Read Karbi GALASIA 6 Bible Online

GALASIA 6 - Karbi bible

GALASIA 6

¹Korte marli atum, komane abang jongsi kopine akechokche akam klemdet-lo tangte, nanglitum, Karjong nang keja ateng keklem atum alangliphan pamethu nangji, bonta nanglitum ingsamjin pensi alangliphan pamethu nangji. Lapen nanglitum methangta chelangpontu, pima nanglitum methang amatta asat angbong klobup tahai.

²Nanglitum lahin lahin anghor chinghorpi seroi nangji. Lapuson atovar pensi nanglitum Khristo Aron kroithekpo.

³Komane abang jongsi thangta kalidet setta, neta inut amonit pusi chemathalo tangte, alangli ke amethangsi che-chobeilo.

⁴Abangphutinta amethang akam aporman pache-en nang. Jongsi mesen tangte bang akam pen pachepangbarbepin pen amethang akam pen apot chepindak longji.

⁵Pima abangphutinta amethang anghorsi chinghor nangji.

⁶Khristian alam kecharli abang ke akeme ason kedo anta alangliphan kethan abang pen pachethak nang.

⁷Arnam aphan chobei un pu mathara nangli methang chechobeiri. Pima monit kopima kerik, kerotta lasi rot longji.

⁸Ok aning kehang kerik abang ke la ok aning kehang pen kevirsi rot longji, bonta Karjong aning kehang kerik abang ke, la Karjong aning kehang pen kejut un-e achethe rot longji.

⁹Lasi ili akeme akam keklem lak-ledet lonang, pima ili keklem o-edet lote, mo arnisi athikpet apor ahut ili rot longji.

¹⁰Lasi ahut keme kelong aling ili kadokave atum aphan akeme klem lonang, jasemet ke kekroi akorte atum an aphan akeme klem lonang.

¹¹Neli methang ari pen neli ko-an ahi kethe pen labangso aloh tok-lo, langtha!

¹²Amethang kechepindakji lapen athak kechepaklangji aning kehang atumsi nanglitum aphan reng-rot nang pa-en bor-ilo. Bonsetta Khristo athengparpan aphan ajok kephonang akesung halatum kephojokphlotji aphansi halatum lason klemlo.

¹³Hala reng-rot ke-en atum amatta Aron kroikrelo. Nanglitum reng-rot ke-enke halatum aning kehang akamlo, pima nanglitum reng-rot en lote halatum chepindak longpo.

¹⁴Bonta neli ke Hemphu Jisu athengparpan pen apotsi chepindakchotji; pima alangli thengparpan pen ajok neliphan ke pirthe ke akethitang-lo, lapen pirthe aphan ke neli ke akethitang-lo.

¹⁵Reng-rot ke-en, mate ke-en-eke thangta kali; akenangsot ke kepinchong kemi abang kecheplang helo.

¹⁶Amethang akai arjon labangso aron ateng kengkam kechejor atum an, atheke Arnam a-Israel kemi atum an aphuthak ning kangsam lapen kangjinso padonang.

¹⁷Non pen apar ke baduta neliphan nepasungse nang, pima neli bang athak Jisu angthek do.

¹⁸E-Hemphu Jisu Khristo akangjinso nanglitum akarjong along padonang! Amen.