Read Karbi 2 KORINTH 2 Bible Online

2 KORINTH 2 - Karbi bible

2 KORINTH 2

¹Lasi neli nanglitum aphan ning aduk nangkepipedetjisi nanglitum along kevangvedetji aphan chepathik-lo.

²Pima neli jongsi nanglitum aphan ning aduk nangpilo tangte, neliphan ning keparongji abang komat dolangma? La neli ning aduk kepi atum apar ke baduta avelo.

³Lasi neli labangso alo nanglitum aphan tok-lo—pima neli vangsi, neliphan ning keparong nangji atum ning aduk nekepirongji, lake neli ning hanghelo. Pima neli ning arong lote, nanglitum kadokaveta ning arongpo, lake neli kroipamelo.

⁴Neli ning aduk do parpik pensi lapen mekri-mek-lang pensi neli nanglitum aphan labangso aloh tok-lo. Nanglitum aphan ning aduk kepiji aphan kali, bonta neli nanglitum aphan ko-an chinghonloma, la nangkepachinijisi neli la tok-lo.

⁵Bonta inut abang jongsi komane aphan paningduk-lo tangte, lake neliphan kali, nanglitum kadokave aphan kali setta, nanglitum angbong penang atum aphan anke paningduk-lo. (Alangliphan kepuvaretji neli ning hanghe, apotsi neli labangso alam pulo).

⁶Nanglitum angbong ake-ongmu atum labangso amonit aphan lason aduk kanghoi anta chok-lo.

⁷Nonke nanglitum alangliphan diyasi aningpathe nangpo. Lapu klemklete, labangso abang aning dukparpiksi aning runhup khangjangji tahai.

⁸Lasi neli nanglitum aphan choningrilo, nanglitum alangliphan kanghon paklangthunon.

⁹Neli nanglitum aphan kethan kepare alam an nanglitum kaiketa kroipame loma, kalima, la kechiniji lapen asat kelangjisi neli nanglitum aphan halabangso aloh tok-lo.

¹⁰Nanglitum jongsi komane aphan diyalo tangte, nelita alangliphan diyalo. Pima neli jongsi kopine kediya nangji ason dosi diyalo tangte, lake neli nanglitum pen apot Khristo angnosi diyalo.

¹¹Soitan ilitum aphan asoi kelongledetjisi ili lapuson klemlo; pima Soitan kopi keklemjisi kemathama lake ilitum chinilo.

¹²Neli Khristo alamjir a-Birta Keme kepachethangjisi Troas arongsopi nangkele ahut, hadak labangso akam aphan Hemphu tovar ingpulo, lake neli thek-long-lo.

¹³Bonta hadak nelitum akorte, Taitas pen chetongtedetsi neli ning kangsam avedet-lo. Lasi neli hadak kedo amonit atum pen kardom chepisi Masedonia adet damjuilo.

¹⁴Bonta ilitum Arnam aphan choro lonang! Pima nelitum Khristo pen kechelangpet pen ajok Arnam nelitum aphan Khristo kehai a-armu kechejeng along koidi atum aphan kepon ason thak-thaksi nelitum aphan kaiketa neponlo. Lapen nelitum pen ajok, kenemprujin angnim ason thak-thaksi Khristo alamjir bithe bitha adim pachethang-lo.

¹⁵Pima nelitum ke Khristo Arnam aphan kethok kenemprujin amar kejok kelongbom lapen kevirbom atum angbong angnim kekhelanphlung ason thakthak-lo.

¹⁶Kevirbom atum aphan ke, lake kepathidet angnimlo; bonta kejok kelongbom atum aphan ke, lake chethe kepithek, lason kenemprujin amarlo. Tangte matsi lason akam keklemji ajakong doma.

¹⁷Nelitum ajakong do, pima nelitum ke hala ake-ongpi atum ason Arnam alam abepari atum kali. Bonta Arnamsi nelitum aphan netoilo, lasi Khristo aban atum asonthotsi nelitum Arnam angno athikpet pen ningjelo.