Read Karbi 1 KORINTH 14 Bible Online

1 KORINTH 14 - Karbi bible

1 KORINTH 14

¹Tangte nanglitum kanghon aphanle hungnon. Karjong adan hei hei kelongjile, jasemet ke Arnam alam kemontri adan kelongjile matha-enon.

²Kechininedet alam keningje abang ke monit aphanle kepu kali, bonta Arnam aphansi pulo, pima baduta alangli kepu alam chinine: alangli Karjong ajakong pensi akepatu ahok alam pulo.

³Bonta Arnam alam kemontri abang ke monit atum aphansi pulo lapen lake halatum aphan a-ot adur pame, aning pathe lapen aning papli.

⁴Kechinine alam kepu abang ke amethang a-ot adursi chepamechot, bonta Arnam alam kemontri abang ke mondoli a-ot adur pame.

⁵Nanglitum kadokaveta kechininedet alam kepujisi neli ning hang-lo, bonta la aparte nanglitum Arnam alam kemontrijisi neli ning hangmulo. Pima mondoli a-ot adur kepameji aphan kechininedet alam athe kethanthek abang ave tangte, kechininedet alam kethan apar Arnam alam kemontri ale domu.

⁶Lasi kortemarli atum, mo neli nanglitum along kevangji ahut neli jongsi kopine Arnam kepaklang alam thanthe, kalite kopinene kechini nangji alam thanthe, kalite kopinene Arnam pen kevang alam montritre, kalite kopinene kecharli nangji alam thanthe, bonta kechininedet alam hei heisi ningjechot-lo tangte nanglitum aphan kopi ale dojima?

⁷Pongsi, kalite kum, lason achethe kave amar jokta kerot, kalite kebut ate-ot pachinidakdete la kopisi kebut, kalite kopisi kerotma, lake kopu-sonsi chinithekjima?

⁸Lapen ron apong-ut kebut abangta kebut arki pachinidakdete komatsi ron kechedanji aphan chesikjima?

⁹Nanglitumta lason thak thak-lo, atheke nanglitum jongsi kechininedet alam pen kechini thekthe alam pulo tangte kopusi nanglitum kepu alam athe chinijima? Pima lake nanglitum tomon aphan kepu asonthak thak cheplangji.

¹⁰Pirthe athak ason kaprek kaprek alam do-o, bonta alam athe kavedet alam ke esonnatta ave.

¹¹Bonta neli jongsi hala keningje alam athe chinine tangte, hala keningje abang angno ke neli kaprek adet amonit asonthak thak-lo, lapen neli ingno ke alanglita akaprek adet amonit asonthak thakpo.

¹²Lahelo, nanglitum Karjong adan kelongji ning hang-o apotsi nanglitum jasemet ke mondoli a-ot adur kepamethek adan pen keklemjile bor-inon.

¹³Lahelo, kechininedet alam kepu abang amethang kepu alam athe kethanpame thekji aphan kechinine alam athe kethan pajirmithek adan Arnam pen pachohangnang.

¹⁴Pima neli jongsi kechinine alam pen Arnam ardomlo tangte, neli karjong ke ardomlo setta neli ningke la pen ajok thang ale longdundelo.

¹⁵Tangte neli kopisi keklem nangpo? Neli karjong pensi ardompo, bonta neli ning penta neli ardomdunpo, neli karjong pensi neli lun lunpo, bonta neli ning penta neli lun lundunpo.

¹⁶Nangli jongsi Arnam aphan karjong pensi kero pichot-lo tangte, hadak nangkechingrumdun, kekroi ajakong kekom abang ke nangli kepu alam athe chininete nangli kero akardom kepi ahut alangli kopusi, “Amen” pu nangpudunthekpoma?

¹⁷Pima nanglike Arnam aphan kero akardom kepi pamesen tahailo, lake ahok-lo, setta hala anut kaprek aphan ke a-ot adur pamemedet-lo.

¹⁸Neli Arnam aphan chorolo, pima nanglitum apar neli kechinine alam ningjemulo.

¹⁹Tebonta neli mondoli along kechinine alam thesuri kep kepu mute neli anut kaprek atum aphan kethan kepachiniji aphan alam athe kechini un alam thephoh kepuchotjisi neli ning dok-lo.

²⁰Korte marli atum, nanglitum aning kematha osomar atum ason cheplangri. Kehingno akam anat ke nanglitum osomar atum asonle cheplangnon, bonta ning kematha anat ke nanglitum arta kedo pame atum asonle cheplangnon.

