Read Karbi 2 KORINTH 6 Bible Online

2 KORINTH 6 - Karbi bible

2 KORINTH 6

¹Tangte nelitum Arnam pen kam klemrap rapsi nanglitum aphan choningrilo, nanglitum Arnam akang-jinso dengjongjong-chot-ri.

²Pima Arnam pulo; “Neli nanglitum aphan kangjinso kepaklangji ahut nanglesi, neli nanglitum alam arjuding-lo; Neli nanglitum aphan kepajokji ahut nanglesi, neli nanglitum aphan rap-lo.” Mathanon! Arnam akangjinso kedeng nangji ahut non helo! Kejok kelong nangji arni pini helo!

³Baduta nelitum akam aphan adai ketinthekthedetji aphansi nelitum badu atovar alongta kepatekung-i amar kebibedetji bor-ilo.

⁴Bonta labangso alar nelitum klem aling setta nelitum ning kechepading pen kesung lapen keboi hei hei chechaksi, nelitum ke Arnam aban atumlo pu chepaklang-lo.

⁵Nelitum aphan nechok-lo, phatek nebeng-lo, lapen monit atum nelitum abethurpak-lo; nelitum kam klemparpik-lo, nelitum mek kejang longle pen lapen an kangchir pen dolo.

⁶Nelitum ingthir-et pen, ahok alam agian pen, ning kechepading pen lapen kechingkime a-ot pen dosi, Karjong Kangthir pen ajok, ahok akanghon pen ajok,

⁷ahok alamjir kethan pen ajok lapen Arnam nekepi ajakong pen ajok, nelitum ke Arnam aban atumlo pu nelitum chepaklang-lo. Dhoromipet ke nelitum ari ar-e lapen arvi arisim ason dolo.

⁸Nelitum aphan anong pathelo lapen nelitum aphan anong jolo; nelitum aphan pinremlo lapen nelitum aphan rolo; nelitum aphan kechobei atum pusi pulo, tebonta nelitum ke ahok alamsi ningjelo.

⁹Nelitum aphan monit atum chinine pusi pulo, tebonta kadokave atumta nelitum aphan chinipet-lo; nelitum ke akethitang-lo asonsi nelitum aphan nemathalo, tebonta nelitum reng-etbomlo, lake nanglitum thek-long-lo. Nelitum areng solo setta nelitum thilot-lelang.

¹⁰Nelitum aphan ning aduk nepilo setta nelitum kaiketa ning arong-lo; nelitum ke keboidet atum asonlo setta nelitum ake-ongpi atum aphan paplang-lo; nelitum thangta kavedet asonlo setta nelitum chenamsi kadokave amar dolo.

¹¹Nelitum nanglitum aphan kadokave alam nangthandak-lo, O, Korinth asor atum! Nanglitum aphan nelitum aning nang chingpudang-lo.

¹²Nelitumsi nanglitum aphan ning nang chingpupedet-lo, lapu kali, nanglitumsi nelitum aphan ning nangchingpupedet-lo.

¹³Nanglitumke neli methang asomar asonthotsi neli nanglitum aphan nangpulo, nelitum nanglitum aphan nangkematha asonthot-le nanglitumta nelitum aphan nematha non. Nanglitum aning nangchingpu-dang non!

¹⁴Kekroikrelang atum pen nangli-tum ajuali chebat-ri. Pima kopusi kehingno pen dhoromi kechelangrap thekjima?

¹⁵Lapen kopusi Khristo pen Hi-i alam kechekroithekjima? Kekroi abang kekroikre abang pen kopi asonsi akecheton doma?

¹⁶Pima kerengver Arnam aphan kangduk-kardom adim, Kardomhemthepi Kangthir pen kumlin hei hei kebi ahem kopi akecheton doma? Kerengver Arnam aphan kardom kangduk adim, Kardomhemthepi Kangthir ke ilitum helo! Atheke Arnam amethangsi pulo, “Ne nemethang amonit atum along dodunsi halatum angbong helatji; Ne halatum a-Arnam cheplangji, lapen halatum nemethang amonit plangji.”

¹⁷Lasi Hemphu pulo, “Nangtum halatum angbong pen barra, halatum pen chepapreknon. Lapen kangthirthe amar thangta paphori; anke ne nangtum aphan chakpo.

¹⁸Ne nangtum apo cheplangji, lapen nangtum nesopo lapen nesopi atum plangji pusi Hemphu, Jakong theparpik abang pulo.”