Read Karbi 1 KORINTH 15 Bible Online

1 KORINTH 15 - Karbi bible

1 KORINTH 15

¹Lapen nonke, neli nanglitum aphan kepachethangtang lapen nanglitum dengsi kekroithipbom a-Birta Keme alam nanglitum aphan kepachematha-thujisi neli ning hang-lo, kortemarli atum.

²Neli nanglitum aphan kethan-kepachethang alam, atheke birta keme nanglitum jongsi otthipbom tangte, labangso pen ajok nanglitum kejok long-lo. Bonta jongsi lapuson kali tangte, nanglitum kroinak-lo. Bonta nanglitum akekroi jongsi ahok kali tangte, nanglitum kejok longledetji.

³Neli kelong ake-nangsotnei alam, atheke hastro along ketok atengsi Khristo ilitum apap hei hei pen apot thilo pu alamsi neli nanglitum aphan thanlo.

⁴Atheke alangliphan pipdet-lo lapen nithom aphi parengthusi pathurlo;

⁵lapen alangli Pitor aphan cheklang-lo, lapen labangso aphi alangli ketoitang bangkrehini atum aphan cheklang-lo.

⁶Labangso aphi alangli alangliphan kekroi bang pharopho sose atum aphan elongpet adim cheklang-lo. Halatum angbong ongmuchot atum non anta reng-etbomlang, bonta penang atum ke amek jangpametang-lo.

⁷Labangso aphi alangli Jems aphan cheklang-lo lapen labangso aphi alangli ketoitang atum an aphan cheklang-lo.

⁸Kadokave aphisi alangli neliphan, atheke ahut chokche ako amahang kethek ason abang aphan cheklang-lo.

⁹Pima ketoitang atum angbong akebinei abang neli helo. Neli ke ketoitang abang pu amen kelongji a-otta ave, pima neli Arnam amondoli mate kroi-asong aphan chenek-lo.

¹⁰Bonta Arnam akangjinso pen ajok pini neli lapuson plang-lo, lapen alangli neliphan nekepi akangjinso ale avedet-lo, lapu kali. Athe pima, ketoitang atum an apar neli kam keklem chepadukmulo; bonta lake neli methangle keklem kali, neli long kedo Arnam akangjinsosi la klemlo.

¹¹Tangte lahelo, neli tame, kalite halatum settame, nelitum kadokaveta la esonpet alamsi than-pachethang-lo lapen nanglitum labangso alamsi kroilo.

¹²Nelitum jongsi Khristo ke kethitang atum angbong pen thurtang-lo pusi than-pachethang-lo tangte, nanglitum angbong manene atum kopusi kethitang atum akethur ave pu kepu thekma?

¹³Jongsi kethitang atum akethur ave, tangte Khristo aphanta pathurthedet tang-lo,

¹⁴lapen jongsi Khristo aphan pathurthedet tang-lo tangte, nelitum kepachethang alamta thang ale ave, lapen nanglitum akekroita thang ale avelo.

¹⁵Hala aparta nelitum Arnam alamjir kechobei ahaki atum plangtang-lo, pima Arnam Khristo aphan kethitang atum angbong pen pathurtang-lo pusi nelitum thanlo, bonta kethitang atum aphan pathurthe pu alam jongsi ahok tangte, alangli Khristo aphanta pathurthedet-lo.

¹⁶Pima kethitang atum aphan jongsi pathurthe tangte, Khristo aphanta pathurthedet tang-lo.

¹⁷Lapen Khristo aphan jongsi pathurthedet tang-lo tangte, nanglitum akekroita thang ale avelo, lapen nanglitum methang methang apap hei hei diya longlelang.

¹⁸Jongsi lapulo tangte Khristo aphan kekroi atum angbong pen kethitang atumta virdet-tang-lo.

¹⁹Jongsi ilitum Khristo aphan ning akechethe ke non chethe dotik an aphan chot-lo tangte, pirthe athak ilitum apara kangjinsomemenei amonit apakta avelo.

²⁰Bonta Khristo aphan kethitang atum angbong pen pathurtang-lo, lake ahok binong-lo: lapen lake kethitang atum aphan pathurvekji pu angthek-lo.

²¹Pima inut amonit pen ajoksi kethi vang-lo asonthotsi inut amonit pen ajoksi kethitang atum akethurta vang-lo.

²²Pima Adam pen ajok kadokave atum kethinang asonthotsi Khristo pen ajok kadokave atum rengthusi thurji.

²³Bonta abangphutin aphanta alangli kepathiktang aron ateng pensi pathurji. Kadokave aphrangke Khristo aphan, labangso aphi alangli kevangthuji ahut alangliphan kekroi atum aphan pathurji.

²⁴Labangso aphisi, labangso akai akejut vangji; hala kepangri akarjong atum aphan, ajakong kelong atum an aphan lapen ajakong kedo atum an aphan Khristo paremsi Po Arnam arideng rat hodaiji.

²⁵Pima Arnam ahotur atum an aphan Khristo akengpak arum bibetik ke Khristo rat pangri nangji.

²⁶Alangli kepavir kepaduji ahotur ke kethi helo.

²⁷Pima hastro pulo, “Arnam kadokave asonta alangli kengpak arum bilo.” Tebonta “Kadokave ason” pu alam ke, Arnam, atheke kadokave ason Khristo akengpak arum kebi abang aphan ke pangromponpe, lake klangdak-lo.

²⁸Bonta kadokave ason Khristo aber bidet-lote alangli methang, atheke Sopo amethang amatta Arnam aber, atheke kadokave ason alangli ber kebi abang aber doji; lapen Arnam kadokave aphan pangripetji.

