Read Karbi 1 KORINTH 6 Bible Online

1 KORINTH 6 - Karbi bible

1 KORINTH 6

¹Nanglitum angbong inut abang Khristian akorte pen lam kecharvo dolote, labangso alam kangsaiji aphan alangli kopusi kangthir atum along damdera, Khristian kalidet atum along kedamhailoma?

²Kangthir atum pirthe aphan ingsaiji, lake nanglitum chininema? Jongsi nanglitumsi pirthe aphan ingsaiji tangte, nanglitum la bihek alam kangsaiji abidi avema?

³Ilitumsi sining apherangke atum aphan ingsaiji, lake nanglitum chinine-detma? Tangte ilitum la bihek alam ke ingsai unthu muchot nangji.

⁴Tangte, lason alam dolote, labangso alam nangkepangsaiji aphan nanglitum kopusi hala mondoli angbong thangta kalidet amonit atum along labangso alam ponloma?

⁵Nanglitum aphan kepatherakjisi neli labangso alam pulo. Khristian atum angbong akecharvo alam kangsaithek abang, giani amonit nanglitum angbong avedetma?

⁶Bonta inut a-Khristian anut kaprek a-Khristian pen kecharvo alam chedansi Khristian kalidet atum nangpangsailo!

⁷Nanglitum angbong kecharvo alam kechedan ke nanglitum akerem binong-lo. Labangso alar nanglitum aphan kehingno klem setta nanglitum chechakding abangsi memuji apot-lo, kalima? Nanglitum amar chonghu pondet setta, nanglitum chechak-ding abangsi memuji apot-lo, kalima?

⁸Bonta labangso alar nonke nanglitum, Khristian hijan setta lahin lahin aphan kehingno klemlo lapen chobeilo.

⁹Kehingno atum Arnam a-Rat chepahemphudun longledetji, lake nanglitum chininema? Nanglitum chepaluri. Beisa keklem, kalite, kumlin kardom, bang apiso kalite apenan pen beisa kecheklem, kalite pinso hijan lapen arloso hijan angbong beisa akam kecheklem, kalite

¹⁰kechonghu, kalite mekplengple, kalite hor kangri, kalite bang aphan kesorsar, kalite bang amar kethipon atum ke Arnam a-Rat chepahemphudun longledetji.

¹¹Nanglitum angbong manene atumta aphrangke lason amonit atumlo. Bonta nonke Hemphu Jisu Khristo lapen e-Arnam a-Karjong nanglitum aphan cham pangthirtang-lo, Arnam aphan panongtang-lo, lapen dhoromi pusi lakhatang-lo.

¹²Komane abang puji tahai, “Neli ke neli ning kehang aling klemlong.” Ahok-lo; bonta asontin akam amat ke nangliphan ale dopetpe. Neli ke neli ning kehang aling klemlong pu neli pu-un, bonta neli ke thangnat amar setta neliphan ban nepaplanglongledetji.

¹³Komane abang puji, “An ke pok aphanlo, lapen pok ke an aphanlo.” Ahok-lo; bonta Arnam la hinita pavir-detji. Ebang arpum ke beisa akam keklem-iji aphan kali, bonta Hemphu akam keklem-iji aphanlo; lapen Hemphu ilitum abang arpum pen amethang akam klem-iji.

¹⁴Arnam, Hemphu aphan kethitang atum angbong pen pathurlo, lapen alangli ilitum aphanta amethang ajakong pen pathurji.

¹⁵Nanglitum abang arpum ke Khristo abang a-ok athan hei heilo, lake nanglitum chinilo. Tangte Khristo abang a-ok athan ensi la beisa abang a-ok athan paplangjima? Lapu kali!

¹⁶Inut amonit beisapi pen amethang abang arpum pacherap-het lote alangli bang arpum ke beisapi abang arpum pen isipet plangtang-lo, lake nanglitum chininedetma? Pima hastro along tok-lo, “La banghini atum abang arpum isipet plangji.”

¹⁷Bonta Hemphu pen kecheraphet abang ke karjong anat Hemphu pen isipet plangtang-lo.

¹⁸Inut amonit akaprek apap keklem ke amethang abang arpum angtansi klemlo; bonta beisa akam keklem abang ke amethang abang arpum aphansi pap klemlo.

¹⁹Nanglitum abang arpum ke Karjong Kangthir kedo adim, kardom ahemlo, lake nanglitum chininedetma. Labangso a-Karjong Kangthir nanglitum aning arlo do lapen Arnamsi nanglitum aphan la nangpilo. Nanglitum ahemphu ke nanglitum methang kali, bonta Arnamsi nanglitum ahemphulo;

²⁰alangli anam pisi nanglitum aphan namtang-lo. Tangte nanglitum abang arpum pen Arnam anong pathenon.