²¹Hastro along tok-lo, “Hemphu pulo, kechinine alam pen kepu amonit atum pen ajok, lapen kaprek adet amonit atum angtur pen ajoksi neli nelimethang amonit atum aphan pupo; bonta halatum neli lam arjujedetji.”

²²Tangte lahelo, kechinine alam kepu adan ke kekroikre atum aphan isi angthek-lo, kekroi atum aphan kali; bonta Arnam alam kemontri adan ke kekroi atum aphan angthek-lo, kekroikre atum aphan kali.

²³Tangte mondoli elong adim kechingrum ahut abangphutinta kechi-nine alam pulote, lapen halabangso ahut kekroihoi atum, kalite kekroikre atum nanglutdunlote, nanglitum ingchamjamlo pusi halatum puji, kalima?

²⁴Bonta jongsi abangphutinta Arnam alam montrilo, lapen hala-bangso ahut komane kekroikre, kalite kekroihoi abang nanglutdunlo tangte, alangli nangkarjudunlong alam an pen ajok alangli amethang apap chechiniji. Alangli nang karjudunlong alam an alangliphan ingsaiji,

²⁵lapen alangli ning arlo kepatujoi alam an klangdakji, lapen alangli domkhrupsi Arnam aphan ingduk-ardomji, lapen aning chekobirsi puji, “Nanglitum angbong Arnam do binong!”

²⁶Tangte neli kepudam lahelo, korte marli atum. Nanglitum Arnam aphan kardom-kangdukjisi kechingrum ahut inut abang lun palun nang, anut kaprek abang lam pathan nang, anut kaprek abang ke Arnam kepaklang alam papunang, anut kaprek abang ke kechinine alam papu nang; lapen anut kaprek abang ke kechinine alam athe pathannang; bonta la kadokaveta mondoli kepameji aphanle paklemnang.

²⁷Mane abang jongsi kechinine alam kepuji mathalo tangte, bang hini, kalite ongmunei setta bang kethom anle papuchotnang, lapen inut pen aphi inut-le papunang; lapen mane abang labangso alam athe pathan pajirminang.

²⁸Bonta jongsi alam athe kethan pajirmithek abang ave tangte, hala kechinine alam kepu abang padojoinang, lapen amethang lapen Arnam aphanle papuchotnang.

²⁹Arnam alam kemontri atum bang hini, kalite bang kethom anle pathanchotnang, lapen anut kaprek atum la kemontri alam pamunthidunra pangvainang.

³⁰Bonta hala kechingrum angbong kedo komane abang jongsi Arnam pen kopine alam long-lo tangte, hala lam kethanbom abang padojoinang.

³¹Nanglitum abangphutinta kecharli longji lapen ning kethe kelongji aphan nanglitum kadokaveta lason inut pen aphi inut Arnam alam montri tame.

³²Arnam alam kemontri atum Arnam alam kemontri aning kechekhang un ajakong do nangji.

³³Pima ilitum keklemjam ke Arnam aning hanghe, bonta ning isipet pen kechi-i-kling, lapen ning kangsam pen kedo, lasi Arnam aning kehang. Kangthir atum amondoli mate kroi-asong along an asonthotsi,

³⁴mondoli angbong ke arloso atum dojoi nangji. Pima halatum pu longlelo, bonta Jihudi atum Aron asonthotsi halatum pinso atum arum do masi.

³⁵Bonta halatum kopine alam kechiniji aning kehang do tangte, halatum ahemle amethang methang apenan aphan pacharjunang. Pima mondoli angbong arloso atum lam keningjedun ke ketherakmeme alam.

³⁶Kalite Arnam alam nanglitum along pen tong kevangma? Kalite nanglitum alongsi labangso alam kevangchotma?

³⁷Komane abang jongsi inut Arnam amontrilo, kalite karjong adan do pu amethangsi chemathalo tangte, neli nanglitum aphan ketok alam anke Hemphu ahukumlo pule alangli pamathanang.

³⁸Bonta alangli jongsi la kroi ingtungte tangte, alangliphanta nanglitum kroi nangnelo.

³⁹Tangte lahelo, kortemarli atum, Arnam alam kemontri adan kelongjile matha-ebomnon, bonta kechinine alam kepu khangri.

⁴⁰Kadokave asonta kematha pame pen lapen athikpet penle klem masi.