Read Karbi 1 KORINTH 11 Bible Online

1 KORINTH 11 - Karbi bible

1 KORINTH 11

¹Neli Khristo along ke charlidun asonthot-le nanglitumta neli long nangcharlidunnon.

²Nanglitum kaiketa neliphan chema-thaverlo, lapen neli nanglitum aphan kethan alam larledetsi kroipamelo apotsi neli nanglitum aphan rolo.

³Bonta Khristo ke anut-tin aphuthak ajakong do, pinso atum amethang methang apiso atum aphuthak ajakong do lapen Khristo aphuthak Arnam ajakong do; labangso alam nanglitum kechinijisi neli ning hang-lo.

⁴Lasi pinso amonit aphu chekurkisi Arnam ardomlote, kalite Arnam alam thanlote alangli Khristo aman pavirlo.

⁵Lapen inut arloso aphu chekurkikesi Arnam ardomlo, kalite Arnam alam thanlote labangpi ke amethang apenan aman pavirlo. Labangpi ke inut achu kechesoilong arloso pen thang akeprekta avelo.

⁶Inut arloso aphu chekurkikete alangli achuta pachesoilong nang. Bonta inut arloso achu kechingtip, kalite achu kechesoi ke ketherakmeme alamlo. La apotsi alangli aphu pachekurkinang.

⁷Pinso amonit ke aphu chekurki nangnelo, pima alanglisi Arnam a-arje lapen adak atur paklang-lo. Bonta arloso ke pinso adak atur paklang-lo.

⁸Pima arloso penle pinso aphan kepinchong kali, bonta pinso pensi arloso aphan pinchong-lo.

⁹Lapen arloso aphan ajok-le pinso aphan kepinchong kali, bonta pinso aphan ajoksi arloso aphan pinchong-lo.

¹⁰Lasi sining apherangke atum pen apot, arloso aphuthak apenan abang ajakongdo, la keklangdakji aphan arloso aphu chekurki nangji.

¹¹Bonta non ilitum Hemphu pen kechelangpet pen kedo ahut pinso avete arloso anchot ke chokche, lapen arloso avete pinso anchot ke chokche.

¹²Pima pinso pensi arloso aphan pinchong-lo asonthotsi pinsota arloso pensi amahang thek-lo. Bonta kadokave amarta Arnamsi paplang-lo.

¹³Arnam aphan kero karcho ahut inut arloso aphu chekurkikesi Arnam ardomlote lake mesen a-otma, mate kalima, lake nanglitum methangle ingsainon.

¹⁴Pinso amonit achu keding kechebike ketherakmeme alamlo, lake ilitum kelang pen amatta chinilo,

¹⁵bonta inut arloso achu keding dolote, lake alangliphan alon kedojot amarlo, pima alangli chu keding ke alangliphan kedip-i amarlo.

¹⁶Bonta komane abang jongsi labangso alam kehiliji aning hang-lo tangte, neli kepuji alam lahelo: nelitum lapen Arnam amondoli mate kroi-asong atumta la apar ke Arnam aphan kero karcho aron akaprek avelo.

¹⁷Non neli kethanji alam along neli nanglitum aphan ro thekthe, pima nanglitum kechingrum pen ajok keme muchotji kali hingnothumuchot-lo.

¹⁸Aphrangsi alam lahelo, mondoli kechingrum ahut nanglitum angbong abe abe dolo, lake neli arjulong-bomlo, lapen labangso alam angbong penang alam ke ahok pusi neli kroilo.

¹⁹Pima nanglitum angbong ahok keklem abang keklangdakji aphan nanglitum angbong lason abe abe do nangkok-lo, lake ahok alamlo.

²⁰Nanglitum kechingrum ahut nanglitum Hemphu a-Ansi cholo, lapu kali.

²¹Pima nanglitum kecho ahut nanglitum lahin lahin aphan chinghonghesi nangmethang methang a-an chechorep-lo. Lasi penang atum ke an ingchirsi dolo, lapen penang atum ke hor ingrilo.

²²Nanglitum kecho kejunji aphan nanglitum methang ahem avedetma? Kalite, nanglitum Arnam amondoli mate kroi-asong aphan langremjima, lapen kecho-kejun amar kavedet atum aphan patherakjima? Labangso alam apot neli nanglitum aphan pisi pu apot-loma? Neli nanglitum aphan ro apot-loma? Lapu kali. Labangso alam apot ke neli nanglitum aphan rothekthe.

²³Pima neli Hemphu pen kelong alamsi nanglitum aphan thanlo; atheke Hemphu Jisu aphan hotur arideng kehodai aningve Jisu him eplang ensi lapen

²⁴Arnam aphan kero pisi la beng-lo, lapen pulo, “Nangtum aphan lake nebang arpumlo. Nangtum nephan kechemathathujile la klemnon.”

²⁵Lapen lasonthotsi labangso a-An chodet aphi alangli harlungta ensi pulo, “Labangso aharlung ke nevi pen sap kethengtang, Arnam kechechak aron kemilo. Nangtum la kejun abataitin nephan kechemathathujile junnon.”

²⁶Pima Hemphu vangvetik an nanglitum labangso ahim kecho lapen labangso aharlung pen kejun abataitin nanglitum Hemphu kethi alam than pachethang-lo.

²⁷Lahelo, badutame Hemphu aphan aman kepipe, lason a-ot pen Hemphu ahim cholo, kalite aharlung pen junlo tangte, labangso abang ke Hemphu abang arpum lapen avi aputhak adai do.

²⁸Lasi abangphutinta aphrang-ke amethang methang aphan asat chelangpame nangji, lapen labangso aphisi labangso ahim cho nangji, lapen labangso aharlung pen jun nangji.

²⁹Pima komane abang jongsi Hemphu abang arpum alam matha-dam pamemera labangso ahim cholo lapen labangso aharlung pen junlo tangte, alangli la kecho lapen kejun pen ajok amethang aphuthak kangsai chevanlo.

³⁰Laso apotsi nanglitum angbong ake-ongpi atum ok ajakong avelo, sodet-lo lapen penang atum ke thilot-lo.

³¹Bonta laso aphrang ilitum methang methang aphan asat chelangpame asonte, ilitum Arnam akangsai phophedetji.

³²Bonta mo Hemphu pirthe aphan kangsaiji ahut ilitum aphan ado kepadodedetji aphansi alangli non ilitum aphan ingsaisi aduk epilo.

³³Lasi korte marli atum, nanglitum Hemphu a-An kechojisi kechingrum ahut nanglitum lahin lahin aphan chinghonnon.

³⁴Lapen nanglitum kechingrum ahut, nanglitum Arnam akangsai kephophedetjile, komane abang jongsi an ingchirlo tangte alangli amethang ahemle an pachechonang. Lapen hala ason kaprek alam ke, neli mo nanglitum along kevang ahutsi, nanglitum keklem nangji akam an neli nangthanpo.