Read Karbi GALASIA 4 Bible Online

GALASIA 4 - Karbi bible

GALASIA 4

¹Neli kepudam alam la helo, apo akhi kechepahemphuji asopo abang arta ave akoke, alangli kado-kave amar ahemphulo setta ban pen thang akeprekta ave.

²Alangli po kepathiktang arni nangleletik, alangli arta kavedetlang ahut ke alangliphan kerai abang lapen ahemari akeng-risi alangli do.

³Lasonthak thaksi ilitumta ahok aphan kechinine, bihek akoke sining pirthe aphan kepangri akarjong atum abanlo.

⁴Bonta ahut nangchoksi Arnam amethang a-Sopo aphan nangtoilo. Alangli inut arloso pen amahang theksi inut arloso asopo ason vang-lo, lapen Jihudi Aron abersi dolo.

⁵Aron aber kedo atum aphan kepajokjisi la plang-lo; lapen lake ilitumta Arnam kur kepon asopo atum keplangthekji aphanlo.

⁶Nanglitumke Arnam asopo atumlo pu keklangdakji aphansi Arnam ke amethang a-Sopo a-Karjong aphan nanglitum aning arlo nangtoilo. Labangso a-Karjong ke. “O Po,” pusi hang-lo.

⁷Tangte lahelo, nangli non pen apara ke ban kalilo, bonta Arnam asopolo. Lapen nanglike alangli sopolo apotsi Arnam amethang asomar atum aphan kebipi amar nanglita chepahemphudun longpo.

⁸Aphrangke nanglitum Arnam aphan chininedet-lo; lasi nanglitum arnam kalidet akarjong atum aban cheplang-lo.

⁹Bonta nonke nanglitum Arnam aphan chinilo, mate la aparta Arnam nanglitum aphan nangchinilo, tangte nanglitum kopusi hala ajakong kave lapen keboidet kepangri akarjong atum anat chiruithuvoiphak-loma? Nanglitum kopi apotsi halatum aban kecheplangthuji ninghang-loma?

¹⁰Nanglitum penang a-arni, achiklo, abotor lapen aningkan hei hei ketalon kroidunbom.

¹¹Neli nanglitum aphan nang chepadukpinak lobon pusi neli ning bilo.

¹²Korte marli atum, neli nanglitum aphan choningrilo, nanglitum neli sonthot-le cheplangtha, pima neli methangta nanglitum asonthak thak-lo. Nanglitum neliphan thang akehingnota klemkle.

¹³Neli kesodet pen apotsi neli nanglitum angbong Birta Keme kepachethangcheng asoi long-lo, lake nanglitum chinilo.

¹⁴Bonta neli ok kerengno pen ajok nanglitum aphan asat the-olo setta nanglitum neliphan nelangselet-le lapen nehijimjedet-lo. Bonta nanglitum Arnam apherangke aphan lapen Khristo Jisu aphan kechak asonthotsi neliphanta chak-lo.

¹⁵Aphrangke nanglitum aning arong-pik! Nonke kopisi kecheplangdet-loma? Nanglitum un asonte, nanglitum methang amek chehekjoksi neliphan nekepidetji anbak-lo, lake neli pudak un.

¹⁶Tangte nanglitum aphan ahok alam nangkethan apotsi nonke neli nanglitum ahotur cheplangdet-loma?

¹⁷Hala anut kaprek atum ke nanglitum aphan ning nangdokpik asonsi chepaklang-lo, bonta halatum aning akeme pen kali. Halatum aning kehang binong ke, nanglitum aphan neli pen pachekaksi halatum aphan aning kepadokji aphanchot.

¹⁸Jongsi labangso aning kedokpik ke kepameji aphanlo tangte, lake mesenlo; neli nanglitum along kedo ahutchot kali, lake kaiketa mesenlo.

¹⁹Neli keching-hon asomar atum, nanglitum along Khristo a-ot dodetik ke, neli ke inut arloso oso amahang kepathek ahut aduk kedo asonsi nanglitum aphan ajok puthot neli ning aduk dolo.

²⁰Neli non amat nanglitum along dosi nanglitum aphan nang kethan a-ot kepaprek muchotjisi ning hang-lo. Pima nanglitum pen apot neli ning siksak-lo.

²¹Aron aber kedoji aning kehang atum an aphan neli arjulang; nanglitum Aron alam arju longlelangma?

²²Pima ketok lapuson helo, Abraham asopo bang hini do. Inut abang ke banpi pen aso lapen anut kaprek abang ke banpi kalidet pen aso.

²³Banpi pen aso abang ke kadokave atum ason ok pensi amahang thek-lo, bonta banpi kalidet pen asopo abang ke Arnam akechak pen apotsi amahang thek-lo.

²⁴Isi alamlir pen la hei hei alam chini unji: La bang hini arloso ke hini akechechak asonlo. Ban kedoji asomar aphan amahang kepathek abang ke Hagar helo, lapen alangli ke Sinai anglong athak kepathik akechechak asonlo.

²⁵Hagar ke Arobia adet ang-bong a-Sinai anglong ason lapen non kedo Jerusalem arongsopi asonlo, pima labangso a-Jerusalem ke asomar atum pen pen ban dolo.

²⁶Bonta sining athak a-Jerusalem ke ban kali, lapen lake ilitum apei asonlo.

²⁷Pima hastro pulo, “Chehoknon, O aso kavedet arloso! Ning arongra kehang ase pathenon, O oso amahang kepathek aduk kephophepinlang abangpi! Pima apenan ke-o-epin arloso aparte apenan ke-obup arloso asomar ongmuji.”

²⁸Neli korte marli atum, nonke nanglitum Isaak asonthotsi Arnam akechak pen apot Arnam asomarlo.

²⁹Halabangso ahut hala kadokave atum ason ok pen amahang kethek abang ke Arnam a-Karjong ajakong pen amahang kethek abang aphan chenek-lo. Nonta lason thak thak-lo.

³⁰Bonta hastro kopisi pulo? Hastro pulo, “Banpi arloso lapen asopo aphan toijuinon; pima banpi arloso asopo ke banpi kalidet arloso asopo pen apo amar chepahemphu long rap rap-redetji.”

³¹Tangte lahelo, neli korte marli atum, ilitumke banpi arloso asomar kali, bonta banpi kalidet asomarlo.