Read Karbi 2 KORINTH 8 Bible Online

2 KORINTH 8 - Karbi bible

2 KORINTH 8

¹Masedonia adet kedo amondoli mate kroi-asong atum angbong Arnam akangjinso kopi klemtang-loma, la nanglitum kechinijisi nelitum ning hang-lo, kortemarli atum.

²Pima halatum keduk kesung phosi thedung asat pholo setta halatum aning arong-olo, lapen halatum boipik-lo setta dan pi-olo.

³Halatum kepi unchit an dan pilo, lapen kepi unchit pen aparta pilo, lake neli haki chodun un.

⁴Judia kedo kangthir atum aphan kerapdunlongji aphan halatum amethang aning kehang pen nelitum aphan choningrilo.

⁵Nelitum ning kethedam apar halatum pilo! Aphrangsi ke halatum Arnam aphan amethang methang chehodailo; lapen aphi ke Arnam aning kehang ateng pen nelitum aphan chehodailo.

⁶Lasi Taitas nanglitum angbong labangso akangjinso akam keklem pangcheng-lo apotsi alangli la klem-bomsi kepatangpameji aphan nelitum alangliphan choningrilo.

⁷Kadokave asonta, atheke kekroi, lam keningje, gian, nanglitum kerapji aning kehang-e lapen nelitum aphan nanglitum akanghon nanglitum anut kaprek atum apar litmulo. Lasonthotsi la kangjinso akam keklem anatta nanglitum anut kaprek atum apar kelitjisi nelitum ning hang-lo.

⁸Lake hukum kali. Bonta anut kaprek atum ke kerapji aphan ko-an kematha-e-ma, la kepaklang pen ajok nanglitum akanghon ko-an ahok-loma, la kechinijisi neli bor-ilo.

⁹Pima nanglitum e-Hemphu Jisu Khristo akangjinso chinilo. Alangli ke keplang-o abang-lo setta nanglitum pen apot keboidet abang cheplang-lo. Alangli methang akeboi pen ajok nanglitum keplang-oji aphansi alangli lapuson klemlo.

¹⁰Neli kematha alam lahelo, chu-ning nanglitum kepangcheng akam non nanglitum klem patang-lote meparpo. Labangso akam keklem paphrangsi atum ke nanglitum helo, lapu anchot kali, bonta keklemji ning kehang paphrangsi atumta nanglitum helo.

¹¹Tangte nanglitum labangso akam lapusonle klem patangnon! Labangso akam keklemji aphan nanglitum aning kehang-e asonthot-le, nanglitum labangso akam keklem kepatangji aphanta ning hang-enon, lapen non nanglitum kedo an ason penle nanglitum la klemnon.

¹²Pima jongsi kepiji aning kehang dolo tangte, nanglitum akhi ateng pen kepi adan Arnam dengji. Nanglitum kavedet asonsi nanglitum pi nangji, lapu kali.

¹³Anut kaprek atum aphan kepa-sangra nanglitum aphan kepasungjisi neli mathalo, lapu kali, bonta lake kepachingbar chitji aphanlo.

¹⁴Atheke non amat ke nanglitum kedorphlup akhi dolo apotsi nanglitum hala kedorde atum aphan rapdun nangji. Anke nanglitum akedorde ahut, lapen halatum kedo-o ahut, halatumta nanglitum aphan nang rapdunpo. Lapusonsi kadokave pachingbar-rappetpo.

¹⁵Hastro along ketok asonthotsi, “Kepangrum-o abang kecho amar do-olo, lapu kali, lapen kepangrum-o-e abang dordedet-lo, lapu kali.”

¹⁶Nanglitum aphan nelitum kerapji ning kehang-e asonthotsi Taitasta nanglitum aphan kerapji ning hang-elo apotsi nelitum Arnam aphan choro-olo!

¹⁷Pima alangli nelitum kechoningri alam kroilo, lapu anchot kali; bonta alangli nanglitum aphan kerapji aning hang-olo, lasi alangli amethang aning kehang pen nanglitum along kevangji aphan parailo.

¹⁸Nelitum alangli long inut akorte nangtoidunpo. Alangli ke birta keme kepachethang apot kadokave amondoli mate kroi-asong angbongta anong kejumesen abang-lo.

¹⁹Lapen la aparta, Hemphu adak atur kepatheji aphan lapen nelitum ke kerapji aphan ning hang-elo pu alam kepaklangjisi nelitum labangso akangjinso akam keklem along nangkepacherapdunji aphan mondoli atum alangliphan ingvaisi akam bat-lo.

²⁰Nelitum arideng kedo, la kanghon pen kepi adan apot baduta nelitum aphan adai ketinthekthedetjisi nelitum cherepamelo.

²¹Pima Hemphu angno anchot kali, bonta monit angnota nelitum akechok akam keklemjisi nelitum mathapamelo.

²²Lasi ilitum akorte aphan halatum along nangtoidunpo. Nelitum alangliphan abatai batai aporman enlo lapen alangli kaiketa kerapjisi aning hang-elo, lake nelitum thek-long-lo. Lapen nonke alangli nanglitum aphan ning chethek-long apotsi alangli ansose kerapji aning hang-e muchot-lo.

²³Taitas alam lahelo, alangli ke neli ri asangholo, lapen nanglitum aphan kerapjisi neli pen kam klem rap rap-lo; lapen alangli long nangketoidunji akorte atum alam lahelo; alanglitum ke mondoli atum nangkechetoidun atumlo, lapen halatum akam pen ajok Khristo adak atur thelo.

²⁴Lasi halatum aphan nanglitum akanghon paklangnon. Kadokave amondoli mate kroi-asongta labangso alam arjulongsi, nanglitum pen apot nelitum ahokpetsi chepindak-lo pu halatum chiniji.