Read Karbi 1 KORINTH 2 Bible Online

1 KORINTH 2 - Karbi bible

1 KORINTH 2

¹Korte marli atum, neli nanglitum along vangsi Arnam alamjir akepatu ahok alam kepachethang ahut, neli lam kangtui pen, kalite kangtuiving agian pen thanthelo.

²Pima neli nanglitum angbong kedo ahut Jisu Khristo alamjir lapen jasemet ke alangli thengparpan athak kethi alamjir apar ke, kadokave alamta ketengne-etjisi neli ning chepathik-lo.

³Lasi neli nanglitum along kevang ahut neli jakong avelo, lapen kephere pen neli ok klemhurlo.

⁴Monit agian pen kepu akereset alam pen neli thanthedet-lo lapen pache-thangthedet-lo, bonta neli kethan lapen kepachethang alam ke ahok alamlo, lake Arnamsi amethang a-Karjong ajakong pen aporman pilo.

⁵Tangte, nanglitum akekroi ke monit atum agianle kepaklong kalilo, bonta Arnam ajakongsi paklong-lo.

⁶Tebonta karjong anat kangtang pame atum aphan nelitum eson agian alam thanlo. Bonta lake labangso apirthe agian kali, mate labangso apirthe kechepahemphu atum, atheke ajakong nangkavebom atum agian alam kali.

⁷Arnam akepatu agian alamsi neli pachethang-lo. Arnam monit atum aphan labangso alam pachininedet-lo, bonta ilitum Arnam adak atur kelongdunji aphan Arnam pirthe pinchongche ako pen labangso agian ingvailo.

⁸Labangso apirthe kechepahemphu atum ke baduta labangso agian chininedet-lo. Halatum chini asonte, Arnam adak atur kedo abang aphan, atheke keplangcheng a-Hemphu aphan thengparpan athak pathithedetji apot-lo.

⁹Bonta hastro along ketok asonthotsi, “Baduta kethek-longlepinlang, kalite, karjulonglepinlang lapen lason plangji pu baduta kemathathepinlang asonsi. Arnam aphan kanghon atum aphan Arnam ke thikpilo.”

¹⁰Bonta Arnam amethang a-Karjong pen ajoksi ilitum aphan labangso ake-patu alam epaklang-lo. Pima Karjong ke kadokave alamta rithei, Arnam akematha akarsik alam anta ridam.

¹¹Monit amethang akematha alam ke amethangsi chechini; lasonthotsi Arnam akematha alam ke Arnam a-Karjongsi chinichot.

¹²Ilitum labangso apirthe akarjongle kelong kali; bonta Arnam kangjinso pen ekepi adan hei hei ilitum kechinithekji aphan Arnam pen kevang a-Karjongsi ilitum long-lo.

¹³Tangte lahelo, Karjong Kangthir kelongtang atum aphan nelitum karjong alam kethan ahut monit agian pen kevang alam hei hei penke thanthelo, bonta Karjong pen kevang alam hei hei pensi thanlo.

¹⁴Bonta Karjong Kangthir kelongle abang ke Arnam kepi adan hei hei deng un-e: Lason amonit ke hala hei hei alam chinine binong; lahei hei alam ke kelu alamlo pusi alangli matha, pima hala hei hei alam ke karjong ajakong pensi chini unchot.

¹⁵Bonta Karjong Kangthir kedo abang ke kadokave alamta chini un, bonta alangliphan ke baduta ingsai un-e.

¹⁶Hastro along ketok asonthotsi, “Hemphu aning kematha alam matsi chinima? Alangliphan matsi than-pare unma? Bonta nelitum ke Khristo aning kematha asonthotsi mathalo.”