Read Karbi 1 KORINTH 16 Bible Online

1 KORINTH 16 - Karbi bible

1 KORINTH 16

¹Jerusalem arongsopi kedo kang-thir atum aphan dan kerungpi alam lahelo: Galasia adet amondoli mate kroi-asong atum aphan neli kepaklemtoi asonthot-le nanglitumta klemnon.

²Neli mo kevangji ahut nanglitum dan kechirung jokphlotji aphan hithi aruitin aphrang arni nanglitum abangphutin kelong atangka atengle birtinon.

³Mo neli nanglitum along vang-lote, nanglitum kangvaitang amonit atum aphan neli kepachini aloh pisi nanglitum adan kepaponji aphan neli halatum aphan Jerusalem toipo.

⁴Nelita jongsi hadak kedamsi akemeji pulote, halatum neli long nangdun unpo.

⁵Neli Masedonia adet vurdamdet aphisi nanglitum along vangji, pima neli Masedonia adet vurdamjilang,

⁶lapen neli kedamji adim aling nanglitum neliphan nekerapdunthekji aphan neli nanglitum along penang arni an dokok tahai, kalite ningkreng esek an dokokji tahai.

⁷Pima neli nanglitum along kevurphlichotji aphan ning hanghe; Hemphule tovar thote, neli nanglitum along penang arni do longji pusi neli ning thelo.

⁸Bonta sok kerot ketang achojun amei ahut anke neli ladak Ephesas arongsopisi dojilang.

⁹Pima neliphan kekhamkhe atum do-o setta ladak thedung lapen ale kedo akam keklemji aphan neliphan inghap ingputang-lo.

¹⁰Mo Timothi jongsi nanglitum along vang tangte, alangli nanglitum angbong phereredet pen kedothekjile nanglitum alangliphan langpamenon. Pima nelisonthotsi alanglita Hemphu akam klembomlo.

¹¹Nanglitum baduta alangliphan langret nangnelo; bonta alangli ning ingsamjin pen nelilong kevangthujile nanglitum alangliphan rap dunnon, pima korte atum pen pen neli ke alangliphansi tovar cholang-lorlo.

¹²Non, ekorte Apollos alam lahelo; Khristian akorte atum pen pen alangli nanglitum along kevangji aphan neli alangliphan abatai batai choningrilo, bonta non amat ke alangli kevangji asapta aning hanghe. Bonsetta mo ahut keme long-lote alangli vangji.

¹³Nanglitum no kechepangar penle donon, kekroi chepathirklong non, nanglitum pherere-pinnon, kekroi chepangtang-rak non.

¹⁴Nanglitum kadokave akamta kanghon penle klemnon.

¹⁵Nanglitum chinilo, kortemarli atum, Stephanas lapen alangli hem ehum amonit atum helo Akaia alongri Khristian keplang paphrangcheng atumlo, lapen halatum kangthir atum aphan keru kethai akam aphan amethang methang chehodailo. Neli nanglitum aphan choningrilo, kortemarli atum,

¹⁶nanglitum lason amonit atum, lapen halatum along kam kecherapdun lapen kechepadukdun atum alam aling kroinon.

¹⁷Stephanas, Fortunas lapen Akaiakas atum ladak kevang apot neli ning arong-lo: pima nanglitum avedet setta latum dosi chokdet-lo,

¹⁸lapen latum nanglitum aphan ning keparung asonthotsi neliphanta ning parung-lo. Lason amonit atum aphan aman pinon.

¹⁹Asia adet amondoli mate kroi-asong atum nanglitum aphan kardom nangpidunlo. Akuila lapen Prisilla, lapen alanglitum ahem along kechingrumbom amondoli mate kroi-asongta nanglitum aphan ning aklong pen Khristian akardom nangpidunlo.

²⁰Ladak kedo akorte atum anta kardom nangpidunlo. Kangthir akar-u pen nanglitum lahin lahin aphan kardom chepinon.

²¹Neli Polsi, nelimethang ari pen labangso akardom kepi alam tok-lo:

²²Hemphu aphan kechinghonhe abang aling ke hirjuno paphonang. O netum a-Hemphu, vangnon.

²³Nanglitum along Hemphu Jisu akangjinso padonang.

²⁴Nanglitum la Khristo Jisu pen kechelangpet atum an along neli akanghon padonang. Amen.