²⁹Jongsi lapu kali tangte, kethitang atum apharman baptisom ke-enpi atum kopi ale doma? Jongsi kethitang atum aphan pathurthe tangte, halatum apharman baptisom ke-enpi athe kopima?

³⁰Lapen nelitum kopi athesi aporphai-tin keduk kesung chechak-loma?

³¹Kortemarli atum, neli arnivangta bang arideng kethi nangji, lason akepherememe do. E-Hemphu Jisu Khristo pen ilitum kechelangpet pen ajok neli nanglitum pen apot kechepindakji ason do apotsi neli labangso alam paklang-lo.

³²Neli jongsi monit aron asonthotsi Ephesas along “Marat api” atum pen chedanlo, tangte neli kopi ale doma? Jongsi kethitang atum thurthe tangte monit atum kepu asonthotsi, “Ilitum cholonang, junlonang; pima penap ilitum thiji.”

³³Nanglitum aphan nangpamanghu longri. “kehingnodak ajirpi jirpo atum mesen a-ot adur pahingno un.”

³⁴Nanglitum athikpet aning anat vangthunon, lapen pap klemrinon. Nanglitum aphan kepatherakjisi neli labangso alam pulo, pima nanglitum angbong manene atum Arnam aphan chininelo.

³⁵Bonta mane abang arjuji, “Kethitang atum aphan kopusonsi pathurpoma? Halatum abang arpum kopusonjima?”

³⁶Kelu abang! Nangli longle athak kerik achilita thithete arong vangve.

³⁷Nangli kerik ke amu saidechot-lo, sok tepli amu tahai, kalite ason kaprek amu tahai; nangli arong kethele ke-e kali.

³⁸Bonta Arnam amethang aning kehang atengsi halabangso amu aphan abang arpum pilo; alangli amutin aphan amethang methang akenang atengsi abang arpum pilo.

³⁹Lapen kereng api an a-ok ejatpet-lo, lapu kali; monit atum a-ok-le ejat, marat api atum a-ok-le ejat, vo atum a-ok-le ejat lapen lang a-ok atum a-ok-le ejat-lo.

⁴⁰Sining athak ason ason amar do, lapen pirthe athakta ason ason amar do. Bonta sining amar adak atur ke pirthe amar adak atur pen chingbarbe.

⁴¹Arni adak aturle ejat, chiklo adak aturle ejat lapen chiklo longso atum adak aturle ejat-lo. Lapen chiklolongso atum angbongta adak atur prekjamlo.

⁴²Kethitang atum aphan pareng-thusi kepathurji ahutta lasonthotpo. Bang arpum kepip ahut ke lake kevir undet abang arpumlo; bonta mo pathur lote lake kevirvepinji abang arpum plangpo.

⁴³Kepip ahut ke la langnodak lapen ajakong ave, bonta mo pathur lote la langmesen lapen ajakong thedungji.

⁴⁴La aphan kepip ahut ke la ok abang arpumchot-lo; bonta la aphan mo pathur lote lake karjong abang ar-pumpo. Okchot abang arpum do apotsi karjong abang arpumta do.

⁴⁵Pima hastro pulo; “Aphrangsi amonit, Adam aphan ke kereng-et abang paplang-lo;” bonta aphisi a-Adam ke chethe kepi akarjong-lo.

⁴⁶Karjongle kevang paphrang kali, oksi vang paphrang-lo; labangso aphisi Karjong vang-lo.

⁴⁷Aphrangsi a-Adam aphan ke longle pensi pinchong-lo lapen pirthe pensi vang-lo; aphisi a-Adam ke sining pensi vang-lo.

⁴⁸Longle amonit ke longle pensi kepinchong amonit asonthak thak lapen sining amonit atum ke sining pen kevang abang asonthak thak-lo.

⁴⁹Longle pen kepinchong amonit a-arje ilitum kechepindeng asonthotsi sining pen kevang amonit a-arjeta ilitum chepindengji.

⁵⁰Neli kepudam alam lahelo, kortemarli atum, a-ok lapen avi kedo penke Arnam a-Rat chepahemphudun longle, lapen kethi un ason ke kethi un-e ason chepahemphu un-e.

⁵¹Neli nanglitum aphan eson akedip ahok alam nangthanpo, arjutha: Ilitum kadokave amat ke thi-et-ejilang,

⁵²bonta mo kejutsi apong-ut kebut ahut, ilitum kadokaveta men men, emeksiripsi e-arje chelardetji. Pima pong-ut butji lapen kaita kevir un-epinji aphan kethitang atum aphan pathurji.

⁵³Pima la kevir undet abang arpum aphan kevir un-e pin abang arpum paplangji, lapen kethi undet abang arpum aphan kethi un-epin abang arpum paplang nangji.

⁵⁴Lasi mo la kevir undet abang arpum aphan kevir un-epin abang arpum paplang-lote, lapen labangso kethi undet abang arpum aphan kethi un-epin abang arpum paplang-lote, hastro alam chekokpo, atheke hastro pulo, “Kethi virtang-lo; kethi aphan haipame tang-lo!”

⁵⁵“O kethi, nang kehai konatma? O kethi, nang jokkasu konatma?”

⁵⁶Kethi ajakong ke pap helo, lapen pap ajakong ke Aron helo.

⁵⁷Bonta e-Hemphu Jisu Khristo pen ajok ilitum aphan ekepahai abang Arnam aphan ili rolonang!

⁵⁸Tangte lahelo, neli kechinghon akortemarli atum, ning thirklong pen dothipnon. Kaiketa Hemphu aphan klempinon, pima Hemphu aphan keklempi ke ale avedetde, lake nanglitum chinilo.