Read Karbi 2 KORINTH 9 Bible Online

2 KORINTH 9 - Karbi bible

2 KORINTH 9

¹Judia adet kedo kangthir atum aphan kelo adan alam ke neli nanglitum aphan toktedet-ta chok-lo.

²Nanglitum kerapji ning hang-lo, lake neli chinilo, lapen nanglitum pen apot neli Masedonia asor atum angno chepindak-long-lo. Neli pulo, “Grik adet kedo akorte atum ke kerapji aphan chuning pen chesiktang-lo.” Nanglitum ning kehang-e alam pen ajok halatum angbong ongmuchot atum aning rung-lo.

³Bonta nanglitum pen apot nelitum labangso alam aphuthak akechepindak thangta kalidet keplangpledetji, bonta neli kepu asonthotsi nanglitum kesikthekji aphansi neli labangso akorte atum aphan nanglitum along nangtoipo.

⁴Lapu kalite, Masedonia kedo, manene akorte atum neli long nangdunsi nanglitum siksedet thek-long-lote, nanglitum alam pudamdedetsi, nanglitum ko-an theraknang poma! Pima nelitum nanglitum aphan ning chethe-olo.

⁵Lasi neli nanglitum along vangve ako nanglitum aphrang kechaktang adan kepathikjisi neli nanglitum along kevangji aphan barbe ako labangso akorte atum nanglitum along kevangji aphan neli halatum aphan choningri nangji pusi neli mathalo. Anke mo neli vang-lote, lake sik-etsi neli longpo; lapen pivek nangji apotsi nanglitum pilo, lapu kali, bonta nanglitum methang aning kehang pensi nanglitum la pilo, lake klangdakpo.

⁶Bonta labangso alam chematha-thutha, chili kerik-o-e abang ke rotta rot-long-o-e detji, bonta kerik-o abang ke kerotta rot-long-oji.

⁷Abangphutin amethang aning arlo kecheparai asonthot-le papinang; aning duk pen, kalite pivek nangji apotsi pilo, lapu kalidet nangji. Pima aning arong pen kepi abang aphan Arnam inghon.

⁸Lapen nanglitum kenangji ason an nanglitum kaiketa kedoji, lapen nanglitum mesen akam an keklemthekji aphan nanglitum akenangji aparta nanglitum kedoji aphan Arnam ke nanglitum akenangji aparta nangpi un.

⁹Hastro along ketok asonthotsi, “Alangli kedukdet atum aphan ningkeme pen pilo; alangli akangjinso kejut un-e akai anta dover.”

¹⁰Chili kerik abang aphan chili kepi lapen kechoji aphan an kepi abang, atheke Arnamsi nanglitum akenangji an achilita nangpipo, lapen la pachanpo. Lapen lasonsi nanglitum aning keme pen kepi adan pen apot alangli la athe pa-ongmuchotpo.

¹¹Nanglitum kadokave ahutta kepi-o thekji aphan Arnam nanglitum aphan pi-oji, lapen lasi nanglitum adan nelitum arideng pen kelong pen ajok ake-ongpi atum Arnam aphan roji.

¹²Pima nelitum labangso akeru kethai akam keklem pen ajok kangthir atum akedorde padorji, lapu anchot kali; bonta labangso pen ajok Arnam aphan akerota pado-oji.

¹³Nanglitum labangso akeru kethai akam pen ajok nanglitum aning akematha aporman piji, lapen nanglitum Khristo abirta keme kepachethang lapen birta keme alam ateng keklem apot, lapen halatum lapen kadokave aphanta nanglitum aning keme pen kepi adan apot ake-ongpi atum Arnam aphan ro archoji.

¹⁴Lapen Arnam nanglitum aphan kangjinso kepaklang-o apotsi halatum nanglitum aphan chingtung-osi nanglitum aphan Arnam angno nangchoningripiji.

¹⁵Elam pen kethan pajirmidam un-edet, lason adan ekepi apot ilitum Arnam aphan rolonang!