pima nanglitum Khristo pen kechelangpet pen ajok, nanglitum lam kethan lapen kechini un ajakong pen pen ajat ason anatthuta plang-otang-lo.

⁶Khristo alamjir kepachethangtang alam nanglitum kroithiptang-lo.

⁷Lasi e-Hemphu Jisu Khristo kecheklangji ahut aphan nanglitum kanghongphrong ahut nanglitum karjong adan an longpettang-lo.

⁸E-Hemphu Jisu Khristo a-Arni nanglitum thang adota kavedetji aphan, mo kejut anta alangli nanglitum akekroi pathirji.

⁹Amethang a-Sopo, atheke e-Hemphu Jisu Khristo pen ilitum aphan kepachelangpetji aphan ilitum aphan kepha a-Arnam ke kechiki ening thek-long abang-lo.

¹⁰E-Hemphu Jisu Khristo amen pen neli nanglitum aphan choningrilo, kortemarli atum, nanglitum angbong abe abe kavedetjile nanglitum lahin lahin alam chekroinon. Nanglitum isipet akematha lapen aning kehang pen dora chelangpetnon.

¹¹Pima, kortemarli atum, nanglitum angbong kechebohong dolo pusi ingjir Kloh ahem penang amonit atum neliphan thanlo.

¹²Neli kepudam alam lahelo, nanglitum abangphutinta kepu prek-jamlo. Inut abang pulo, “Neli ke Pol asangho”, anut kaprek abang pulo, “Neli ke Apollos asangho,” lapen hala anut kaprek abang pulo, “Neli ke Pitor asangholo,” lapen hala anut kaprekthu abang pulo, “Neli ke Khristo asangholo.”

¹³Tangte Khristo aphan thakdak tang-loma? Nanglitum aphan thengparpan athak nangkethipi abang ke Pol heloma? Mate, Pol amen pensi nanglitum aphan baptisom nangpiloma?

¹⁴Neli Gaias lapen Khrispas aphan apar ke badu aphanta baptisom pipelang; la apotsi neli Arnam aphan chorolo.

¹⁵Tangte nanglitum aphan neli men pensi baptisom pilo pu baduta pu un-e.

¹⁶(Oh ahok-lo, neli Stephanas lapen alangli hem ehum amonit aphanta baptisom pilo; bonta la pen apar ke neli komane aphan baptisom kepi chethek-longle.)

¹⁷Pima Baptisom kepiji aphanle Khristo neliphan neketoi kali, bonta Birta Keme kepachethangji aphansi Khristo neliphan netoilo. Khristo thengparpan athak akethi ke thang ajakongta ave, lason keplangpledetjisi neli monit agian pen Birta Keme thanthedet-lo.

¹⁸Pima kevirbom atum aphan ke, Khristo thengparpan athak kethi ke kelu alamlo; bonta ili kejok kelongbom atum aphan ke, lake Arnam ajakong-lo.

¹⁹Pima hastro along tok-lo, “Neli giani atum agian pavirji, lapen abidi kedo atum abidi thangta kalidet paplangji.”

²⁰Tangte giani abang konat-lo? Aron thekser abang konat-lo? Kalite, labangso apirthe athak lam kechedan thekser atum konat-lo? Labangso apirthe agian ke akelu alamlo pusi Arnam paklangtang-lo, kalima?

²¹Pima monit atum amethang agian pen Arnam aphan kechini un-edetji aphansi Arnam amethang agian pen la klemlo. Bonta la nelitum kepache-thang, atheke akelu alam pen ajoksi Arnam ke kekroi atum aphan kepajokji aning hang-lo.

²²Pima Jihudi atum ke ahok aporman kelongji aphan kemanghumeme angthek hei hei hang-lo, lapen Grik atum ke giansi rilo.

²³Bonta nelitum ke thengparpan athak kethi abang, Khristo alamjirsi than-pachethang-lo. Jihudi atum aphan ke lake kepatekung-i amarlo, lapen Jihudi kalidet atum aphan ke lake kelu alamlo.

²⁴Bonta Arnam kephatang atum aphan ke, Jihudi tame kalite, Jihudi kalidet atum settame, Khristo ke Arnam ajakong lapen agianlo.

²⁵Pima monit atum agian apar Arnam akelu remulo, lapen monit atum ajakong apar Arnam ajakong kave ingtangmulo.

²⁶Kortemarli atum, Arnam nanglitum aphan nangkepha ahut nanglitum kopuson amonit loma, lale chemathanon. Monit atum akematha anat penle langdamlote nanglitum angbong giani, jakong kedo lapen kur kangtui atum ong-e.

²⁷Bonta giani atum aphan kepatherakjisi pirthe athak akelu atum aphan Arnam ingvailo lapen ajakong kedo atum aphan kepatherakjisi pirthe athak ajakong kave atum aphan ingvailo.

²⁸Pirthe aron ateng pen kethe kechekrong atum aphan thangta kalidet kepaplangjisi pirthe athak akur kangdei, kelangremrok lapen thangta kalidet atum aphan Arnam ingvailo.

²⁹La apotsi Arnam angno baduta chepindak un-elo.

³⁰Bonta Arnamsi nanglitum aphan Jisu Khristo pen nangpachelangpet-lo, lapen Arnam Ilitum aphan Jisu Khristo pen ajoksi giani, dhoromi epaplang-lo, epangthirlo, lapen pap pen epejok-lo.

³¹Lasi hastro along ketok asonthotsi, “Kechepindakji aning kehang abang ke Hemphu keklemtang akam apot-le pachepindaknang.”