Read Karbi GALASIA 2 Bible Online

GALASIA 2 - Karbi bible

GALASIA 2

¹Ningkan kre phli aphisi neli Barnabas pen Jerusalem damthulo, lapen Taitas aphanta cheponlo.

²Neli hadak dam nangji pu Arnam neliphan nekepaklang apotsi neli hadak damlo. Neli keja atum pen chingki pahemso ahut neli Jihudi kalidet atum angbong kepachethang a-Birta keme alam halatum aphan thanlo. Neli keklemtang akam, mate non keklem akam ale kavedetji aphan ning hanghe.

³Neli ri asangho Taitas ke Grik amonit-lo setta alangliphan reng-rot pibor-i-edet-lo.

⁴Bonta penang atum ke reng-rot pi nangji pusi pulo. Labangso amonit atum ke, ilitum Khristo Jisu pen ajok kelong akejokvan alam nang karjuduntonjisi kepalemlem pen kekroi akorte chekrongsi ilitum asong along nanglutdunjoitang-lo. Nelitum aphan Jihudi atum aron aban nekepaplangjisi halatum ning hang-lo.

⁵Tebonta Birta Keme ahok alam palar longledetsi nanglitum aphan nang kebipi pamejisi nelitum asapta halatum alam kroidundedet-lo.

⁶Bonta keja pu kepu longtang atum, (Neli labangso alam pulo, pima aphrang halatum kopusonma, lake neliphan thangta kali; Arnam ke athak kelangphrui pen ingsaise), neli kethan abirta keme lar nangji puke thangta nepupe.

⁷Bonta Arnam Pitor aphan reng-rot ke-en atum angbong Birta Keme kepachethang akam kepek asonthotsi Arnam neliphanta reng-rot ke-en-e atum aphan Birta Keme kepachethang akam nepak-lo pu halatum chinilo.

⁸Pima Pitor reng-rot ke-en atum angbong ketoitang abang akam keklem along kam keklemdunvoi a-Arnamsi neli reng-rot ke-en-e atum angbong ketoitang abang akam keklem alongta kam nangklemdunvoilo.

⁹Keja pu kepu longtang atum, atheke Jems, Pitor lapen Jon ke Arnamsi neliphan labangso akam nepek-lo pu chinilo. Lasi nelitum kadokaveta kam keklem rap rap atumlo pu angthek ason kepaklangjisi halatum Barnabas lapen neli pen kardom chepilo. Barnabas lapen neli ke Jihudi kalidet atum angbong kam keklemji lapen halatum ke Jihudi atum angbong kam keklemji aphan nelitumta alam chedondunlo.

¹⁰Muthe halatum angbong keduk kelak atum aphan mathadun nangji pusi halatum pulo, lapen neli aphrang pen keklemji ning kehang-e akamta la helo.

¹¹Bonta Pitor Antiok arongsopi kevang ahut alangli akechokche alam chinilorsi neli alangliphan rat angno pu-ak-lo.

¹²Pima Jems along pen kevang manene atum hadak nanglele akoke Pitor Jihudi kalidet akorte atum pen chorap rap-lo. Bonta halatum nangledetke alangli halatum along chekakdundaksi Jihudi kalidet atum pen cho rap rap jun rap-rap-redet-lo, pima reng-rot en nangji pu kepu aphan alangli pherelo.

¹³Kaprek Jihudi akorte atumta kephereju abang asonthak thaksi Pitor asonthot klemdunlo. Barnabas amatta la kephereju akam charlidunlo.

¹⁴Halatum Birta Keme ahok alam atengle keklem kali pu chinisi neli kadokave atum angno Pitor aphan pulo, “Nangli jongsi Jihudi amonit-lo setta Jihudi kalidet atum asonsi do thak-lo tangte, Jihudi kalidet atum aphan Jihudi ason kepadoji aphan nangli kopusi toi bor-iloma?”

¹⁵Ilitumke emahang kethek pen Jihudi amonit-lo; “Jihudi kalidet apapi” atum kali.

¹⁶Aron ateng keklem apot kali, bonta Jisu Khristo aphan kekroi pen apotsi monit aphan dhoromi pu lakhapon. Ilitum amatta Aron ateng keklem pen ajok kali, bonta Jisu Khristo aphan kekroi pen ajok dhoromi pu ekepalakhaji aphansi ili Jisu Khristo aphan kroilo. Pima Aron ateng keklem pen apot ke badu aphanta dhoromi pu lakha ponpe.

¹⁷Jongsi ilitum Jisu Khristo pen chelangpetsi dhoromi pu ekepalakhaji aphan kebor-i ahut ilitumta hala Jihudi kalidet atum asonthak thak papi atumlo pu chethek long-lo tangte Khristo ke pap keklem-i ajotonma? Lapu kali!

¹⁸Neli jongsi kephritang Aron puthot kimthulo tangte neli methang amatsi Aron kekroikre abang pu cheklangdak-lo.

¹⁹Pima neli Arnam aning kehang ateng keklem thekji aphan Aron anat ke neli akethitang-lo, lapen Aron amethangsi neliphan nepathilo. Neliphan Khristo along theng parpan athak nepathidunlottang-lo.

²⁰Lasi nonke nelile kereng kali. Khristosi neli long reng-lo. Non neli kerengbom ke neliphan nekanghon lapen neliphan ajok amethang apran kechepi abang, Arnam a-Sopo aphan kekroi pen ajoksi reng-lo.

²¹Neli Arnam akangjinso varchorche. Bonta jongsi Aron ateng keklem apotsi komane aphan dhoromi pu lakhaponlo tangte, Khristo ke thinak-lo.