Read Karbi 2 KORINTH 4 Bible Online

2 KORINTH 4 - Karbi bible

2 KORINTH 4

¹Arnam amethang akangjinso pen nelitum aphan labangso akam nepaklemtoilo apotsi nelitum kaiketa ning runhup-he.

²Bonta kepatu lapen ketherakmeme akam an nelitum otekang-lo; nelitum pachereire lapen Arnam alam larle. Arnam angnosi nelitum ahok alam paklangdak-lo, lapen nelitum keklem akam mesen pu monit atum kemathaji aphansi nelitum bor-ilo.

³Nelitum kepachethang a-Birta Keme jongsi dipthipsi dolo tangte lake kevir atovar kedambom atum aphansi dipchot-lo.

⁴Halatum kroikre, pima labangso apirthe kehingno arnamsi halatum aning pangtingkuk-lo. Lasi halatum athak ketur-ang atur halatum thek-longlelo. Khristo alamjir a-Birta Keme pensi labangso atur vang-lo. La Khristo ke Arnam a-arje asonthot-lo.

⁵Pima nelitum methang alamjirsi nelitum pachethang-lo, lapu kali, bonta Khristo Jisu helo Hemphulo, lapen nelitum ke Jisu pen apot nanglitum aban chot-lo pusi nelitum pachethang-lo.

⁶Pima, “Kangting angbong pen kethe-ang tur-angji,” pu kepu Arnamsi nelitum aning arlo kethe-ang patur-ang-lo. Labangso akethe-angsi nelitum amahang along ketur-ang, Arnam adak atur nepachinilo.

⁷Bonsetta nelitum la karjong akhi kedo atum ke longle aphule asonthak thak-lo; lapen kethenei ajakong ke Arnam alongsi do, nelitum along kali, la kepaklangjisi lapuson plang-lo.

⁸Nelitum bithe bitha adim kesung pho setta nelitum ajakong virdetde; ahut pen ahut nelitum aning kebi do setta nelitum aning kethe kavedet khangjang, kali;

⁹nelitum aphan chenek setta nelitum aphan obupbe; ahut pen ahut nelitum areng so setta nelitum aphan pavirdetde.

¹⁰Nelitum abang arpum along Jisu achetheta keklangji aphan nelitum kaiketa nelitum akevir undet abang arpum along Jisu akethi ponverlo.

¹¹Pima nelitum akevir undet abang arpum along Jisu achethe keklangji aphan nelitum rengtikta Jisu pen apot kaita kethi nangji angring dolo.

¹²Lasi kethi nelitum along kam klemvoilo. Bonta nanglitum along ke chethesi kam klemvoilo.

¹³Hastro pulo, “Neli kroilo apotsi neli pulo.” Nelitumta lason akekroi do, lapen nelitum kroilo apotsi nelitum pulo.

¹⁴Pima Arnam, atheke Hemphu Jisu aphan parengsi kepathur abang nelitum aphanta Jisu aphan asonthotsi nepathurji, lapen nanglitum aphan pen pen alangli ingno nepondetji, lake nelitum chinilo.

¹⁵Nanglitum aphan ajoksi la kadokave plang-lo; lapen Arnam akangjinso ongmuchot muchot amonit atum along ledambomsi kero kepi akardom ongmuchotbomji, lapen lasonsi Arnam adak atur theji.

¹⁶Labangso apotsi nelitum kaiketa ning runhuphe. Nelitum abang ajakongle nangkombom setta karjong anat ke nelitum arni arni miponbomlo.

¹⁷Lapen la nelitum kephobom, asapso lapen malomso ahut an kedochot akesung ke nelitum aphan labangso akesung apar akethemu, kepangbar-dam un-epin lapen kaita kedover adak atur nethikpibomlo.

¹⁸Pima kethek-long amar hei hei aphan kali, bonta kethek-longle amar hei hei aphansi nelitum cholangphrong-lo. Kethek long-lok amar ke malomso ahut ansi dochot, bonta kethek longle amar ke kejut un-e akai anta dover.