Read Karbi 2 KORINTH 10 Bible Online

2 KORINTH 10 - Karbi bible

2 KORINTH 10

¹Pol, neli methangsi nanglitum aphan choningrilo. Neli nang-litum angbong kedo ahut ke neli asotdut-lo, bonta nanglitum pen heloving kedo ahut ke neli nanglitum aphan phererelo pusi monit atum pulo. Khristo asonthotsi neli asotdut lapen kechingkime-o abang keplangji ning hang-lo.

²Lasi neli nanglitum aphan choningrilo, mo neli nanglitum along kevangji ahut nanglitum neliphan ning kesedengkak abang nepaplang bor-iri. Pima nelitum ke pirthe aron asonthotsi kengkam chejorlo pu nelitum aphan adai ketin atum aphan neli ning kesedeng chepaklangthek, lake neli chechinilo.

³Nelitum pirthe athaksi do setta nelitum pirthe aron ateng pen ron chedande.

⁴Pima nelitum ron kechedan-i arisim ke pirthe athak kedo arisim hei hei kali, bonta Arnam ajakongsi nelitum arisimlo. Labangso arisim pensi nelitum paisong thepi hei hei pavirlo.

⁵Arnam alamjir kechini alam aphan kekhang, ane kechepathe ason an nelitum pavirlo, lapen akemathatin nepsi Khristo ahukum pakroibomlo.

⁶Nanglitum akekroi aporman klangdak-lote hala alam kekroikre atum aphan aduk kepijisi nelitum chesik-lo.

⁷Nanglitum ke athak a-arjesi lang-phruichot-lo. Komane abang jongsi Khristo amonit-lo pu chemathalo tangte, alangli amethang alamjir pachemathathunang; pima alangli sonthotsi nelitumta Khristo amonit atumlo.

⁸Nanglitum aphan kepavirji aphan kali, bonta nanglitum a-ot adur kepameji aphan Hemphu nelitum aphan nekepi ajakong apot neli jongsi chepindak thu-ongchot-lo setta, neli therak-re.

⁹Neli loh hei hei pen ajok nanglitum aphan kepaphereji bor-ilo pu keklangji aphan ning hanghe.

¹⁰Pima halatum pulo, pima “Alangli nang kelo alo hei hei alam sodak-lo lapen alam kangtang saidelo, bonta alangli methang amat nelitum angbong kedo ahut ke alangli ajakong ave lapen alangli kepu alam hei heita thangta kali!”

¹¹Lason amonit atum pamathapamenang, atheke nelitum nanglitum angbong kedode ahut, nelitum nang kelo aloh along nelitum ketok asonthotsi nelitum nanglitum angbong kedo ahutta nelitum klemji.

¹²Tebonta nelitumta hala amethang methang kecheparoka atum asonthak thak-lo pu nelitum chelakha haihe, kalite nelitum halatum pen chepang-bar haihe. Halatum ke kelu atumlo!

¹³Bonta nelitum kechepindak ke ahoi paparpe; Arnam nelitum aphan neke paklemtoi akam ahoi hei hei angbongsi la doji,

¹⁴lapen nelitum nanglitum angbong keklem akamta halabangso ahoi hei hei angbongsi dolo apotsi, nelitum Khristo alamjir a-Birta Keme kepachethangjisi nanglitum along kevang ahut nelitum labangso ahoi hei hei paparpelo.

¹⁵Lasi Arnam nelitum aphan nekepaklemtoi akam ahoi apar adim keklem atum akam apot nelitum chepindakde. Bonta nelitum aning kethe lahelo, nanglitum theponbomji lapen nelitum nanglitum angbong keklem akam klemmuchot unji: tebonta Arnam nelitum aphan kepaklemtoi ahoi angbongsi nelitum kaiketa doji.

¹⁶Anke nanglitum apar kedo adet hei hei angbong nelitum Birta Keme pachethangthekji, lapen anut kaprek atum keklem adim, halatum keklemtang akam apot nelitum chepindak jokphlotji.

¹⁷Bonta hastro along ketok ason-thotsi, “Kechepindakji aning kehang abang Hemphu keklemtang akam apot-le pachepindaknang.”

¹⁸Pima amethang kecheparoka abang aphan kali, bonta Arnam aning kedok abang aphansi Arnam dengpo.