Read Karbi 2 KORINTH 12 Bible Online

2 KORINTH 12 - Karbi bible

2 KORINTH 12

¹Thang ale ave setta neli chepindak nangkok-lo. Hemphu neliphan kepaklang aning arjan hei hei lapen kepaklang alam hei hei non neli thanpo.

²Neli chinilo, ningkan krephli aphrang inut amonit aphan sining pharthom athak anta pondet-lo. Bonta alangliphan abang arpum pentong keponlone, kalite abang arpum pen kali lone, lake neli chinine—Arnamsi chinilo.

³Neli puthupo: labangso amonit aphan sining rengme an pondet-lo, lake neli chinilo; abang arpum pen lone, kalite abang arpum pen kali lone, lake neli chinine—Arnamsi chinilo.

⁴Lapen lam pen kechethan pajirmidam un-edet, lason alam hei hei alangli hadak arjulong-lo. Lahei hei alam monit atum ningjelongle.

⁵Lasi labangso amonit alam pen apotsi neli chepindakpo—bonta neli methang alam pen apot ke neli methang ajakong kave alam hei hei pen apar ke neli chepindakdedetji.

⁶Bonta neli jongsi kechepindakji ning hang-lo tangte, neli ke kelu abang cheplangpo, lapu kali; pima neli ahok alamsi thanpo. Bonta neli chepindakdedetji, pima monit atum neli keklem akam thek-longsi lapen neli kepu alam arjulongsi neliphan kematha nangji asonthot kemathaji, la ansi neli ning hang-lo; la apar neliphan kemathaji, lake neli ning hanghelo.

⁷Bonta neliphan ake-ongpi ason ke-paklang apot neli chepindaksi neli ning kerungphomji, lason keplangpledetjisi neli ok arlo ingsu ehong nebitang-lo. Neli kechepindak-pikpedetji aphan neliphan kepasungjisi lake Soitan apherangke ason kam klembomlo.

⁸La kehekjokji aphan neli Hemphu aphan batai kethom choningrilo.

⁹Bonta Hemphu neliphan thaksi pulo, “Ne akangjinso anta nangphan dor, pima nang jakong kave ahutsi nejakong klangpame thek.” Tangte nelilong Khristo ajakong kedoji aphan neli jakong kave hei hei pen apot neli ansose ning arong pen chepindakpo.

¹⁰Lasi Khristo aphan ajok kesung kechechakke neli ning arong do. Neli jakong kave, neliphan kelangrem, neli akedorde, neliphan kechenek, lapen neli kesung kepho hei hei an pen apotta neli ning ingsamlo. Pima neli methang ajakong kave ahutsi neli jakong thelo.

¹¹Neli kelu abang asonsi klembomlo! Bonta nanglitumsi neliphan lason nepacheplangtoilo. Nanglitumsi neliphan kero nangji atumlo. Pima neli ke thangta kalidet abang-lo setta nanglitum kepu, “Ketoitang a-Kethenei atum,” pu atum apar neli bimuchot-lo, lapu kali.

¹²Neli kechechakthek ajakong lapen kemanghumeme akam hei hei klemsi ahok aketoitang angthek hei hei nang paklangtang-lo.

¹³Neli akaprek amondoli mate kroi-asong atum aphan apar nanglitum aphan kopi akehingnomuchot akam klemloma? Muthe neli nanglitum pen tangka akerap chohanghedet-lo, la anhelo. Labangso akelet apot neliphan diyatha.

¹⁴Non neli nanglitum along batai kethom aphong kevangjisi chesik-lo—lapen neli nanglitum aphan thangta pasungsedetpo. Pima neli nanglitum akhile kenangji kali, nanglitum aphan mamatsi nangji; pima asomar atumsi api apo atum aphan tangka birtipi nangji, lapu kali; api apo atumsi asomar atum aphan tangka birtipi nangji.

¹⁵Lapen nanglitum akarjong aphan ajok neli ning arong pensi neli methang akhi lapen neli methang apranta chepidetpo. Neli jongsi nanglitum aphan chinghon parpik-lo tangte, nanglitum neliphan kanghon pakommuchotjima?

¹⁶Tangte neli ke nanglitum aphan pasungsedet-lo, lake nanglitumta kroiji. Bonta neli ke resakjaksi kepacherei abidi pen nanglitum aphan nep-lo pusi mane abang puji.

¹⁷Neli nanglitum along nangketoi atum angbong komane abang pen ajoksi neli nanglitum aphan rotsoloma?

¹⁸Taitas nanglitum along kevangji aphan neli alangliphan choningrilo, lapen alanglilong Khristian akorte inut aphanta nangtoidunlo. Taitas nanglitum aphan kopine rotsoloma? Alangli lapen neli ke ning kehang isipet pensi klemlo, lapen nelitum a-ot adur isipet-lo, kalima?

¹⁹Nelitum la an aporta nanglitum angno nelitum methang kechethak-dunji aphansi nelitum bor-i bomlo pusi nanglitum matha tahai. Kechinghon atum, nelitum Khristo pen chelangpetsi, Arnam angnosi la ahok alam ningjelo, lapen nanglitum aphan kerapjisi nelitum la kadokave klemlo.

²⁰Mo neli nanglitum along kevangji ahut nanglitum aphan neli ning kehang asonthot nangthek longledetjibon, lapen nanglitumta neliphan nanglitum aning kehang asonthot nethek-longledetjibon pusi neli pherelo. Nanglitum angbong kechebohong lapen kechelangselet, aning kesedeng lapen amethang ale keri, kechesorsar lapen kechepasimu, ane kechepathe lapen kehurisei hei hei dojibon pusi neli pherelo.

²¹Lapen neli nanglitum along vangthusi nanglitum angno ne-Arnam neliphan nepabihekjibon, lapen aphrang phrang keklemtang apap lapen akangthirthe, beisa, ketherak meme akam pen aning kecheruire atum pen apot neli chiru chernap nangkokjibon pusi neli pherelo.