Read Karbi 2 KORINTH 3 Bible Online

2 KORINTH 3 - Karbi bible

2 KORINTH 3

¹Tangte lake nelitum methangsi kecherothuloma? Kalite manene atum asonthotsi nanglitum aphan, kalite nanglitum pen nelitum aphan kero aloh nelitum nangjima?

²Nelitum aphan kero aloh ke nanglitum helo. Kadokave atum kechiniji lapen keporheji aphan lake nelitum aning athak toktang-lo.

³Khristo amethangsi labangso aloh tok-lo lapen nelitum la nang-lolo, lake klangdak-lo. Labangso aloh ke sibu-alang pen ketok aloh kali, bonta lake kerengver Arnam a-Karjong pensi tok-lo, lapen lake arlong achongplang athak-le ketok kali, bonta monit aning athaksi tok-lo.

⁴Khristo pen ajok nelitum Arnam aphan ning chetheklong-lo apotsi nelitum labangso alam pulo.

⁵Nelitum methang ajakong pensi nelitum labangso akam klem unlo pu nelitum thangta chepu un-e. Arnam pensi nelitum labangso ajakong long-lo.

⁶La kechechak aron kemi akam keklemji aphan alanglisi nelitum aphan jakong nepilo. La kechechak kemi aron ke ahi pen ketok aron kali, bonta Karjong pen ketok aronlo. Hala ahi pen ketok aron ke kethi vanlo, bonta Karjong ke chethe pilo.

⁷Arlong achongplang athak hongsi Aron tok-lo, lapen la pidet aphi Arnam adak atur klang-lo. Moses amahang atur konbomlo setta Moses amahang atur ajakong thepik apot Israel amonit atum alangli mahang langphrongbom un-edet-lo. Hala kevan Aron kepi ahut jongsi Arnam adak atur klang-lo tangte,

⁸la apar la Karjong akechechak aron kepi ahut Arnam adak atur ko-an thelo!

⁹Hala ado kepado-i aron jongsi lason adak atur dolo tangte, la apar hala kejok kepalong-i aron adak atur ko-an themulo!

¹⁰Nonke hako ahut adak atur apar akethemu adak atur dokok-lo apotsi hala hako ahut adak atur ke avedet-lo.

¹¹Pima hala malomso ahut an kedochot amar jongsi lason adak atur dolo tangte, la kaiketa kevirvedet amar ke hala apar ko-an adak atur themupo!

¹²Nelitum lason aning kethe do apotsi jasemet phereredetsi pulo.

¹³Nelitum ke Moses ason kali. Israel amonit atum Moses amahang akekonbom atur kavedet kethekdun long-phrong-phredetji aphansi alangli pe pen amahang chedip-lo.

¹⁴Halatum aning ingtangrak-lo, lapen pini arni anta halatum la kechechak aron barim hei hei keporhe ahut hala esonpet kedip ape pensi aning chedip-lo. Pima mane abang Khristo pen kechelangpet pen ajoksi la kechedip ape varchorlo.

¹⁵Pini arni anta Moses Aron keporhe ahut aling la kedip ape pen halatum aning dipthipbomlo.

¹⁶Bonta inut amonit Hemphu anat chetevarlote, alangli pen la kedip ape enlo.

¹⁷Bonta Hemphu-ke Karjong-lo, lapen Hemphu a-Karjong kedo adim aling, halabangso adim akejokvanta dolo.

¹⁸Lapen ili kadokave atum ke emahang athak kedip ape avedetsi Hemphu adak atur langphrongbomlo; lapen la Hemphu pen, atheke Karjong esonpet adak atur pen ajok ilitum aphan isi pen aphi isi kethemuchotbom adak atur anat elarponbomsi Hemphu a-arje asonthot a-arje epaplangbomlo.