Read Karbi 1 KORINTH 5 Bible Online

1 KORINTH 5 - Karbi bible

1 KORINTH 5

¹Nanglitum angbong beisa akam do pusi neli arjulong-lo. Khristian kalidet atum angbongta lason an kehingnopik abeisa alam ave. Pima inut abang apo apiso pen irap rap-lo pusi neliphan thanlo.

²Tangte kopisi nanglitum ane chepathehailoma! Nanglitum aning aduk do-o nangji apot-lo, kalima? Labangso akam keklem amonit aphan nanglitum angbong pen phlungjuinon.

³Nelibangle nanglitum pen heloving setta neli ning arlo ke neli nanglitum alongsi dolo; lapen neli methang nanglitum angbong kedo asonthotsi neli Hemphu amen pen la kehingnopik akam keklem amonit aphan ado padotang-lo.

⁴Nanglitum kechingrum ahut, lapen nelita neli ning arlo ke nanglitum along nangkechingrumdun ahut,

⁵labangso amonit Hemphu Arni ahut akarjong kejokji aphan abang arpum kepavirdetjile ilitum along kedo Hemphu Jisu ajakong pen alangliphan Soitan arideng hodaidetnon.

⁶Nanglitum kechepindak ke mesen kali. “Asapnat athapta him aplang kangthim pakangpet-thek,” pu kepu alam nanglitum chinilo.

⁷Nanglitum thap kave ahim asonthotsi dolo, lasonthak thak-le nanglitum him aplang kemi keplangjile thapban an varchornon. Pima Kejok a-Mei Achojun a-Biresak a-So thoktang-lo. Labangso a-Biresak a-So ke Khristo helo.

⁸Tangte, thapban kedo ahim pen, atheke kechelangselet lapen kehingno aning pen kali, bonta thap kave ahim, atheke ning ingthir-et pen lapen ahokpet aning penle ilitum la Kejok Achojun a-Mei talon lonangho!

⁹Nanglitum beisa keklem atum along chelangdunri pusi neli nangli-tum aphan aphrang ketok aloh along nangpulo.

¹⁰Tebonta Khristian kalidet atum angbong beisa keklem kalite, mek plengple, kalite bang amar kethipon, kalite kumlin kardom atum along chelangdun nangne pule neli la kepudam kali. Latum along chelang dundepinji pulote nanglitum pirthe athak pen damvek nangkokji.

¹¹Neli kepudam ke lahelo, inut abang Khristian pu chepulo setta beisa klembom, kalite amek plengple dobom, kalite kumlin ardombom, kalite bang aphan sorsarbom, kalite hor ingribom, kalite bang amar thiponbom tangte, nanglitum alangli long chelangdun nangnelo; kecho anta chorap nangnelo.

¹²Pima Khristian kalidet atum aphan kangsai ke neli kam kali. Khristian hijan angbong ke nanglitum chingsai nangji, kalima?

¹³Khristian kalidet atum aphan Arnamsi ingsaiji. Hastro along ketok asonthotsi, “Kehingno amonit aphan nanglitum angbong pen phlungphitnon.”