Read Karbi GALASIA 3 Bible Online

GALASIA 3 - Karbi bible

GALASIA 3

¹O kelu a-Galasia asor! Nanglitum amek angden thengparpan athak Jisu Khristo kethi klangdak-lo; tangte komatsi nanglitum aphan nang kemoidet-loma?

²Neliphan eson alam nethantha: nanglitum Aron ateng keklem apotsi Arnam a-Karjong kelongma, mate Birta Keme karjura alam kekroi apotma?

³Nanglitum kopu-sonsi la an kechepaluma! Nanglitum Arnam a-Karjong pensi pangcheng-lo; nonke nanglitum methang ajakong pensi pajutpoma?

⁴Nanglitum kephotang an thangta kalidet-loma? chenamsi lake ale kavedet kali!

⁵Arnam nanglitum aphan Karjong nang kepi lapen nanglitum angbong kemanghu meme akam keklem ke nanglitum Aron ateng keklem apotma, mate nanglitum Birta Keme karjura kekroi apot-loma?

⁶Abraham alamle mathadamtha. Hastro pulo, “Abraham Arnam aphan kroilo, lapen alangli akekroi pen apotsi Arnam alangliphan dhoromi pu lakha ponlo.”

⁷Tangte nanglitum chini nangji, kekroi kedo atum helo Arnam asomar binong-lo.

⁸Jihudi kalidet atum aphanta amethang methang akekroi pen apotsi dhoromi pu lakha ponji pusi hastro aphrang pen thanmek-lo. Lasi hastro ke Abraham aphan Birta Keme thanmeksi pulo, “Nangli pen ajoksi Arnam kadokave akhei aphan hirjume piji.”

⁹Abraham kroilo, lapen ahirjume long-lo. Lasi kekroi atum anke alangli sonthak thak ahirjume long-lo.

¹⁰Aron ateng keklem akam aphan kechiki atum an aphuthak ahirjuno do. Pima hastro pulo, “Badutame, Aron aloh along ketoktang alam an kekroipetpe atum an aphuthak ke Arnam ahirjuno do.”

¹¹Aron pen ajok ke Arnam badu aphanta dhoromi pu lakhakhe, lake klangdak-lo. Pima hastrosi pulo, “Kekroi pen ajok dhoromi keplangtang abangsi reng binongji.”

¹²Bonta Aron ke kekroi pen thangta chetonte. Labangso alar hastro ke pulo, “Aron akam an keklempet abangsi hala hei hei pen ajok rengji.”

¹³Bonta Khristo ilitum apharman ahirjuno kepho abang cheplangsi Aron ahirjuno pen epajokphlot-lo. Pima hastro pulo, “Thengpi athak kejangrem abang aling ke Arnam ahirjuno kepho abang-lo.”

¹⁴Jisu Khristo pen ajok Jihudi kalidet atum aphan Abraham aphan kechaktang ahirjume kepijisi Khristo lason klemdet-lo. Lake kekroi pen ajok ilitum Arnam kechaktang a-Karjong kelong thekji aphanlo.

¹⁵Neli korte atum, arnivang abisar alam pen neli pulang: bang hini amonit jongsi alam chedonlo, lapen kechechak aloh along sohi chepilo tangte, badu amonita la lar un-e, kalite kopine alam batdun un-e.

¹⁶Nonke Abraham aphan lapen Abraham aso asu atum angbong pen inut aphansi Arnam lam chechak-lo. Hastro ke nangso nangsu atum pu, atheke amonit ongdung alam pudamde, bonta “Nangso nangsu angbong pen inut,” atheke inut alamsi pudamlo, lapen labangso abang ke Khristo helo.

¹⁷Neli kepudam athe lahelo, Arnam Abraham pen kechechak chebilo, lapen kechechak ateng akam keklemjisi alam chechak-lo. Labangso Aron, atheke ning kan pharo phli ra thomkep aphi kevang Aron ke halabangso kechepathik akechechak pavir un-e, lapen Arnam klemji pu kechak alamta pavedet un-e.

¹⁸Pima jongsi Aron ateng keklem pen ajoksi Arnam adan long-lo tangte, lake Arnam akechak pen apot kalidet-lo. Bonta Abraham ke Arnam akechak pen apotsi Arnam adan long-lo.

¹⁹Tangte Aron ke kopi aphanchot-lo? Lake monit atum akechokche akelele kepaklangji aphanlo, lapen lake kechak-tang abang, atheke Abraham aso asu angbong pen inut abang vangvetik an aphanchot. Inut amonit adak do dunsi Arnam apherangke akerap pen ajok Aron pilo.

²⁰Abe hini nang kedo ahutsi adak kedo abang nangkokchot. Bonta Arnam ke inutnat.

²¹Tangte Aron ke hala Arnam ake-chak pen chetontema? Cheton! Pima chethe kepithek aronsi monit atum long-lo asonte aron kekroi pen apotsi abangphutin aphanta dhoromi pu lakhadetji apot-lo.

²²Bonta hastro pulo, Pirthe adangta pap ajakong abersi do. Lasi Jisu Khristo aphan kekroi atum aphan kepiji pu akechak adan ke kekroi atum aphansi pidet-lo.

²³Bonta kekroi nanglele akoke Aron ilitum aphan koidi atum aphan asonsi kekroi nangleletik an aphan ebengkoisi bilo.

²⁴Lasi Khristo vangvetik-ke Aron ephan kelangchari abang plang-lo, lapen lake kekroi pen ajoksi ilitum aphan dhoromi pu ekelakhapon longji aphanlo.

²⁵Nonke kekroi nangletang-lo apotsi non pen apara Aron ke ephan kelang-chari abang kalilo.

²⁶Pima kekroi pen ajok, atheke Khristo Jisu pen kechelangpet pen ajok nanglitum kadokaveta Arnam asomar cheplang-lo.

²⁷Nanglitum Khristo pen chelangpetsi baptisom ke-entang atum anke Khristo chepindengtang-lo.

²⁸La apotsi Jihudi lapen Jihudi kalidet, ban lapen ban kalidet, lapen pinso lapen arloso atum angbong thang akeprekta avelo: Khristo Jisu pen kechelangpet pen ajok nanglitum kadokaveta isipet-lo.

²⁹Nanglitum jongsi Khristo amonit-lo tangte, nanglitum ke Arnam asomar atumlo, lapen Arnam akechak ason kechepahemphu longji atumlo.