Read Karbi 2 KORINTH 13 Bible Online

2 KORINTH 13 - Karbi bible

2 KORINTH 13

¹Non neli nanglitum along batai kethom aphong vangpo. Hastro kepu asonthotsi “Banghini kalite bang kethom ahaki kechodun pensi kadokave alamta parai nangji.”

²Hala aphrang pap keklem atum aphan lapen akaprek atum an aphanta neli keparejisi ning hang-lo. Aphrangta, atheke neli nanglitum along batai hini aphong kevang ahutta neli labangso alam pulo, bonta non neli nanglitum angbong nelibang kave ahutta neli labangso alam puthupo: mo neli nanglitum along kevangji ahut baduta aduk phojokjedetji.

³Pima neli pen ajok Khristo pu loma pusi nanglitum aporman rilo apotsi non nanglitum kenangji an aporman longpo. Alangli nanglitum aphan nang keklempi ahut alangli jakong avelo, lapu kali, bonta alangli amethang ajakong nanglitum angbong paklang-lo.

⁴Pima ajakong kave pensi alangliphan thengparpan athak pathilo chenam, bonta Arnam ajakong pen ajok non alangli reng-lo. Khristo pen chelangpetsi nelitumta jakong avelo. Bonta nelitum mo nanglitum along vangsi nanglitum aphan keklemji ahut nelitum la kereng-et a-Khristo pen jalangpetji, lasi nelitum la keklemji aphan Arnam ajakong longji.

⁵Nanglitum akekroi chok-loma, chokchelangma, lale nanglitum methang methang asat chelangreptha. Nanglitum methang methangle aporman che-enreptha. Kalite Jisu Khristo nanglitum aning arlo do pu nanglitum chinilorlema? Nanglitum jongsi asat chelangthekthe tangte, alangli nanglitum aning arlo ave.

⁶Bonta nelitum ke asat kechelang-thekthe atum kali. Nanglitum labangso alam chinipo pusi neli ning thelo.

⁷Bonta nanglitum kehingno akam thangnatta keklemkledetji aphan neli Arnam angno choningrilo—nelitum ke asat kelangthek atumlo pu keklangji aphan kali, bonta nelitum ke asat kelangthekthedet asonthak thak-le klang setta nanglitum ke kechokpet akam keklemthekji aphansi neli la ardomlo.

⁸Pima nelitum ke ahok alam abethur pen thangta klem un-e, ahok alam aphan ajoksi klem unchot.

⁹Nelitum ajakong ave, bonta nanglitum ajakong do, lason ahut nelitum chehok-lo. Lapen lasi nanglitum kechokpameji aphanta nelitum Arnam ardomlo.

¹⁰Lasi, neli mo nanglitum along kevangji ahut, nanglitum a-ot adur kepameji aphan Hemphu nekepi ajakong pen neli nanglitum aphan nangkangchekjokphlotjisi non neli nanglitum along vangve ako labangso alam hei hei tok-lo.

¹¹Lapen nonke, kortemarli atum, kejut akardom deng-iktha! Nangli-tum kechokpameji aphan bor-inon; neli nangkechoningri alam hei hei arjutha; nanglitum lahin lahin alam chekroinon; ning kangsam penle donon. Lasi kanghon lapen ning kangsam kepithek a-Arnam nanglitum along doji.

¹²Kangthir akar-u penle nanglitum lahin lahin kardom chepinon.

¹³Kangthir atum an nanglitum aphan kardom nangpidunlo.

¹⁴Hemphu Jisu Khristo akangjinso, Arnam akanghon, lapen Karjong Kangthir pen akechingrum nanglitum kadokave along padonang.