Read Karbi 2 KORINTH 11 Bible Online

2 KORINTH 11 - Karbi bible

2 KORINTH 11

¹Neli asapso akelu alam kaningje ahut nanglitum kechepaningdingjisi neli ning hang-lo. Nanglitum chepaningdingtha!

²Arnamle kematha-e asonsi nelita nanglitum aphan nangmatha-elo. Pima inut ingthir-etlang animsopi aphan inut apinso pen kepangriji aphan kepathiktang asonthak thaksi neli nanglitum aphan Khristo pen nangkepangriji aphan pathiktang-lo.

³Bonta Pherui amethang akepachorei abidi pen la aphan kechobei asonthotsi alangli nanglitum aning phangnosi, nanglitum Khristo aphan ahokpet lapen ingthir-et pen akematha che-obupjibon pusi neli pherelo.

⁴Pima komane abang nanglitum along vangsi nelitum kepachethang a-Jisu pen keprekdak a-Jisu alamjirle nangpachethang setta nanglitum la deng-lo, mate nanglitum kelongtang a-Karjong pen keprekdak akarjongta nanglitum deng-lo, kalite nelitum kepachethang a-Birta Keme pen keprekdak abirta kemeta nanglitum deng-lo.

⁵Hala “Ketoitang atum” pu nangli-tum kepudam atum themu, neli bimu puke neli chemathathe.

⁶Neli lam kaningje thekser abang kalidet tahai, bonta neli gian komhek-lo, lapu kali, lake nelitum kaiketa lapen kadokave alam setta nanglitum aphan paklangdak-lo.

⁷Neli nanglitum aphan Arnam a-Birta Keme kepachethang ahut neli nanglitum pen thang anamta en-edet-lo. Nanglitum aphan kepathejisi nelimethang chepabihek-lo. Tangte lake neli chokchedet-loma?

⁸Neli nanglitum angbong kam keklem ahut akaprek amondoli mate kroi-asong atum neliphan tangka nerapdunlo: pudam-et lote nanglitum aphan kepachethangjisi neli halatum amar thiponlo.

⁹Neli nanglitum angbong kedo ahut neli tangka akenang dolo setta neli nanglitum badu aphanta pasungsedet-lo. Masedonia adet pen kevang akorte atumsi neli kenangji ason an nepilo. Kedamtang arni ahut asonthak thaksi, mo kevangji arni ahut anta neli nanglitum aphan pasungsedetji.

¹⁰Khristo ke kaiketa ahokpet abang-lo, lapen nelita lasonthotsi klemlo apotsi Akaia ahavar adang baduta la neli akechepindak khang thip un-edetji.

¹¹Tangte neli nanglitum aphan kanghon avedet apotsi neli labangso alam puloma? Neli nanglitum aphan chinghon binong-lo lake Arnam chinilo!

¹²Nelitum keklem asonthotsi halatumta klemlo pu halatum kechepuji lapen kechepindakji atovar kepavedetjisi neli non keklem asonthot klembomji.

¹³Halabangso amonit atum ke ahok-he aketoitang atumlo, chobeichot atumlo lapen Khristo aketoitang atum a-arje kecheparjan jongjongchot atumlo.

¹⁴Lake thang kemanghu damnangji alam kali! Pima Soitanta kethe-ang apherangke a-arje cheparjanlo.

¹⁵Lasi aban atumta dhoromipet aban cheparjan lote, lake kethe-o alam kali. Halatum keklem akam apot halatum kephonangji asonthotsi mo kejut ahut halatum aduk phoji.

¹⁶Neli puthulo: neli ke kelu abang-lo pu neliphan baduta matha nangne. Bonta nanglitum lapule matha setta neli asapso kechepindakjile neliphan kelu abang aphan asonthot-le nedengtha.

¹⁷Hemphu nekepaputoi asonthotsi neli labangso alam pulo, lapu kali, bonta kelu abang asonthotsi neli labangso akechepindak alam pulo.

¹⁸Bonta pirthe aron asonthot kechepindak atum do-o apotsi nelita lason chepindakpo.

¹⁹Nanglitum methangsi giani atumlo apotsi nang-litum kelu atum aphan ning arong pen chak-lo!

²⁰Pima komane abang nanglitum aphan ban paplang-lote, kalite nanglitum amar chodet-lote, kalite nanglitum aphan nep lote, kalite nanglitum aphan langremlote, kalite nanglitum akecheng teng-lote, nanglitum labangso abang aphan chechakverlo.

²¹Neli theraksi pupo, nelitum ke lason keklemji ajakong ave. Bonta neli kelu asonthotsi, pupo; komane abang jongsi kopine alam pen apot chepindak hailo tangte, nelita lasonthak thaksi chepindak hailo.

²²Halatum Ibri atumma? Nelita Kalang-lo. Halatum Abraham asu atumma? Nelita Kalang-lo.

²³Halatum Khristo aban atumma? Neli ingcham-jamsi pupo; neli halatum apar memuchot abanlo! Neli klem chepaduk mu lo, neliphan phatek kebeng abatai ongmulo, neli reng keso abatai ongmulo.

²⁴Aphongtin batai thomkep-ra sirkep nechoksi Jihudi atum neliphan champre abu pen phongpho ne sap-lo.

²⁵Roman atum neliphan kaibong pen batai kethom nechok-lo; arlong pen eboi nearbulo. Neli batai kethom telongpi pen pen lang jang-lo, neli ejo arnisi talo athaksi inglangpong-lo.

²⁶Neli bithe bitha kedam ahut langthepi hei hei pen, kanghu atum arideng pen neli methang akhei amonit atum arideng lapen Jihudi kalidet atum arideng kepherememe akesung pholo; neli rongsopi hei hei along kedo ahut, kejejangtang hei hei ajo kedo ahut, talo athak kedo ahut, lapen kechobeichot akorte atum arideng kepherememe akesung pholo.

²⁷Neli kam klem-olo, chepaduk-olo; neli mek kejanglongle aningve do-olo; neli kangchir-kelangit pen dolo; an kehum abatai do-olo; kechetebin adim kave pen ajok kechung-kangsam kepho lapen pe-ri kave abatai do-olo.

²⁸Lapen akaprek kaprek alam aparta, neli kadokave amondoli mate kroi-asong atum aphan kematha anghorta neli arnivangta ponlo.

²⁹Komane abang ajakong avelote neli methangta jakong kavedet asonsi neli chemathalo, komane abang aphan pap paklolote neli ning aduk dopik titilo.

³⁰Neli jongsi chepindakvek nangji pulote, neli ke neli jakong kave alam hei hei apotsi chepindakpo.

³¹Hemphu Jisu a-Arnam lapen a-Po ke neli pachobeibe pu chinilo. Alangli ke suri suri akai anta monit atum pen kero karcho kelong nangji abang-lo!

³²Neli Damaskas arongsopi along kedo ahut neliphan kepanepjisi Aristas recho aber kedo a-Govornor ke rongsopi anghap along chedanbang patonlo.

³³Bonta ingtong arlo neliphan thapsi paisong anghapso pen neliphan pahirlo, lapen neli katjuisi alangli rideng pen jok-lo.