Read Karbi 1 KORINTH 7 Bible Online

1 KORINTH 7 - Karbi bible

1 KORINTH 7

¹Nanglitum neliphan lo nangketok alam lahelo. Inut amonit piso en-edet asonte mepar.

²Bonta beisa akam do-o apotsi abangphutinta piso pa-en nang lapen abangphutin arlosota penan pado nang.

³Apiso abang apenan pen kelong nangji an apenan abang pi nangji lapen lasonthak thaksi apiso abangta apenan aphan pi nangji.

⁴Apiso abang arpum ahemphu ke amethang kali, bonta apenansi apiso abang arpum ahemphulo: lasonthak thaksi apenan abang arpum ahemphu ke amethang amat kali, bonta apisosi apenan abang arpum ahemphulo.

⁵Nanglitum penang arni an Arnam kardom apor ke-enji aphan aphrang pen kechekroi avete nanglitum angbong lahin lahin kelong nangji ason chepiperi. Bonta nanglitum methang aning kehang kecheber un-e pen ajok Soitan nanglitum aphan kechomosoidet, lason keplangpledetjile nanglitum dothurap rapnon.

⁶Bonta neli nanglitum aphan hukumle nangkepi kali, nanglitum la klem tame pusi neli puchot.

⁷Nangli-tum kadokaveta nelisonthot kedojisi neli ning hang-lo; bonta abangphutinta Arnam pen kelong adan do, inut ke lason adan anut kaprek ke akaprek adan long-lo.

⁸Bonta achor kave atum lapen hemepi atum aphan neli kepuji lapu-helo, nanglitumta nelisonthak thak inutpet-le dobom asonte meparpo.

⁹Bonta nanglitum jongsi nangning kehang cheber un-e tangte, nanglitum piso enkok, penan dokok non; pima ning kehang-e pen ajok me kangdak ason ning kekru-ang pen kedo apar piso enkok, penan dokok abang memu.

¹⁰Piso ke-entang lapen penan kedo-tang atum aphan neli eson ahukum pipo, setta lake neli hukum kali, Hemphu ahukumlo: Apiso abang apenan cheti nangnelo.

¹¹Bonta alangli jongsi apenan chetilo tangte, alangli penan dothuthedet nangji, kalite apenan binong pen jalangthu nangji. Lapen apenan abangta apiso cheti nangnelo.

¹²Akaprek atum aphan neli pupo; (Hemphu kali, nelisi pupo:) Inut a-Khristian apiso jongsi kroikrelang setta alangli long kedodunji aning hang-lo tangte, labangpi aphan cheti nangnelo.

¹³Lapen inut Khristian arloso jongsi kekroikrelang apenan dolo, lapen alangli labangpi pen kedorap rapji aning hang-lo tangte labangpi alangli-phan cheti nangnelo.

¹⁴Pima Khristian kalilang apenan abang Khristian apiso pen kechelangpet pen ajok alangliphan Arnam aphan panong-lo, lapen kekroikrelang apiso abang Khristian apenan pen kechelangpet pen ajok labangpi aphan Arnam aphan panongtang-lo. Lapu kalite halatum asomar atum Khristian kalidet atum asomar atum asonthak thak ingthirthedetji, bonta nonke halatum ingthirlo.

¹⁵Bonta kekroikrelang abang jongsi Khristian apenan kalite apiso aphan kechetiji aning hang-lo tangte, alangli pachitinang. Lapuson alam dolote, Khristian apiso kalite apenan aphan thang akekhang avelo. Ning kangsam pen kedoji aphansi Arnam ephalo.

¹⁶Nangli penan aphan nangli pajok unji pu kopusi chini unjima? Kalite nangli piso aphan nangli pajok unji pu nangli kopusi chini unjima?

¹⁷Muthe abangphutin aphan Hemphu kepi asonthot-le, lapen Arnam alangliphan kepha ahut alangli kedo asonthot-le abangphutinta padobomnang. Neli kadokave amondoli mate kroi-asong alongta labangso aron atangsi thanbomlo.

¹⁸Mane abang jongsi Arnam akepha kedeng ahut reng-rot entang-lo tangte alangli reng-rot ke-en angpram kepapraiji aphan bor-i nangnelo. Mane abang jongsi Arnam akepha kedeng ahut reng-rot en-e-lang tangte, alangli reng-rot en nangnelo.

¹⁹Akenangsot ke Arnam ahukum kekroi helo.

²⁰Arnam kepha ahut kopusonsi doloma, lasonthot-le abangphutinta padobomnang.

