Read Karbi GALASIA 5 Bible Online

GALASIA 5 - Karbi bible

GALASIA 5

¹Ili ban keplangpledetji aphansi Khristo epajokphlottang-lo. Lasi nanglitum ban kalidet atum asonle donon, lapen nanglitum aphan ban nangpaplang longrinon.

²Arju iknon, neli Pol mamatsi nanglitum aphan nang thanpo, nanglitum jongsi reng-rot enduntang-lo tangte, Khristo ke nanglitum aphan thang ale avedet-lo.

³Neli puthot thanthupo, reng-rot ke-en abang aphan neli kepu pasodak-lo, alangli Aron alam an kroipetvek nangji.

⁴Nanglitum angbong Aron kekroi pen ajok dhoromi keplangji kebor-i atum anke Khristo pen chekakdak-lo. Nang-litumke Arnam akangjinso angtansi dolo.

⁵Bonta nelitum aning kethe la helo, Arnam nelitum aphan dhoromi pu nelakha ponji, lapen kekroi pen ajok Arnam a-Karjong ajakong pen nelitum labangso aning kethedam ason aphan chonghongphrong-lo.

⁶Pima Khristo pen chelangpet lote reng-rot ke-en lapen reng-rot ke-en-eke thang akeprekta avelo; akenangsot ke kanghon akam pen ajok keklang akekroi helo.

⁷Aphrangke nanglitum keklem mesenlo. Nanglitum ahok alam aphan kekroi keche-obup ke komat pen ajok-loma? Kopusonsi alangli nanglitum aphan nangpakroidet-loma?

⁸Lake nanglitum aphan nang kepha abang, Arnamle keklem kali.

⁹“Asapnat athap penta him adum pakangpet thek,” pusi hastro pulo.

¹⁰Bonta neli nanglitum aphan non anta ning thek-longsi dolo. Hemphu pen kechelangpet pen apot nanglitum neli lam apar akaprek alam ke mathathelo pu neli ning thelo. Badutame, nanglitum aphan nang kepasiksak abang aphan ke Arnam pasungvekji.

¹¹Bonta korte marli atum, jongsi reng-rot ke-enke akenangsot pusi neli than pachethang-lo tangte, neliphan kopi apotsi nekechenekbom langma? Jongsi reng-rot ke-en nangji alamsi neli than pachethang-lo pu alamle ahok tangte neli kethan kepachethang, Khristo atheng parpanke kechingkoi-i atheng-long cheplangpledet-lo.

¹²Nanglitum aphan nang kepasiksak atum ke kasi che-endet khangjangsi keme pusi neli matha.

¹³Pima korte marli atum, nanglitum kejokphlotji aphansi nanglitum aphan nangpha tang-lo. Bonta nanglitum labangso akejok phlotke ok aning kehang kechepapleng-i abidi pinchongri. Nanglitum kanghon penle lahin lahin aban cheplangnon.

¹⁴Pima, “Nangmethang aphan kechinghon asonthot-le nang tebok abang aphan chinghon non.” pu ahukum alongsi kadokave Aron plengtang-lo.

¹⁵Bonta nanglitum jongsi chekor seroi, checho seroi lote, cherenon, kalite nanglitum hijan chepavirdetna.

¹⁶Neli kepudam alam la helo: nanglitum Karjong nang keja atengle kengkam chejornon. Ok aning kehang kechepaplengji aphan klemri.

¹⁷Pima ok aning kehang anke Karjong aning kehang pen chetonte, lapen Karjong aning kehangke ok aning kehang pen chetonte. La sonni ke kaita chetonte, lapen lasi nanglitum aning kehang aling klem longle.

¹⁸Nanglitum jongsi Karjong nang keja atengsi klemlo tangte, nanglitum Aron aber dodelo.

¹⁹Tangte ok aning kehang akam ke la helo: beisa, kangthirthe lapen ketherakmeme akam hei hei,.

²⁰kumlin aphan kangduk kardom lapen maja kanghoi, hotur kechebi, kechebohong, kechelang un-e, aning kesedeng, amethang kechemathalokchot, abe abe kedo, asong asong kechethak;

²¹kechelang selet, hor kangri, kecho pajoi hei hei lapen akaprek lasonthak thak akam an helo. Neli nanglitum aphan aphrang kepacheretoi asonthotsi nonta neli nanglitum aphan puthupo: lason akam keklem atum anke Arnam arat chepahemphu longledetji.

²²Bonta Karjong athe ke la helo: kanghon, ning arong, ning kangsam, ning keding, ning keme, keme a-ot, kekroi thirklong atheng,

²³kechepabihek, ning kecheber hei hei helo. La hei hei aputhak akaprek aron ave.

²⁴Khristo Jisu amonit atum anke amethang akar-i lapen aning kehang akam pen pen ok aning kehang an thengparpan athak pathilottang-lo.

²⁵Ilitum jongsi Karjong pen reng-lo tangte, ilitum Karjong ekeja atengle kengkam chejor lonang.

²⁶Ili chepindak nangnelo, kaita lahin lahin aphan bek nangnelo; lahin lahin aphan lang un-e nangnelo.