Read Karbi 2 KORINTH 7 Bible Online

2 KORINTH 7 - Karbi bible

2 KORINTH 7

¹Tangte kechinghon atum, ilitum aphan la kadokave alam echaktang-lo apotsi ilitum abang arpum aphan lapen ekarjong aphan kepangthirthe ason an che-ora ili chepangthir lonang, lapen Arnam aphan kephere pen dora ili ingthirpame lonang!

²Nelitum ke badu aphanta kehingno klemkle, badu aphanta pahingnone, mate badu aphanta amek harliple. Nanglitum nelitum aphan ning nang-chingpunon.

³Nanglitum aphan adai nangketinjisi neli labangso alam pulo, lapu kali. Pima aphrang kepu asonthotsi nelitum ke nanglitum aphan nangchinghon-olo, nanglitum pen kethi rap rapji lapen kereng rap rapji aphanta nelitum chesik-lo.

⁴Neli nanglitum aphan ning nangchethek-long-lo; neli nanglitum pen apot chepindak-olo! Nelitum akesung ahutta neli ning arong plengset-lo.

⁵Nelitum Masedonia adet nanglerok aphita nelitum sanglongledet-lo. Bithe bitha nelitum akesung dolo, anut kaprek atum pen chebohong-lo, nelitum aning arlo kephere dolo.

⁶Bonta Taitas kevang pen ajok, aning kerunhup atum aning kepaplithek a-Arnam nelitum aning paplilo.

⁷Alangli kevang apot anchot kali, bonta nanglitum alangli ning kepapli apotta nelitum aning arong-lo. Pima nanglitum neliphan kethek-longji ingtung-olo, nanglitum aning aduk do-olo lapen nanglitum neliphan keraiji aphan chesikding-lo pusi alangli nelitum aphan thanlo. Lasi non neli ansose ning arong-lo.

⁸Pima hala nanglitum aphan nangkelo alo pen ajok neli nanglitum aphan ning aduk pilo setta halabangso alo ketok apot neli ning oi-e. Neli eboi ning oilo tema; pima halabangso alo malomso ahut an setta nanglitum aphan paningduk-lo pusi neli mathalo.

⁹Bonta nonke neli ning arong-lo; nanglitum aphan kepaningduk apot kali, bonta nanglitum kaningduk pen ajok nanglitum aning chiruilo apotsi neli ning arong-lo. Arnam aning kehang asonthotsi nanglitum ningduk-lo, lasi nelitum nanglitum aphan thang akehingno klemklelo.

¹⁰Pima inut amonit Arnam aning kehang ateng keningduk pen ajok aning chirui; lasi la pen ajok kejok long. Lapen labangso apot ke baduta aning che-oi-e. Bonta monit aron ateng keningduk ke kethi paplang.

¹¹Nanglitum Arnam aning kehang ason keningduk pen ajok nanglitum kopi plang-loma, lale mathanon! Labangso pen ajok nanglitum keklemji ning hang-elo lapen nanglitum ado ave pu aporman paklang-lo. Atheke keplangtang alam apot nanglitum aning jangjelo, lapen kopi plangdet-loma pusi nanglitum pherelo. Labangso pen ajok nanglitum neliphan keraiji lapen hala kechokche abang aphan aduk kepiji ning hang-lo. La kadokave asonta nanglitum ado ave pu aporman pilo.

¹²Lasi neli nanglitum aphan hala-bangso alo tok-lo setta hala kehingno keklem abang pen apot kali, kalite hala kehingno kechechaknang abang pen apotta kali, bonta nelitum aphan nanglitum ko-an matha-ema, lake Arnam chinilo pu alam nanglitum aphan kepachinijisi neli halabangso alo tok-lo.

¹³Lasi nelitum aning plilo. Nelitum aning kepli anchot kali, bonta Taitas aning arong-lo apotsi nelitum ansose ning arong-lo, pima nanglitum kadokave alangli phan aning parong-lo.

¹⁴Neli nanglitum pen apot Taitas angno chepindak-lo, lapen nanglitum neliphan patherak-redet-lo. Nelitum nanglitum aphan kaiketa ahok alamsi pulo, lapen lasonthotsi nelitum Taitas angno ahokpet alamsi chepindak-lo pu aporman klangdak-lo.

¹⁵Nanglitum alangli kethan alam kopusonsi kroiloma, lapen nanglitum kopusonsi alangliphan kephere pen lapen ok klemhur pen chak-loma, lahei hei alam alangli chematha-damsi nanglitum aphan kanghon litmuchotbomlo.

¹⁶Non neli ning arongpik-lo, pima neli nanglitum aphan chiki pame unlo!