Read Karbi 2 KORINTH 1 Bible Online

2 KORINTH 1 - Karbi bible

2 KORINTH 1

¹Arnam aning kehang pen ajok Jisu Khristo ketoitang abang, neli Polsi, ilitum akorte Timothi pen pen labangso aloh nanglitum aphan, atheke Korinth arongsopi kedo Arnam amondoli mate kroi-asong lapen Akaia adet kedo kangthir atum an aphan tok-lo.

²E-Po Arnam lapen Hemphu Jisu Khristo nanglitum aphan kangjinso lapen ning kangsam nangpapinang.

³Arnam, atheke e-Hemphu Jisu Khristo a-Po aphan ilitum kero pilonang! Pima kangjinsothek a-Po lapen ning kepaplithek a-Arnam alangli helo.

⁴Nelitum kesung kepho ahut Arnam nelitum aning nepaplilo. Lapen nelitumta labangso aning kepli pen ajok kadokave akesung kepho atum aphan aning paplithek-lo.

⁵Khristo keduk kesung kepho asonthotsi nelitumta keduk kesung pholo, lapen Khristo aphan aning kepapli asonthotsi, Khristo pen ajok Arnam nelitum aphanta ning nepaplilo.

⁶Nelitum jongsi keduk kesung pholo tangte, lake nanglitum aning kepliji lapen nanglitum kejok kelongji aphanlo. Jongsi nelitum aning plilo tangte lake nanglitum aningta kepliji aphanlo, lapen nelitum ason nanglitum keduk kesung kepho ahut nanglitum labangso aning kepli long-lo.

⁷Lasi nelitum nanglitum aphan kaiketa ning nangchetheklong-lo. Pima nelitum ason nanglitum kesung kepho asonthotsi nelitum aning kepli ason nanglitum aningta pliji lake nelitum chinilo.

⁸Korte marli atum, Asia adet nelitum kepho akesung alam nanglitum aphan nangkepachematha-jisi ning hang-lo. Nelitum halabangso akesung kechechakji ajakong avedet-lo. Lasi nelitum rengjilang puke ning chethethepinlo.

⁹Nelitum aphan kepathiji ahukum kepidet asonsi nelitum chemathalo. Bonta nelitum nemethang aphan chikikesi kethitang atum aphan kepathur a-Arnam aphan kechikithekji aphansi nelitum aphan lason plang-lo.

¹⁰Nelitum kethi nangji, lason akepherememe akesung pen alangli nelitum aphan nepajok-lo, lapen alangli nelitum pajokbomji pusi nelitum ningthelo.

¹¹Nanglitumta nelitum aphan Arnam nekardompi pen nerapdun nangji. Ansi ake-ongpi akardom Arnam arjusi Arnam nelitum aphan hirjume nepiji; lapen nelitum pen apot ake-ongpi atum Arnam aphan rohurji.

¹²Tangte nelitum kechepindak alam lahelo; nelitum Arnam aning kehang atengsi ingthir-et pen lapen athikdut pensi pirthe angno, lapen jasemet ke nanglitum angnota do-thak-lo. Monit agian pensi nelitum do-thak-lo, lapu kali; bonta Arnam akangjinso ajakong pensi nelitum do-thak-lo.

¹³Nanglitum keporhe unchit lapen kechini unchit alamsi nelitum nanglitum aphan tok-lo, la apar ke nelitum thangta toktelo. Bonta non nanglitum nelitum aphan ajehak alamsi chinichot-lo setta,

¹⁴nanglitum nelitum aphan kadokave alamta chinipameji pusi neli ningthelo. Anke mo Hemphu Jisu kevangthuji arni nelitum nanglitum pen apot kechepindakji asonthotsi nanglitumta nelitum pen apot chepindak-longji.

¹⁵Neli labangso alam kroipamelo apotsi, nanglitum batai hini ahirjume kelongji aphan neli nanglitum along kevangjisi aphrangke mathalo.

¹⁶Pima neli Masedonia adet kedamji ahut nanglitum along kevurponji, lapen Masedonia adet pen nangke-chevoithu ahut nanglitum along nangkevurponthuji lapen neli Judia adet kedamji ahut nanglitum neliphan nelirapdunra neliphan tovar nekethon-dunjisi neli ning hang-lo.

¹⁷Tangte neli ning kepherphar pensi la ke klemji mathaloma? Kalite neli la keklemji kematha ahut neli methang ale aphan mathasi, eboipetsi “kali”, “Kalang” pu kepuji mathaloma?

¹⁸Bonta Arnam ke ahokpet abang-lo asonthotsi, nelitum nanglitum aphan kethan alamta ahokpetsi, “kali” “Kalang”, lapu kalilo.

¹⁹Pima neli, Silas lapen Timothi nanglitum angbong Arnam a-Sopo, atheke Jisu Khristo alamjir pachethang-lo; labangso a-Jisu Khristo ke eboipetsi “Kalang”, aphisi, “kali”, lason kekirla abang kalilo. Bonta alangli ke kaiketa Arnam a “Kalang” verlo.

²⁰Pima alangli pen ajoksi Arnam akechak anta “Kalang” plang-lo. Lasi ilitum Arnam adak atur kepathe ahut Jisu Khristo amen pensi “Amen” pu pulo.

²¹Arnamsi nelitum lapen nanglitum aphanta Khristo aphan akekroi epathirlo. Arnam amethangsi nelitum aphan ingvailo,

²²ilitum athak alangli methang amonit angthek asap theng-lo, lapen alangli ilitum aphan ekebirtipi ason an ilitum longvekji pu angthek, la Karjong Kangthir ilitum aning arlo pado tang-lo.

²³Arnam neli hakilo, alangli neli ning arlo alam chini. Nanglitum aphan ning aduk nang kepipedetjisi neli Korinth kevangvedetji aphan parailo.

²⁴Nelitum aning kehang aling nanglitum aphan nangkepaklemtoiji lapen nanglitum kopi kroivek nangjima, la nangkethanji bor-ilo, lapu kali. Pima nanglitum akekroi thirklong-lo, lake nelitum chinilo. Bonta nanglitum aning arong kedoji aphansi nelitum nanglitum pen klem rap rapbomlo.