Read Karbi 1 KORINTH 3 Bible Online

1 KORINTH 3 - Karbi bible

1 KORINTH 3

¹Bonta kortemarli atum, Karjong Kangthir kedo atum aphan asonthak thak-ke neli nanglitum aphan pu un-edet-lo, bonta ok aphan kematha atum, atheke Khristo aphan akekroi anat osoheklang atum aphan asonthak thaksi neli nanglitum aphan nangpu nangkok-lo.

²Neli nanglitum aphan moklangsi nangpi nangkok-lo, an kangtang kali, pima nanglitum an kangtang ke chothekthelang.

³Nanglitum non anta ok aphansi mathabomlang. Nanglitum angbong kechelang un-e lapen kechebohong do. La apotsi nanglitum ke ok aning kehang atengsi dobomlang, lapen Arnam aphan kechinine amonit atum asonthak thaksi klembomlang, kalima?

⁴Nanglitum angbong inut abang pulo, “Neli ke Pol asangho,” lapen anut kaprek abang pulo, “Neli ke Apollos asangho;” lasi nanglitum ke Arnam aphan kechinine amonit atum asonsi klembomlo, kalima?

⁵Tangte Apollos komat-lo? Lapen Pol komat-lo? Nelitumke Arnam aban atumchot; nelitum pen ajoksi nanglitum Khristo aphan kroilo. Hemphu nelitum abangphutin aphan nekepaklemtoi akamsi nelitum abangphutinta klembomlo.

⁶Neli elo; Apollos lang chorlo; bonta Arnamsi la pachingjok-lo.

⁷Lasi ke-e abang thangta kali, lapen lang kechor abangta thangta kali, bonta akenangsot ke Arnam helo, pima alanglisi la paching-jok-lo.

⁸Ke-e abang pen lang kechor abang ke thang akeprekta avelo; amethang methang keklem akam atengsi Arnam abangphutin aphan anam piji.

⁹Pima nelitum ke Arnam aphan kam keklempi rap rap atumlo, lapen nanglitum ke Arnam arit, lapen ahemlo.

¹⁰Neli Arnam nekepi adan pen hem kekim thekser abang asonthak thaksi hemthur pangnilo, lapen anut kaprek abang labangso ahemthur athak kimlo. Bonta abang-phutinta kopusonsi kekim ma, lale pachematha pamenang.

¹¹Pima Arnam kepangnitang ahemthur apar ke akaprek ahemthurke baduta pangni un-elo. Labangso ahemthurke Jisu Khristo helo.

¹²Komane abang jongsi ser, rup, adorkeso a-arlong, thengpi, phelang, kalite sok anar pensi labangso ahemthur athak kimlo tangte,

¹³alangli keklem akam klangdakji, pima mo Khristo a-Arni ahut la paklangdakji. Thangbakma halabangso Arni mesi abangphutin akam paklangji. Me halatum akam aporman ensi abangphutin akam kopusonma, lake paklangdakji.

¹⁴Hala hemthur athak kekim ahem jongsi me chodetde tangte, alangli anam longji.

¹⁵Bonta inut abang kekim ahem jongsi me chodet tangte, alangli klemnakpo; alangli methang ke jokphlotji, bonsetta me pen kejokchit asonthak thakji.

¹⁶Arnam aphan kardom-kangduk adim, kardom ahem kangthir ke nang-litum helo, lapen Arnam a-Karjong nanglitum along do, pu nanglitum chini binong-lo, kalima?

¹⁷Mane abang jongsi labangso ahem pavirlo tangte, Arnam alangliphan pavirji. Pima kardom ahem ke ingthir-et, lapen labangso akardom ahem ke nanglitum helo.

¹⁸Nanglitum baduta chepaluri. Nanglitum angbong mane abang jongsi labangso akai aron ateng pen mathara giani pu chemathalo tangte, alangli giani binong keplangjile kelu pacheplangnang.

¹⁹Pima labangso apirthe amonit atum gian pu kematha alam ke Arnam angno ke kelu alamlo. Atheke hastro along tok-lo, “Giani atum akere pen ajoksi Arnam halatum aphan nepchekji;”

²⁰lapen hastro along puthot tok-lo, “Giani atum akematha hei hei thangta kali pu Hemphu chini.”

²¹Tangte lahelo, baduta monit atum pen apot ke chepindak nangnelo. Pima kadokaveta nanglitum aphanlo:

²²Pol tame, Apollos tame, Pitor tame; pirthe tame, kereng tame, kethi tame, non kedo amar tame, mo kevangji amar tame; la kadokaveta nanglitum aphanlo,

²³lapen nanglitum ke Khristo aphanlo, Khristo ke Arnam aphanlo.