Read Karbi 1 KORINTH 12 Bible Online

1 KORINTH 12 - Karbi bible

1 KORINTH 12

¹Nonke Karjong Kangthir kepi adan hei hei alam nanglitum kechinijisi neli ning hang-lo, neli korte marli atum.

²Nanglitum Arnam aphan kekroikrelang ahut ke, nanglitum aphan chethe kavedet akumlin hei hei aphan kepardomjisi nanglitum aphan japonthap-lo, lake nanglitum chinilo.

³Arnam a-Karjong pen keningje abang ke, “Jisu aphuthak ahirjuno padonang” pu pu-un-e, lapen Karjong Kangthir pen ajok kali tangte, baduta “Jisu ke Hemphulo,” pu pu-un-e; nanglitum labangso alam kechinijisi neli ning hang-lo.

⁴Karjong adan ajat ajat do, bonta inutpet akarjongsi lahei hei adan pilo.

⁵Hemphu aphan keklem pi atovar akaprek kaprek do; bonta Hemphu inutnat aphansi klempilo.

⁶Kam keklem abidi akaprek kaprek do, bonta inutnat Arnamsi abangphutin aphanta amethang methang akam kecheklemji aphan abidi pilo.

⁷Kadokave atum aphan ale aphan abangphutin alongta Karjong do, lake Arnam paklangdak-lo.

⁸Karjongsi inut aphan ke gian keplengset alam keningjethek adan pilo, lapen la inutpet akarjongsi anut kaprek aphan ke bang aphan lam kethan pachinidakthek adan pilo.

⁹La inutpet a-Karjongsi inut aphan kekroi thek adan pilo, lapen anut kaprek aphan ke keso kepamethek adan pilo.

¹⁰Labangso a-Karjongsi inut aphan ke kemanghumeme akam keklemthek adan pilo, anut kaprek aphan ke Arnam alam kemontrithek adan pilo, lapen anut kaprek aphan ke Karjongpensi kevang adanma, mate kalima, la kangvaithek adan pilo, anut kaprek aphan ke kecheninedet alam keningjethek adan, lapen anut kaprek aphan ke labangso alamthe kepachinithek adan pilo.

¹¹Bonta la inutnat a-Karjongsi la kadokave klemlo; alangli ning kehang atengsi abangphutin aphan akaprek kaprek adan pilo.

¹²Isi abang arpum a-ok athan do-o; bonta akaprek kaprek a-ok athan hei hei pensi bang arpum plang-lo setta abang arpum ke isinat-lo. Khristota la isi abang arpum asonthot-lo.

¹³Lasonthotsi Jihudi atum tame, kalite Jihudi kalidet atum tame, ban atum tame, kalite ban kalidet atum settame; ilitum kadokaveta isipet abang arpum keplangjisi ilitum aphan inutpet a-Karjong pensi baptisom epilo. Lapen ilitum kadokave kejunji aphan inutvet a-Karjong epitang-lo.

¹⁴Pima isi abang arpum a-ok ethanvet, lapu kali, bonta a-ok athan do-o.

¹⁵Kengpak jongsi, “Neli ke ri kali, la apotsi neli ke bang arpum a-ok athan kali,” pu pu setta, lake bang arpum athan kalidetji, lapu kali.

¹⁶Lapen no jongsi, “Neli ke mek kali, la apotsi neli ke bang arpum a-ok athan kali,” pu pusetta, lake bang arpum a-ok athan kalidetji, lapu kali.

¹⁷Bang arpum jongsi mek saide tangte, la kopusi arjulongjima? Lapen bang arpum jongsi no saide tangte, la kopusi ingnimthekjima?

¹⁸Bonta nonke Arnam aning kehang asonthotsi bang arpum along akaprek kaprek a-ok athan bitang-lo.

¹⁹A-ok athan an ethan anchot lote, bang arpum avedetpo!

²⁰Bonta nonke a-ok athan do-o setta bang arpum ke isipet-lo.

²¹Lasi mek ke ri aphan, “Neli nangliphan akenang ave”, pu pu un-e. Lapen phuta keng hongni aphan “Neli nanglitum aphan akenang ave” pu pu un-e.

²²Bonta hala ajakong kave muchot nangnak a-ok athan hei heita ilitum aphan akenang sot-lo.

²³Lapen aman kave muchot pu ilitum kematha a-ok athan aphansi ilitum ora muchot-lo; lapen rat angno kechepaklang-dunmeme kalidet a-ok athan hei hei aphansi ilitum kepin-deng alon pimuchot-lo.

²⁴Rat angno kechepaklang-dunmeme muchot a-ok athan hei hei aphanta lason akepindeng akenang avelo. Bonta Arnam la aman kavedet nangnak a-ok athan hei hei aphan aman pimuchot pensi bang arpum pacheraphet-lo.

²⁵Lasi bang arpum akechekak avelo, bonta a-ok athantinta lahin lahin aphan akechematha dolo.

²⁶Bang arpum a-ok athan hei hei angbong pen ethan abang aduk dolote, kadokave athanta aduk dodunrappet-lo; lapen a-ok ethan abang aman long-lote, kadokave athanta chehokdunrap rap-lo.

²⁷Nanglitumke Khristo abang arpumlo, lapen nanglitum abangphutin ke labangso abang arpum a-ok athan ethan thanlo.

²⁸Arnam kadokave aphanta mondoli angbong amethang methang adim bipilo: aphrangke ketoi-tang atum, labangso adun ke Arnam alam Kemontri atum, labangso adun ke kuru atum, labangso adun ke kemanghumeme akam keklem atum, labangso adun ke keso kepame adan kelong atum, kerap atum, kepangri atum, lapen kechininedet alam keningje atum.

²⁹Kadokave atum ketoitang atumma? Kadokave atum Arnam alam kemontri atumma? Kadokave atum kemanghumeme akam keklemthek atumma?

³⁰Kadokave atum keso kepame adan doma? Kadokave atum kechininedet alam puthekma? Kadokave atum kecheni-nedet alam athe than thekma?

³¹Bonta nanglitum memuchot adan hei hei kelongjile matha-ebomnon. Lapen neli nanglitum aphan akemenei atovar nangpaklangpo.