Read Karbi 1 KORINTH 8 Bible Online

1 KORINTH 8 - Karbi bible

1 KORINTH 8

¹Lapen sekarkli ahut kethok kejir amar alam lahelo: Ilitum kadokaveta gian do pu ilitum chini, tebonta lason agian ke monit aphan pachepindakchot, bonta kanghon ke monit a-ot adur pamever.

²Mane abang jongsi asapbak charlilo pu chemathalo tangte, alangli kecharli nangji asonthot charlilelang.

³Bonta Arnam aphan kechinghon abang aphan ke Arnam chini.

⁴Tangte, sekarkli ahut kethok kejir amar kecho alam lahelo; kumlinke kopine kedo binong arnam a-arjanlo, lapu kali, lake ilitum chinilo, lapen Arnam ke inutnat, lata ilitum chinilo.

⁵Sining athak, mate, pirthe athak arnam pu atum do settame, (labangso “arnam” pu atum lapen “hemphu” pu atum kedo ke do.)

⁶ilitum aphan ke Arnam, atheke Po inutnat. Kadokave amar kepinchong abang alangli helo, lapen alangli phansi ilitum reng-lo; lapen Hemphu, Jisu Khristota inutnat. Alangli pen ajoksi kadokave amar pinchong-lo, lapen alangli pen ajoksi ilitum reng-lo.

⁷Bonta kadokave atum labangso alam chini, lapu kali. Penang amonit atum ke hako ahut kumlin aphan kangduk abesi pini arni anta halatum lason amar cholote, lake kumlin aphan kethok kejir amar binongsi ahokpet pen kechodunlo pusi mathalo; lapen halatum aning kematha ajakong avedet apotsi lason amar kecho pen ajok halatum ingthirthedet-lo pusi halatum mathalo.

⁸Bonta kecho amar pen ajoksi Arnam etum aphan aning edokmuchotji, lapu kali. Pima chochete ilitum Arnam angno hingno muchotji, lapen cholote memuchotji, lapu kali.

⁹Bonta nanglitum lason keklemlong pen ajok kekroi ajakong kave atum aphan kepatekung-i amar keplang-pledetjile cherenon.

¹⁰Pima hala aning kematha ajakong kave abang nangli akechini abang aphan kumlin kebi ahem along kecho nangthekdunlong lote, alanglita kumlin aphan kethok kejir amar chohaidetji, kalima?

¹¹Lasi nangli methang akechini pen ajok la kekroi ajakong kave abang aphan pavirlo; bonsetta la nangli korte aphan ajoksi Khristo thi-lo.

¹²Lapen nanglitum Khristian akorte aphan lason pap keklem pen ajok lapen halatum aphan aning angthin aduk kepibom pen ajok nanglitum chenamsi Khristo abethursi pap klembomlo.

¹³Tangte lahelo, neli kecho amar pen ajok jongsi neli korte aphan pap paklemlo tangte, neli korte aphan pap kepaklemkledetji aphan neli kumlin aphan kethok kejir amar kaiketa chochedetji.