Read Karbi 2 KORINTH 5 Bible Online

2 KORINTH 5 - Karbi bible

2 KORINTH 5

¹Pima non nelitum kedobom ape ahem, atheke la nelitum abang arpum virdet-lote sining athak Arnam nelitum aphan nekethikpi ahem nelitum do. Lake monit ari pen kese-lam ahem kali, Arnam amethangsi selamlo, lapen lake kejut un-e akai anta doverji.

²Non ladak ke nelitum ar-emlo ahok, lapen sining pen kevang hem ason ape nelitum che-um ingtung-olo.

³Pima nelitum la chepindeng lote, nelitum kaiketa reng angse kalidetpo.

⁴La pirthe athak kedo ape ahem along nelitum kedobom ahut nelitum sungpiksi ar-embomlo ahok. La kevirdetji amar aphan chethe pen kepalardetjisi nelitum sining athak ape che-um ingtung-olo, bonta lake nelitum labangso abang arpum pen keche-oji ning hang-lo, lapu apot kali.

⁵Bonta labangso akechelar nelitum kelongji aphan kepathik abang ke Arnam helo. Alangli nelitum aphan amethang a-Karjong nepilo, lapen lake alangli nelitum aphan nekebirtipi ason an nelitum longvekji pu angthek-lo.

⁶Lasi nelitum kaiketa phererelo. Pima nelitum chinilo, nelitum labangso abang arpum dotik ke nelitum Hemphu ahem pen chepahelolo.

⁷Pima nelitum kekroi pensi kengkam chejorlo, kethek-long-lok pen kali.

⁸Nelitum phereredetsi dolo, lapen nelitum labangso abang arpum che-osi Hemphu along kedodunji ning hang-lo.

⁹Lasi nelitum nemethang methang abang arpum along dobom tame, kalite la pen che-o settame, nelitum alangli ning kepadokjisi ning hang-elo.

¹⁰Pima ilitum kadokaveta Khristo kangsai anghoi angno arjapvek nangji. Ilitum emethang abang arpum along kedo ahut ilitum akeme, kalite akehingno keklem apot ilitum kelong nangji anam ilitum abangphutinta longrepji.

¹¹Lasi, Hemphu aphan kephere athe chinipamesi nelitum monit atum aphan pakroibomlo. Nelitum kopuson amonitma, lake Arnam chinipamelo, lapen lasonthotsi lake nanglitum aning angthin pen neliphan chinilo pusi neli ning thelo.

¹²Nelitum nanglitum angno puthot kechepindakjisi bor-ilo, lapu kali, bonta nelitum pen apot nanglitum kechepindakji athe kelongjisi nelitum bor-i-lo. Anke hala amethang a-ot adur apot kali, bonta athak a-arje pen apot kechepindak atum aphan nanglitum thakdun thekpo.

¹³Pima halatum kepu asonthotsi nelitum jongsi ingchamjamlo tangte, lake Arnam aphan ajok-lo; nelitum aning jongsi mesenlo tangte, lake nanglitum aphan ajok-lo.

¹⁴Pima Khristo akanghonsi nelitum aphan jalo, atheke kadokave amonit aphan ajok inut abang thilo; lasi kadokave amonitta alangli long thidunlo pu nelitum kroilo.

¹⁵Kereng atum non pen apara amethang ale aphan kali, bonta halatum aphan ajok thisi kerengthu abang aphansi rengpi nangji.

¹⁶Lasi non pen apara nelitum badu aphanta monit atum akematha, pirthe aron ateng pen ingsaiselo. Aphrangke nelitum monit atum ok anat akematha aron ateng pensi Khristo aphan ingsailo, setta nonke nelitum lapuson klemklelo.

¹⁷Lasi mane abang jongsi Khristo pen chelangpet-lo tangte, alangli ke kepinchong kemilo; aban an damtang-lo; langnon! akemi vangtang-lo.

¹⁸Arnamsi la kadokave klemlo. Alangli Khristo pen ajok nelitum aphan amethang pen pajelangthulo, lapen anut kaprek atum aphanta alangli pen kepajelangthuji aphan alangli non nelitum aphan la kepajelangthu akam nepaklemtoilo.

¹⁹Atheke lahelo, Arnam Khristo pen ajok kadokave amonit aphan amethang pen pajelangthubomlo. Arnam halatum apap alakha bibedet-lo, lapen alangli nelitum aphan labangso kepajelangthu alam kepachethang akam nepek-lo.

²⁰Lasi nelitum ke Khristo apherangke atumlo. Arnam amethangsi nelitum pen ajok kadokave amonit aphan choningribomlo. Khristo apharman nelitum nanglitum aphan choningribomlo. Khristo apharman nelitum nanglitum aphan choningrilo: nanglitum Arnam pen jalangthunon!

²¹Khristo apap ave, bonta ilitum Khristo pen kechelangpet pen ajok ilitum Arnam adhoromi kelongdunji aphansi ilitum pen apot Arnam alangliphan inut papi abang ason paplang-lo.