²¹Arnam nangkepha ahut nangli inut aban loma? Nangli thangta mathari; bonta ban kalidet keplangji atovar dolote, la dengnon.

²²Pima ban setta Hemphu akepha kedengtang abang ke Hemphu ator kedo kejok abang-lo; lasonthotsi ban kalidet setta Khristo akepha kedengtang abang ke Khristo abanlo.

²³Anam pisi nanglitum aphan nangnamlo; lasi nanglitum monit atum aban cheplangri.

²⁴Korte marli atum, Arnam kepha ahut kedo asonthot-le abangphutinta Arnam pen chelangpetra padobomnang.

²⁵Lapen achor kave atum alam lahelo: alanglitum aphan neli Hemphu ahukum ave, bonta neli Hemphu akangjinso kelongtang abang asonthotsi neli ning kematha alam thanpo; lasi neli lam ke kekroi ning theklong alamlo.

²⁶Tangte neli ning kematha lahelo, non akai akesung apotsi inut amonit non kedobom asonthot-le dobom asonte meparpo.

²⁷Nangli piso entang-loma? Tangte, nangli piso kechetiji abidi ririnon, Nangli piso en-elangma? Tangte, nangli piso ke-enji abidi ririnon.

²⁸Bonta nangli piso en setta, lake nangli pap keklem kalilo. Bonsetta piso ke-en, penan kedo atum akesung pho nang-oji, lapen nanglitum labangso akesung kephojokphlotjisi neli ning hang-lo.

²⁹Kortemarli atum, neli kepudam alam lahelo; nonke apor thihek-lo; lasi non pen apara piso ke-entang atum piso ke-en-e asonthotsi dobom nangji:

³⁰Kechiru atum kechirure asonthot, aning arong atum aning arong kave asonthot, mar kenam atum la kenamtang amar amethang amar kalidet asonthot,

³¹lapen labangso apirthe amar ke-en atum la ke-en-edet asonthotsi donangji. Pima labangso apirthe non kedobom a-arje nang avebomlo.

³²Nanglitum aningbi kavedetjisi neli ning hang-lo. Piso ke-en-e abang ke Hemphu akam aphansi aning matha-ever, pima Hemphu aning kepadok thekji aphansi alangli bor-iver.

³³Bonta piso ke-en abang ke pirthe alam anatsi aning mathadam-ever, pima apiso aphan aning kepadokjisi alangli aning matha-ever;

³⁴lasi alangli aning kehang pahinidak. Penan kedode arloso, mate kangthir-etlang animsopi ke Hemphu akam aphansi aning matha-ever, atheke alangli amethang abang arpum lapen aning ingthirjir pen kedojisi matha-ever, bonta penan kedotang arloso ke pirthe alamsi aning matha-ever, pima apenan aphan aning kepadokthekji aphansi alangli matha-ever.

³⁵Nanglitum ale kelongji aphansi neli labangso alam pulo. Nanglitum aphan kekhangji aphan kali; bonta nanglitum ot keme pen dosi nanglitum aning eleppet pen Hemphu akam aphan kechehodaiji aphansi neli la pulo.

³⁶Bonta kechepangriji aphan pathiktang-lo setta piso ke-en-edetjisi aning kehang abang aphan neli kepuji alam lahelo: alangli jongsi hala kepathiktang arloso aphan mesen a-ot pen klemklelo, lapen aning cheber une-elo lapen labangpi aphan enkok masilo pule mathalo tangte, alangli aning kehang asonthotsi alanglitum chepangrikok nangji. Lapuson keklem ke pap kalilo.

³⁷Bonta inut amonit klemvek nangji, lason thang athe avera, amethang aning kehang pen piso ke-en-ejisi aning arlo cheparailo, lapen amethang aning kecheber un pame ajakong do, lapen lason keklemjisi aning arlo chepathiktang-lo tangte, alangli halabangso arloso aphan ke-en-edetke mesen akamsi klemlo.

³⁸Lasi hala kepathiktang arloso aphan ke-en kok abang ke mesen akamsi klemlo, bonta piso ke-en-e abang ke la apar memuchot akamsi klemlo.

³⁹Apenan rengtik anke apiso aphan apenan pen kok rap-het-lo. Bonta apenan thilot lote alangli aning kehang aling aphan penan do long-lo, bonta apenan abang Khristian nangji.

⁴⁰Bonta alangli non ason inutpet dobom lote akerengme ongmuchotji. Lake neli kematha alamlo, lapen neli long Arnam a-Karjong do pusi neli mathalo.