Read Karbi 1 KORINTH 9 Bible Online

1 KORINTH 9 - Karbi bible

1 KORINTH 9

¹Neli ke jokvanlo, kalima? Neli ke ketoitang abang inut-lo, kalima. Neli ke e-Hemphu Jisu aphan theklong-lo, kalima? Neli Hemphu aphan keklempi akam athe nanglitum helo, kalima?

²Neliphan anut kaprek atumle ketoitang abang pu kroikre setta, chenamsi nanglitum ke kroilo. Pima nanglitum Hemphu pen kechelangpet pen ajok nanglitum helo, neli ke ketoitang abang-lo pu apormanlo.

³Monit atum neliphan kesorsar ahut neli kechethakdun alam lahelo:

⁴Nelitum kecho kejun amar kelongji a-ot avema?

⁵Hala ketoitang akaprek atum, Hemphu a-Korte atum lapen Pitor ason nelita kaprek kaprek adim kedam ahut neli piso cheponlong, kalima?

⁶Kalite, kerengji aphan kam kechoklem nangji ke neli lapen Barnabas anchotma?

⁷Amethang akhi pen polton akam keklem abang avepinlang, Kalima? Kalite drakha aberi along drakha arong esi amethang ke labangso athe kechochedetji, lason abang avepinlang, kalima? Biresak ahur visi, amethang ke labangso abiresak amok-lang kejunje det, lason abang ave, kalima?

⁸Neli monit kepu asonthotsi labangso alam puloma? Aronta la esonpet alamsi pulo, kalima?

⁹Pima Moses ketok Aron along ilitum porhelong-lo, “Sok kepasi achainong angtur rak-ri.” Tangte Arnam chainong atum aphan mathasi labangso alam pudamloma? Jasemetke ilitum aphansi alangli labangso alam pudamlo, kalima?

¹⁰Ahok-lo, ilitum aphansi labangso alam tok-lo. Pima hai kebai abangta sok athe kelongdunji aning kethe kedo pensi hai bainangji, lapen sok kerot abangta sok athe kelongdunji aning kethe kedo pensi sok rot masi.

¹¹Nelitum nanglitum angbong karjong achilisi rik-lo. Tangte nelitum methang a-ok aphan nanglitum pen ale longjibon pu nelitum kematha ke kechokcheloma?

¹²Bang kaprek atum jongsi nanglitum pen lason kelongji aron dolo tangte, nelitum ke nanglitum pen la apar kelongji aron dolo., kalima? Bonta nelitum labangso aron en-edet-lo. Khristo alamjir a-Birta Keme kekhangkhedetji aphansi nelitum kadokave akesung chechak-lo.

¹³Kardomhemthepi along kam keklem atum Kardomhemthepi pensi kecho kejun ahormu longbom, lapen dovan along kethok kejir atum kethok kejir amar apharman longdunbom, lake nanglitum chinilo, kalima?

¹⁴Lason-thotsi Hemphuta hukum pisi pulo, “Birta Keme kepachethang atum birta keme pen kecho kejun amar long nangji.”

¹⁵Bonta neli la kadokave aron isi natta en-edet-lo. Lapen neli lason kelong nangji amar nanglitum nepi masi pu kepudamji aphansi neli labangso alam tok-lo, lapu kali. Pima la alar neli thilot memu pusi neli mathalo. La neli kechepindak alam baduta pavir longledetji.

¹⁶Birta Keme kepachethang apot ke neli kechepin-dakji ajakong ave. Pima neli birta keme thanvek nangji. Neli jongsi birta keme pachethangthe tangte, neli dai do.

¹⁷Pima neli nelimethang aning kehang pensi labangso akam klemlo asonte neli anam kelongji a-ot do. Bonta lake neli keklem nangji akamlo apotsi neli klemlo; pima Arnamsi neliphan labangso akam nepaklemtoilo.

¹⁸Tangte neli kopi anam longma? Neli anam en-epin pen Birta Keme pachethang long-lo, lapen birta keme kepachethang apot neli anam kelongji a-ot do setta neli anam hanghedet-lo; neli anam kelong ke lahelo.

¹⁹Neli ke badu amonit aban kali setta un an ongmuchot amonit kelongji aphan kadokave amonit aban cheplang-lo.

²⁰Jihudi atum aphan kelongjisi, Jihudi atum angbong kam keklem ahut neli Jihudi amonit asonthak thak cheplang-lo; lapen neli methang ke Moses Aron ator dode setta Aron ator kedo atum aphan kelongjisi neli Aron ator kedo atum angbong kam keklem ahut neli Aron ator kedo amonit atum asonthak thak cheplang-lo.

²¹Lasonthak thaksi Jihudi kalidet atum aphan kelongjisi, neli Jihudi kalidet atum angbong kam keklem ahut Jihudi kalidet atum asonthak thak dolo. Bonta neli Arnam aron kekroikre kali; neli Khristo aron ator dolo.

²²Kekroi ajakong kave atum aphan kelongjisi neli kekroi ajakong kave atum angbong kam keklem ahut ke halatum asonthak thak cheplang-lo. Lasi ajat abidi pen settame neli penang amonit aphan kepajok thekji aphansi la kaprek kaprek atum angbong kedo ahut kaprek kaprek atum asonthak thak cheplang-lo.

²³Nelita Birta Keme ahirjume kelongdunji aphansi birta keme ajok neli la kadokave klemlo.

²⁴Kekat kechebai ahut ake-ongpi atum kekat chebaidun setta inut abangsi anong-e longchot, lake nanglitum chinilo, kalima? Tangte, nong-e kelongvekji aphanle nangli katnon.

²⁵Jakong kang-tang kechebaidunji aning kehang atum ke aphrang pen jasemet abe chinghoi kevir undet aphukup avaikang anong-e kelongjisi halatum chebai dunlo; bonta kevir un-e-det aphukup avaikang anong-e kelongdunji aphansi ilitum ke ebe chinghoilo.

²⁶Lasi neli ke suisedetsi kejut ang-ang anat kekat pakengding-lo; lasi neli ke ketengthap thedet akecheteng abang asonthak thak-lo,

²⁷bonta bang atum aphan Birta Keme pachethangdet aphi neli methang ke thang a-ot ave, lason neliphan kelakhakhedetjisi neli nelimethang abang chetengsi nelibang a-ok chepangtang-lo, lapen neli ning kehang aling chekhang unlo.